1 La da kpelima dabiha ayi ni ba di Azɔɔgaat ni boruboru kãha malema la. Ka malemadem kpɛɛnam la ni gban-mi’irib la da ɛɛt sɔrɔse’et ka ba nan tɔ’ɔn dolih gbã’a Yezu ko’ bããlam; 2 ba da yet taaba yii, <<Ti kun nyaŋ iŋ ŋwala wa dɛ’ɛma la niŋaa, ti n iŋ yela nirib la nan gberig zabir ni ti.>>

3 Yezu da be la Simɔn so ningbiŋ n sa’am la yir Betani teŋ poŋi, ba n da be ni dit la, bompɔk kakɔ̃ da kpɛ̃ na tar doɣobil ni kpaam n tar wũsoŋ ka bu ligiri pu tã kãã na, pana vuk doɣobila, zaŋ kpaam la kpa’a sɔ̃ Yezu zugu. 4 Ka se’eba n da be niŋa la da bɔ’ɔhit taaba ni sũũr yet yii, <<lan n so ka u kpa’a kpaam ma da’a n tɔ se’ema bah ŋwala? 5 Ba tɔ’ɔn kɔɔhin bu, bu ligiri mi tɔ’ɔn gaarin a aa sidi tuha atã, u mi tɔ’ɔn zãŋe ligi-ãã wa te tarenam.>> Ba pana da ŋwɔmit bompɔka mi. 6 Ka Yezu yel ba yii, <<bah mi ka bããlam, ya daamit ka bo? U toma toonsomir te Mam. 7 Tarenam be ni ya mi saŋa woo, ka ya nan tɔ’ɔn soŋ ba yam m bɔɔt se’em ma’a, ka Man kun be ni ya saŋa woo. 8 U iŋa se’el ka u paŋ tɔ̃’; deŋ kpa’a kpaam sɔ̃ɔ̃h Man ningbiŋ gur ka laagir. 9 Mam yet ya la yelemɛŋir yii, tengbauŋa zĩ’ĩ woo ka ba tɔɔn Na’ayen yela la, ba nan zaŋ se’el ka bompɔka iŋa tɔɣɔ ka nirib tẽr u yel.>>

10 Ka Geudas Isekariyɔt so n da a Yezu nya’andolib pii ni bayi la nkɔ̃ la, da keŋ malema kpɛɛnam la sa’ani yel yi u nan dɔ̃r Yezu te ba. 11 Ba n da wom ŋwala la ba poo da pɛɛ mi, ka ba da pana po’ yi ba nan te u ligiri. Niŋa ka Geudas da pana ɛɛt sɔse’er ka u nan dolih dɔ̃r Yezu.

12 Zɔɔgaat malema la ka ba dit boruboru kãha ka koot pebibih dabihir la n da paa la, Yezu nya’andolib la da bɔ’ɔh U yii, <<Yaha ka I bɔɔt yi ti keŋ ti maahum ka I di zɔɔgaat diiga?>> 13 Ka Yezu tom U nya’andolib bayi, ka yel ba yii, <<kemi kpɛ̃ tempoŋi ha ka ya nan to’oh buraa ka u ziit kɔ’ɔm ni woor, dolin u, 14 ka un kpɛ̃’ɛ̃t zĩ’ĩ la, kpɛmi niŋa ti yel yir la daan yii, 'Pa’al la bɔ’ɔh nyaa dokoni ka i lɔɔ yi U ni U nya’andolib la di zɔɔgaat dii la?’ 15 U nan pa’al ya dokãt n a dotoɣuma be saazugu ha ka se’el woo be ku ni, niŋa ka ya nam maahum se’el woo ka gur ti.>> 16 Ka U nya’andolib la bah niŋa ka keŋ kpɛ̃ teŋ la poŋi ha serin ti nyɛ se’el woo ka U yel ba la, ka pana maahum zĩ’ĩ la a aa Ɔŋ n pa’al se’em la. 17 Zaanɔɔr n da paa la, Yezu ni U nya’andolib pii ni bayi la da keŋ yir la niŋa. 18 Ka bam pana da zĩ dit la, Yezu da yel yii, <<N yet ya la yelemɛŋir yi ya seba n dit nim ma nkɔ̃ nan dɔ̃r Mam.>> 19 Ka la da daam ba ka ba nkɔ̃ nkɔ̃ bɔ’ɔhit U yet yii, <<A laa, la a la mam bee?>>. 20 Ka Yezu da lebih ba yii, <<La a la yam pii ni bayi wa nkɔ̃, so n laɣun dit ni Mam layeŋ ni wa. 21 Asaal Dawɔɔ la nan kpi a aa la m poɣun deŋ golih se’em la, ka sabaab nan paa so n nan dɔ̃r Mam la! Hali ba n da pu dɔɣɛn ni u wa, la sɔ’ɔɛn.>>

