1 Yezu ni U nya’andolib la da dola mɔɣir la bɔbir dikɔ̃ keŋ ti paa Gerasini teŋ la ni. 2 Ka Yezu n da yit ããruŋ ni na la, nila nila ka burase’e ka sibɛ’ɛ dol u da zɛ’ɛn wɔɔt zĩ’ĩgin yit na to’ohit Yezu. 3 Buraa la da be la wɔɔt la ni, ka so ka’ nan nyaŋ ba’ u ni banaa. 4 Ba da ni ba’ la u nu’uh ni u nɔba, ka u kɛ̃h nu’uh bana la ka kɔ nɔba bana la mi buyabuya, ka soso da ka’ panse’e n nan nyaŋ u wa. 5 Wo’oŋ ni wuntɛɛŋ zã’ã u da ɛɛra wɔɔt la ni zɔya la zut kaahit ka ŋmat u mɛŋ ni kuga. 6 Un da nyɛ Yezu ka u be zãã ha la, u da zo keŋ ti su’un u tɔɔn, 7 Ka tãh ni nkɔkpɛ’ɛmir yel yii, <<Yezu, Na’ayen se’er n ka taraan la Biiga, lan ka i tar yi I iŋ ni mam? Na’ayen som zugu, m belimit I mi yi I da namihum ma.>> 8 Lan zugu Yezu da poɣun yel u yii, <<Sibɛ’ɛga, yim buraaga ni na!>> 9 Ka Yezu bɔ’ɔh u yii, <<i wo’oree?>> Ka u lebih yii, <<M wo’or a la Tam (la vɔ̃ɔ̃r a la ti zɔ’ɔ mi), lan zugo, ti zɔ’ɔ mi.>> 10 Ka pana belim Yezu zɔ’ɔ zɔ’ɔ yi U da kar sibɛ’ɛh la yih teŋ la nii. 11 Kurikurinam berigu n da be zɔɔr la bɔba dit sankaŋ la: 12 Ka sibɛ’ɛh la belim Yezu yii, <<Ke ka ti keŋ kpɛ̃ kurikurinam ma ni>>. 13 Ka U sak ka sibɛ’ɛh la yi buraa la ni keŋ ti kpɛ̃ Kurikurinam la, ka ba zã’ã kãl n a aa tuha ayi la zo sigi mɔɣir la ni, ka kɔ’ɔm di ba. 14 Burase’eh n da gur Kurikurinam la da zo kpɛ̃ teŋ la ni ka tenkpemih la ti yel ba se’el n iŋ la. 15 Ba da tã Yezu sa’ani na ka nyɛ burase’e ka kolekpãbɛ’ɛh dol la ka u zĩ niŋa, yɛ fut ka yam tɛɛ a somma, buraa se’e n da serin tar kolekpãkooŋ la, ka dabɛɛm da kpɛ̃ ba. 16 Niriseba n da be ni ka nyɛ laan iŋ buraa la ni Kurikurinam la da tũ se’el woo n iŋ la pa’al ba. 17 Ba da belim Yezu yi U yim ba zĩ’ĩ la ni. 18 Yezu n da kpɛ̃’ɛ̃t ããruŋ la ni se’em ma’a la, buraa la ka kolekpãbɛ’ɛh dol la da belim Yezu mi yi U bah ka u dol ni U keŋ. 19 Ka Yezu pu sake, ka yel u yii, <<Kulim ti tɔɣɔ pa’al i yiridem ni i zɔnam, Daan la, N zo i nimbɔ̃’ɔ̃g, ka maal i ka i lebig a somma la.>> 20 Buraa la da leb keŋ Dekapolis so’olum ni ti tɔɔn Yezu n iŋ som se’eb te ɔŋ la. La da iŋa pakir te seba woo n da wom yel la la.

