1 Ka Yezu yel ba yii, <<yelemɛŋir kam yet ya wa, ya seba zɛ kpela ka kun mak kpii see ka Na’ayen so’olum la n ti paa ya na ni paŋ.>>

2 Dabiha ayoobi n da gaat la, Yezu da zaŋ Pita, Gemis ni Geon do zɔɔr zugu, ka ba be ba ma’a. Ka U ningbiŋ tɛɛ, 3 ka U laɣat lebig pɛɛlig ka so ka teŋa ni nan tɔ’ɔn tɛɛ dii. 4 Ka ba da wol ka Ilaagɛ ni Moozis nɛɛ ba mɛŋ tɔɣɔt ni Yezu. 5 Ka Pita yel Yezu yii, <<Pa’ala, la a somma yi ti be kpela! Bahum ka ti tĩ soɣa te nyɛ, Moozis ni Ilaagɛ.>> 6 Pita da pu mi un nan yel se’ere, dabɛɛm n da sãã ba la zugu. 7 Ka nila nɔɔ ka sangbauŋ tana pĩ ba. Ka nkɔr yit sangbauŋum ni na yet yii, <<Ɔ̃ɔ̃ a la Mam Dawɔɔ, So ka N nɔŋ; Womih mi ni U!>> 8 Nila nila nɔɔ ka ba wol ka pu nyɛ so nii, ka Yezu ma’a.

9 Ban da pana zɛ’ɛl zɔɔr la zugu sigit na la, ka U yel ba yi ba da yel so se’el ka ba nyɛ laa, see ka Asaal Dawɔɔ la n ti vo’o U mɛŋ kum la poŋi. 10 Ka ba serin pu yel so’o ka hali bɔ’ɔhit taaba vo’ogum kum poŋi dɔɔ la gbin. 11 Ka ba da bɔ’ɔh U yii, <<Nan ka pa’alib la yel yii Ilaagɛ nar yi u tã yiiga na?>> 12 U da yel ba yii, <<Ilaagɛ serin nan tã yiiga na bah ka se’el woo leb zɛ’ɛl. La iŋa yela ka la golih yi Asaal Dawɔɔ nan tana nyɛ toog ni kɛɛra? 13 Amaa n yet ya yi Ilaagɛ poɣun tana, ka ba iŋ u bam m bɔɔt se’em, a aa lan poɣun golih se’em la.>>

14 Ban da tã Yezu nya’andolib la sa’ani na la, ba nyɛ ka nirikooŋ kaa ba mum, ka pa’an pa’alib baseba gããt ni ba. 15 Nirikooŋ la zã’ã n da nyɛ U la, dabɛɛm da kpɛ̃ ba mi, ka ba zo keŋ U sa’ani ti po’oh U. 16 U da bɔ’ɔh ba yii, <<Nan zugu ka ya gããt ni ba?>> 17 Nir nkɔ̃ da zɛ’ɛl nirikooŋ la poŋi lebih U yii, <<Pa’ala, Mam tara n dawɔɔ ka sibɛ’ɛh kpɛ̃ u ka u pu tã tɔɣɔra; 18 ka lan ti gbirig u la ni lob u la teŋ, ka u ɔbit u nyina ka natɔ̃pulimpuut yit, ka n yel I nya’andolib la yi ba sa’a sibɛ’ɛga ka ba yel yi ba kun nyaŋe.>> 19 Ka U lebih ba yii, <<Yam seba sera sakir n pɔ’ɔga, saŋa yela ma’a ka Mam nan kpelim be ni ya? Lan zugu ka Mam kpɛ̃’ɛ̃t ni ya wa? Tarin u tã N sa’ani na.>> 20 Ka ba tar buribig la keŋ U sa’ani, sibɛ’ɛ la n nyɛ U la, ka da gbirig bii la mi ti bah teŋ ka natɔ̃pulimpuut yit na ka u bilimit. 21 Yezu da bɔ’ɔh u ba’ la yii, <<Lan pĩ’ĩl it ŋwala wa la wuuga yela?>> Ka u lebih yii, <<Ba n kɔ’ɔm dɔɣɔ u biilimi na. 22 La ni zaŋ u lob buɣum bee kɔ’ɔm poŋi yi la sãɣum u, ka Nyɛ n nan nyaŋ iŋ se’el, Nyɛ n zom ti nimbɔ̃’ɔ̃g ka soŋ ti.>> 23 Yezu da lebih u yii, <<La nan nyaŋ! Se’el woo nan tɔ’ɔn iŋ te seba n tar sera sakir.>> 24 Nila nila ka bii la ba’ kaah buki yel yii, <<N sak ya; soŋum ni m putẽtula wa!>> 25 Ka Yezu N da nyɛ nirikooŋ la n zot kaagit la, U tãh sibɛ’ɛ la yii, <<Nyɛ sibɛ’ɛse’e n bah ka biiga a gaauŋa, yim ka sa’ani na, ka da le leb naa!>> 26 Ka sibɛ’ɛga da kaah suppi ka zɛ̃k bii la fãb teŋ, ka yi ka bah ka ka dɔ saali a aa u kpi mi la, ka nirib da serin tẽ’ẽh yi, <<u kpi mi.>> 27 Ka Yezu da gĩ u nu’ug darig dɔɔ saazug ka u zɛ’ɛl. 28 Yezu N da kpɛ̃ yir la ni la U nya’andolib la da bɔ’ɔh U bããlam yii, <<Lan n so ka tam da pu nyaŋ kar sibɛ’ɛ la?>> 29 Yezu da lebih ba yii, <<Po’ohug ma’a n nan tɔ’ɔn kar bãã wa taab.>>