22 Ba n da be niŋa dit la, ka Yezu zaŋ boruboru te Na’ayen tooma ka gbɛ̃’ɛh te ba ka yel yii, <<dɛ’ɛ mi, ka Mam ningbiŋ n la.>> 23 Ka da le zaŋ ŋman ni daam te Na’ayen tooma ka zaŋ te ba ka ba woo ŋwũ. 24 U da yel ba yii, <<Mam nɔdiŋir ziim la n ŋwala, zĩse’eb ka ba kpa’a te nirikooŋ la. 25 Yelemɛŋir ka N yet ya wa, Mam kun le maan ŋwũ dãboo wa ya’aha, la n ka daase’er ka N nan ŋwũ dãpaalim Na’ayen na’am yir la poŋii.>>

26 Ba n da ba’ah la, ba da woom wooma ka yi keŋ do’ Olif zɔɔr la zugu. 27 Ka Yezu da yel ba yii, <<Ya zã’ã nan zo ka bah Mam, lan zugo, la poɣun deŋ golih dɔ yii, 'N nan ko’ dunkeen la ka pihi la zo’ yerig.’ 28 Ka Man ti vo’o dɔɔ, N nan deŋ ya tɔɔn keŋ Galilii.>> 29 Ka Pita yel U yii, <<Hali ba zã’ã n ti zo’ ka bah I, mam Pita kun bah I ya.>> 30 Ka Yezu lebih u yii, <<Yelemɛŋir ka N yet i, zina wa, wo’oŋ koo nɔɔ i nan zi’ih Mam suɣum butã ka nɔrɔɔg nyaan kaah buyi.>> 31 Ka Pita le yel pa’ah yii, <<La m poŋin a la man naa ni I kpi n kun malegun zi’i I ya.>> Ka ba zã’ã laɣun naa yela nɔɔ.

32 Ba da keŋ paa la tense’e n bɔɔn Gesemane la; ka Yezu yel U nya’andolib la yii, <<zi’in mi kpela ka N keŋ ti po’oh Na’ayen.>> 33 U da bɔɔl Pita, ni Gemis ni Geon pa’ah U mɛŋ zugu. Ka ba n da keŋ bɛ’ɛla ha la U sũũr da sãɣum mi hali ka U gĩĩla kɔ’ɔh. 34 Ka U da yel ba yii, <<N sũũr n sãɣum zɔ’ɔ galih hali ka la a aa Man yi N kpi mi la, zi’in mi kpela ka gur.>> 35 Ka U keŋ tɔɔn bɛ’ɛla ha ka lu teŋ po’ohit Na’ayen yi la n nan tɔ’ɔn iŋ, Un zaŋ daan-koo wa U sa’ani bah. 36 U da yel yii, <<Aa, Mbaa, Nyɛ tɔ’ɔn iŋ se’el woo; yihim namih koo wa N sa’ani bah; ka bahum ka la iŋ a aa Nyɛ Mɛŋ N bɔɔt se’em la, ka la ka Mam N bɔɔt se’em.>> 37 Ɔŋ n da leb na la, U da nyɛ yi ba gbihiri ka U yel Pita yii, <<Simɔnee, nyɛ gbihirii? Yam kun tɔ’ɔn pɛɣɛ behit bɛ’ɛla wa? 38 Behimi ka sohum Na’ayen yi be’em sããhug saŋa da paa yaa; ka ya sii la bɔɔt, ka taruk m paa ningbiŋ la.>> 39 U da le leb po’ohit a aa Ɔŋ n poɣun soherin Na’ayen se’em la nɔɔ. 40 Ka Un da le leb na la, U da nyɛ ka ba le gbihit, se’el n so la gɔɔm n da ba’ tar ba; ka ba da pu mi bam n nan yel U se’ere. 41 Ka Un da le keŋ ka le leb suɣum butã poŋi la, U da yel ba yii, <<Ya kpelin gbihiri ka vo’ohiraa? La sɛk ya! Saŋa la paa ya, ba dɔ̃r Asaal Dawɔɔ la zaŋ U iŋ yelebe’etdem nu’uhin. 42 Dɔɔ mi ka ti keŋ. Beh mi nii, so n nam dɔ̃r Mam la paa na.>>

43 Nila nila, ka Geudas so n da a U nya’andolib pii ni bayi la nkɔ̃ la, paa na, ka Yezu nan poɣum pu tɔɣɔ ba’ahe, ka dol nirikooŋ n tar so’oh ni dambana, nirikooŋa da zɛ’ɛl la malemadem kpɛɛnam ni gban-mi’irib la ni teŋ la kpɛɛnam sa’ani na. 44 Geudas da deŋ ko’ ni ba yii, bam paa ba sa’ani, <<So ka n gaat kɔk ka bobig la Ɔŋ n la; gbã’ã mi ni U ni ya tar keŋ.>> 45 Ba n da serin paa na la u da gaat paa Yezu sa’ani ka yel yii, <<Pa’ala!>> ka kɔk U. 46 Ka ba da gbã’ã Yezu gĩ U kankaŋi. 47 Niriseba n da zɛ’ niŋa la nkɔ̃ da fɔɔ so’o pɛhig malema kpɛɛnam da’aba la nkɔ̃ tobir bah. 48 Ka Yezu yel yii, <<Yam tar la so’oh ni dambana na yi ya gbã’a Mam a aa N a la naɣayiigaa? 49 Daar woo ka Mam be Na’ayen po’ohug doog la ni pa’an ni yam, ka ya pu gbã’agim ma. Ka ŋwala wa iŋ yi la dolih mi a aa la n golih se’em Na’ayen gbauŋ la poŋi la.>> 50 U nya’andolib la zã’ã da bah U mi ka zo’. 51 Buribepaalig kakɔ̃ n da lob fugɔbig dol Yezu ka ba da zɛɣit yi ba gbã’agu, 52 ka u pehig fugɔbig la bah teba ka zo bɛɛli keŋ.