21 Yezu n da yak ha ni ããruŋ la, nirikooŋ n da laɣah gilig U mɔɣir la nɔɔrin, 22 Ka buraa n da a yendobil kpɛɛm ka u wo’or bɔɔn Gayirus la tana nyɛ Yezu, lu U tɔɔn, 23 ka belimit taɣahit yet yii, <<m pɔɣɔwɔɔ n bẽ’ẽt yɛ’ kum, yela, kem na zaŋ i nu’ug paɣɛl ka zugu ka ka nyɛ nima’ahum tebuk ka vo’o.>> 24 Yezu da dol u keŋ. Nirikooŋ n da mikit dol U. 25 Bompɔɣɔse’e mi n da be niŋa bẽ’ẽt ka ziim kpa’ahit hali ka la paa wompii ni ayi. 26 U da nyɛ namihug zɔ’ɔ mi tebanam sa’ani, ka saɣam u laɣat zã’ã ka kpelim pu nyɛ tebugo, hali ka u bã’ã la kpelim pa’ahit. 27 Bompɔk la n da wom Yezu yel la u da tã U sa’ani na, ka nirib mik zɔ’ɔ berug ka u pɛ̃rig kaa Yezu nya’aŋ nyaŋ kalim U fuug. 28 Ka tar sera sakir yi, <<mam n kalim U fuuga, n nan nyɛ n tebuk.>> 29 Un da kalim fuug la se’em ma’a la ka u ziim la kɛ̃ gɔ’ɔ, ka u baŋ yi u ningbiŋ bã’ã la bahiya ka u nyɛ nimma’ahum. 30 Nila nila ka Yezu baŋ yi paŋ yi U ningbina niŋa tom se’el, ka ŋmɛrig behit nirib la kaagit, ka bɔ’ɔh yii, <<Ɔn n kalim n fuuga?>> 31 Ka U nya’andolib la lebih yel yii <<Nyɛ N nyɛ niriba n zɔ’ɔ mikit se’em ma ka le bɔ’ɔhit yii, <Ɔn n kalim I fuugoo?> >> 32 Ni yelam zã’ã Yezu da sin ka behit kaagit mi yi U baŋ so n tom di la. 33 Bompɔk la mɛŋ n poɣum mi se’el n iŋ u la da tana gbi’it ni dabɛɛm, lu Yezu tɔɔn ka tɔɣɔ u yelemɛŋir la zã’ã. 34 Ka Yezu yel u yii, <<M pɔɣɔwɔɔga, i sera sakir ituk n ke ka i nyɛ nimma’ahum. Kulim ni suma’ahum ka bã’ã la bahiya.>> 35 Ɔŋ n da nan tɔɣɔt la, nirib da yi kpɛ’ɛm la yir na yel U yii, <<I pɔɣɔwɔɔ la kpi ya. Yela zugu, ti nan le ke ka pa’anpa’al la namih u mɛŋ tana ya’a ha?>> 36 Yezu da wom ban yet se’el la ka da yel yendobil kpɛ’ɛm la yii, <<Da zot dabɛɛm, sakim sera ma’a.>> 37 Yezu da pu sak yi so dol U pa’ah Pita, Gemis ni Geon, so n a Gemis sɔ̃ɔ̃g la. 38 Ban da paa yendobil kpɛ’ɛm la yir la, U da nyɛ nirikooŋ n laɣah vuut kaahit ka fabin. 39 Ka Yezu N kpɛ̃ la, U yel ba yii, <<Yibo ka ya kaahira? Bii la pu kpii, u gbihirin.>> 40 Ka ba la’ U. Ka U yel nirib la zã’ã yi ba yi yeŋ, ka dol ni bii la ba’ ni u ma’ ni U mɛŋ nya’andolib la kpɛ̃ bii la n dɔ zĩ’ĩ la. 41 U da gĩ bii la nu’ug ka yel u yii, <<Tali ta kum>> la vɔ̃ɔ̃r a la, <<Bompumbilaa, dɔɔma!>> 42 Nila nila, ka bompuŋ la dɔɔ ken kaagit (u da a la wom piiga ni ayi). Ka la da a pakir tet nirib la. 43 Yezu da yel ba yi ba da ke ka so so wom yel laa, ka ba tem bii la diit ka u di.