30 Ba da yi niŋa keŋ dol Galilii gaat. Ka U da pu bɔɔt yi so baŋe; 31 se’el n so la U da pa’an U nya’andolib la mi yet yii, <<Ba nan ti zaŋ Asaal Dawɔɔ la dɔ̃r te nirib ka ba ko’ U, amaa dabiha atã daar, U nan vo’o dɔɔ kum la poŋi.>> 32 Ka U nya’andolib la da pu bɔk se’el ka U yet la ka dabɛɛm mi tar ba yi ba bɔ’ɔh.

33 Ba n da paa Kapanaum teŋ, pana ti be yir poŋi la, U da bɔ’ɔh ba yii, <<Lan ka ya gããrin sɔrin ha la?>> 34 Amaa ba da pu lebihe, se’el n so la ba da gããt yi ba baŋa so n gaat zã’ã ba poŋi. 35 U da zi’in teŋ ka bɔɔl ba pii ni bayi la na ka yel ba yii, <<So n bɔɔt yi u a ya tɔɔngat nar yi u a ntomit te ya zã’ã.>> 36 U pana da ŋwɔk bibil zaŋ pa’ah ba zugu, ka le ŋwɔk ka U nu’uh ni ka yel ba yii, 37 <<So n dɛ’ɛ bii ŋwala Mam wo’or zugu dɛ’ɛga Mam n la, ka so mi n dɛ’ɛ Mam dɛ’ɛga so n tom Mam na la.>>

38 Ka Geon yel U yii, <<Pa’ala, ti nyɛ la so ka u kat sibɛ’ɛh ni I wo’or, ka ti zɛɣirin yi ti gu’ u, se’el n so la u pu pa’ah ti seba n dol I la poŋii.>> 39 Ka Yezu lebih ba yii, <<Da gu’urin u, se’el n so la, so n iŋ se’el somma ni Mam wo’or kun ti tɔ’ɔn tɔɣɔ be’em gɛ̃ɛ̃h Mam. 40 So n pu zaɣah Mam, be ni ti mi. 41 Ka Yelemɛŋir ka N yet ya wa, so n te ya kɔ’ɔm ni ŋman yi ya ŋwũ Mam wo’or zugu nan nyɛ u wɔɔt.

42 Ya so n zaŋ ziir zi bombil so’ yi u dol Mam zugu, Ɔŋ daan ti nar mi yi ba zaŋ kugir lo yɛɛl u nangɔ̃ɔ̃r ka lob u bah mɔɣir poŋi ha. 43 I nu’ug n bah ka i tomit be’em, ŋmaagum ku bah; la a somma yi i kpɛ̃ tensoŋ ni nu’ug kukɔ̃ gaat nyɛ n kpɛ̃ tenzẽ'ẽog buɣum poŋi ni nu’uh siyi, buɣun se’eb n dit ka pu mi kpiŋir la. 44 Zĩ’ĩ ka nzũse’a n dit ya la kun malegun kpii, ka buɣum la mi kun malegun kpiŋe. 45 Ka i nɔbir n bah ka i tomit be’em ŋmaagum di bah, se’el n so la, la a somma yi i kpɛ̃ tensoŋ ni nɔbiyen gaat nyɛ n kpɛ̃ tenzẽ’ẽog ni nɔba ayi. 46 Zĩ’ĩ ka nzũse’a n dit ya la kun malegun kpii, ka buɣum la mi kun malegun kpiŋe. 47 Ka i niuh n bah ka i tomit be’em, kpekum bu bah, la a somma yi i nyɛ Na’ayen tensoŋ so’olum la ni nin-yem gaat nyɛ n kpɛ̃ tenzẽ’ẽog buɣum la ni ni nini ayi. 48 Zĩ’ĩ ka nzũse’a n dit ya la kun malegum kpii, ka buɣum la mi kun malegun kpiŋe. 49 Se’el n so la, nir woo nan ti sɛ̃ u mɛŋ ni yaarum buɣum. 50 Yaarum a somma, amaa bu mahum la n yi, bu nan iŋa yela nyaŋ ka mahum la leb na? Tarin yaarum ya tinsok ka be ni sũma’ahum ni taaba.>>