53 Ba da tar Yezu paa malemadem tɔɔngat la ni, malemadem kpɛɛnam la, ni teŋ la kpɛɛnam la, ni wara pa’alib la zã’a n da laɣɛh taaba la sa’ani. 54 Pita da dol ba nya’aŋ kɔm kɔm ti paa malemadem tɔɔngat la ndɔŋi zĩ ni niriseba n da laɣɛh la ɔɔhit buɣum. 55 Ka malemadem tɔɔngatib ni teŋ la kpɛ’ɛnam la zã’ã da ɛɛt ba n nam nyɛ U taal se’em ka ko’ U, ka’ ba da pu nyɛ se’el se’el la. 56 Se’el n so la nirib zɔ’ɔ zɔ’ɔ da maɣɛ te Yezu ka ba tɔɣum la zã’ã da pu kpɛ’ɛle. 57 Seba da dɔɔ niŋa maɣɛ U yela. Ba da yet yii, 58 <<Tam wom ka U yet yii, <Mam nan gbi Na’ayen po’ohug dooga ka ba mɛ ni nu’uha bah, ka dabiha atã ni N nan mɛ nkɔ̃ ka nir nu’ug kun si’ihe.> >> 59 Ka bam mi namaɣum la da pu dolih sɔre. 60 Ka malemadem tɔɔngat la da dɔɔ saazugu ba tɔɔm bɔ’ɔh Yezu yii, <<I pu tar lebihug nan lebihee? Nan yela n la ka ba yet yi I iŋ ya ka I sinna?>> 61 Ka U da sin digi digi ka pu lebih yel se’ela. Ka malemadem tɔɔngat la da le bɔ’ɔh U yii, <<Nyɛ n a fããt laa, Na’ayen Kassidaan Dawɔɔ laa?>> 62 Yezu yel yii, <<Ẽẽ, Maan la; ka

<ya nan nyɛ Asaal Dawɔɔ ka U zĩ Paŋ-waabi Daan la dituŋ nu’ug,>

ka <kenna ni tensoŋ sangbana.> >>

63 Ka malemadem tɔɔngat la ããh u mɛŋ fuug la bah ka yel ba yii, <<Yela ka ti le ɛɛt sɛheranam ya’aha? 64 Ya wom Un to’ Na’ayen! Yam tẽ’ẽha deni?>> Ka ba zã’ã tɔɣɔ ko yi U a la ba ko’. 65 Niŋa ka bam baseba pĩ’ĩl tobihit nantɔ̃ɔ̃t ma’at U ka pĩ U nini ka ŋmɛ’ɛt U tampẽgih ka yet U yii, <<Bokum so n ŋmɛ’ɛt I wa!>> Ka ntomerib seba n gur U la dɛ’ɛ U ni bo’ot.

66 Pita da kpelin be ndɔŋ la ni ka malemadem tɔɔngat la pɔɣɔsɔɔg da kpɛ̃ na. 67 Ka un da nyɛ Pita n da ɔɔhit buɣum la, u da beh u ki’i ka bɔ’ɔh yii, <<Nyɛ mi daa laɣum be mi ni Yezu Nazarɛt buraa la.>> 68 Ka Pita ki’ih ka yel yii, <<Mam pu mi bee, bɔk nyɛ n tɔɣɔt se’el laa.>> Ka keŋ yi zanɔrin ha, ka nɔrɔɔg kaah. 69 Ka pɔɣɔsɔɔg la n da le nyɛ u ka u zɛ la, ka u da yel niriseba n zɛ niŋa la yii, <<Burakãã a la ba nkɔ̃.>> 70 Ka Pita le ki’ih. Ka la iŋ bɛ’ɛla ka seba n zɛ niŋa la nkɔ̃ yel Pita yii, <<Nyɛ serin a la ba nkɔ̃, se’el n so la i zɛ’ɛl la Galilii teŋ na.>> 71 Ka Pita le lebih yii, <<Mam poya yi mam pu mi buraaga ka ya tɔɣɔra.>> 72 Niŋa ka nɔrɔɔg kaah pa’ah buyi. Ka Pita pana tẽẽ yi Yezu daa yel yii, <<I nan ti ki’ih Mam suɣum butã ka nɔrɔɔg nyaan kaah pa’ah buyi.>> Ka u da pana lu teŋ fiɣimit ni nkuma.