1 Yezu da leb kpɛ̃ yenpo’ohug dobil la ni, ka buraa so nu’ug n kpi mi zĩ ni. 2 Niriseba n da zĩ niŋa la, da behit nyaa U nan sak teb buraaga vo’ohug dabihira nii, ka ba dol niŋa nyɛ U taal. 3 Ka U da yel bura nukpi’iuŋ daan la yii, <<gaarun tɔɔn na.>> 4 Ka U pana bɔ’ɔh niriba yii, <<La a somma yi i tom toonsoma bee toombe’et vo’ohug daara, ti fãã vom bee ti ko?>> Ka ba da sin digi digi. 5 Yezu da beh ba kaa kaa ni sũũr, la da womit U mi ni niriba sũya n kãb paa zĩ’ĩ la, ka yel buraa la yii, <<Tɛ̃ɛ̃gum i nu’ug.>> Ka u da tɛ̃ɛ̃ ka u nu’u kpiirug la nyɛ tebuk. 6 Farasiinam la da yi mi kalam keŋ ti naa ni Hɛrɔdiya dem yi ba beh ba nan iŋ se’em ko’ Yezu.

7 Yezu ni U nya’andolib la da yi sigi mɔɣir la ni ha, ka nirib berug berug zɛ’ɛl Galilii teŋ dol ba. 8 Ban da wom toonse’a ka U tom la, nirib n ka kãle da yi Geudiya, Geruzalɛm, Idumeya, teh n be Geɔdan mɔɣir la nya’aŋ ha ni Taya ni Sidon tana, 9 Nirib babug la zugu, Yezu da yel U nya’andolib la, yi ba ɛ’ ããruŋ zɛ’ɛl yamma ka gur ka nirib la da ti mɛrig U wa. 10 Un da teb nirib berug la n so, ka niriseba n tar bã’ãh la zeɣɛt yi ba nyaŋ paa si’ih U. 11 Ka sibɛ’ɛh n da ni nyɛ U, ba da ni lu la nvãba ka kaahit yet yii: <<I a la Na’ayen Dawɔɔ!>> 12 Ka U da ni kpa’am ba yi ba da bah ka so baŋ Un a so’o.

13 Yezu da do zɔɔr zugu ha ka bɔɔl seba ka U bɔɔt, ka ba da dolih U do. 14 Ka U da lɔɔ nir piiga ni bayi ka bɔɔl ba yi Apostaliinam, yi ba be ni U, ka U nan Tom ba ka ba yi tin tɔɔl yelesoma la, 15 ka tar kpe’eonse’eog n nan tɔ’ɔn kat sibɛ’ɛh. 16 Nya’andolib pii ni bayi la ka U da lɔɔ la aa, Simɔn (so ka U da leb sɛɣɛ yi Pita); 17 ni Gemis n a Zebedii dawɔɔ ni Geon n a u yebig (so ka U te u wo’or yi Boanɛgis, ka la vɔ̃ɔ̃r a Satãharig Dawɔɔ); 18 ni Andiru, Filip, Batolomeo, Matiew, Tɔmas ni Alefɛyɔs dawɔɔ Gemis ni Tadeyɔs, ni Simɔn n yi Keena na la, 19 ni Geudas Isekariyɔt, so n da dɔ̃r Yezu la.

Ka Yezu da kul; 20 ka nirib la da le laɣah zɔ’ɔ babug gilig kaa, ka ba kɔŋ ba di bon dita. 21 U mabiih la n da ti wom la, ba da yi ba gu U mi, den zugo nirib la da yet yi, <<U putẽ’ẽr pu bee.>> 22 Ka pa’an pa’alib seba n da zɛ’ɛl Geruzalɛm na la yet yii, <<Beelezebul sibɛ’ɛ la kpe’eoŋ ka Yezu tar, lan n so ka U yaŋ kat sibɛ’ɛh la.>> 23 Yezu da bɔɔl ba tã U sa’ani na, ka pana tar maɣaha yet ba yii, <<La nan iŋa yela ka Sibɛ’ɛ nyaŋ kar Sibɛ’ɛga? 24 Teŋ nirib n zab bɔɣih taaba bɔɣir bɔɣir teŋ kaŋ kun tɔ’ɔn zɛ’ɛl a teŋa. 25 Yir nirib mi n yelih taaba, yiden mi kun tɔ’ɔn zɛ’ɛl a yire. 26 Ka sibɛ’ɛ mi n dɔɔ zabir ni u mɛŋ ka yelihug kpɛ̃ ni, u kun tɔ’ɔn zɛ’ɛl le, ka u ba’ahug paa mi. 27 Ka so kun tɔ’ɔn kpɛ̃ paŋ daan yir ti zu u laɣat ka pu lo u daan yiiga, la a la un lo u la, ka pana nan nyaŋ tar laɣat la yi yir la ni. 28 Yelemɛŋir ka N yet ya wa, nirisaal buuri woo nan nyɛ ba yelebe’et suguru, hali ni ba toombe’et la n zɔ’ɔ ni se’em mi; 29 ka so n tɔɣɔ zɛrig Vo’ohun Som Sii la, ɔŋ daan kun nyɛ u yelebe’et suguru, u nan zi u yelebe’et la saŋa n ka ba’ahugo.>> 30 Ka ba da yet yii, <<U tar la sibɛ’ɛ.>>

31 Ka Yezu ma, ni U sɔ̃ɔ̃t tana; ba da zɛ la yeŋ ka tom so yi u bɔɔl U te ba. 32 Nirikooŋ n da zĩ kaa U, ka ba da yel U yii, <<I ma ni I sɔ̃ɔ̃t n zɛ’ yeŋ ka bɔ’ɔhit I yel.>> 33 Ka Yezu lebih ba yii, <<Ban n a Mam ma’ ni N sɔ̃ɔ̃re?>> 34 Ka Un da beh seba n da zĩ kaa U la U da yel yii, <<Yam seba n zĩ kaa Mam ma, n a Mam ma’ ni N sɔ̃ɔ̃t! 35 So woo n tom Na’ayen n bɔɔt se’em la, ɔŋ n a Mam sɔ̃ɔ̃g bee ma’.>>