1 Dabih aŋa la ka nirikooŋ da be ka se’el ka’ ka ba nan dii, ka Yezu da bɔɔl U nya’andolib la yel ba yii, 2 <<Nimbɔ̃’ɔ̃g sãã Mam paa niriba m be ni Mam dabiha atã ka se’el ka’ ka ba nan di wa. 3 Mam n bah ba yi ba kul ni kom ma baseba nan ti ligi sɔr, bam n yi katenzãya na la zugu.>> 4 Ka U nya’andolib la lebih yii, <<La nan iŋa yela ka so nyaŋ diih niribaa wa ni boruboru daɣataporiga niŋa?>> 5 Ka U bɔ’ɔh ba yii, <<Boruboru bale ka ya tara?>> Ka ba lebih yii, <<Bayopoi.>> 6 U da yel nirikooŋ la yi ba zi’inim teŋ, ka U da pana zaŋ boruboru bayopoi la po’oh Na’ayen ka gbɛ̃’ɛ̃h te U nya’andolib la ka yel ba yi ba tɔ̃r nirib la, ka ba da tɔ̃r nirikooŋ la. 7 Ba mi da tar zimbibih bɛ’ɛla wa, ka Un da le po’oh Na’ayen bah ba zugu la, U da le zaŋ ba te U nya’andolib la yi ba tɔ̃r nirib la. 8 Ba da dimi tɛɣɛ ba zã’ã, ka zɔ̃ra la n kpelim la, ba da vaa ba ka ba pɛ’ɛl pe’et tiyopoi. 9 Nirib la da paa nirituha anaahi, ka U da pana bah ba yi ba kul, 10 Ŋwala n da ba’ah la U da do ããruŋ zugu ni U nya’andolib la ka ba da keŋ Dalemanuta teŋ so’olum mi.

11 Farasiinam la da tana gããt ni U, ka yet yii U diŋ dããluŋ n yit tensoŋ poŋi na makit ba. 12 Ka U da iŋ sũ’ũ U sii poŋi ha ka yel yii, <<La iŋa yela ka zomaaŋ kããdem ɛɛt dããluŋo? Yelemɛŋir kam yet ya wa, zomaaŋ kããdem kun nyɛ dããluŋo.>> 13 Ka U da bah ba ka do ããruŋ la ya’ah yak kolik la yakin dee la ha.

14 U nya’andolib la da tam mi ka pu tar boruboru, ka ba da tar la boruboru nkɔ̃ ma’a ããruŋ la zugu. 15 Ka U da kpa’am ba yii, <<Beh mi nii, mi’in Farasiinam dãbin la ni Hɛrɔd dãbin la.>> 16 Ba da yet taaba yii, <<Ti m pu tar boruboru la zugu ka U yet ŋwala wa.>> 17 Ka Yezu N da pana baŋ se’el n it la, U da bɔ’ɔh ba yii, <<Lan n so ka ya tɔɣɔt yi boruboru ka’a? Yam kpelim pu bɔk bee lik-kee? Ya sũya ko’omii? 18 Ya tar la nini ka kɔŋ yi ya nyɛt-taa? Ya tar la toba ka kɔŋ yi ya womiraa? Ya mi pu le tẽraa? 19 Mam n da gbɛ̃’ɛ̃h boruboru banu la te nirib tuha anu la, ya da pĩ’ĩh zɔ̃ra la pɛ’ɛl la pe’et ti le?>> Ka ba lebih U yii, <<pii ni tiyi.>> 20 <<Ka boruboru bayopoi la te nirib tuha anaahi la, zɔ̃ra la da pi’ih pɛ’ɛl la pe’et ti le?>> Ka ba lebih U yii, <<tiyopoi.>> 21 Ka U lebih bɔ’ɔh ba yii, << Ya kpelin nam pu bɔk-kee?>>

22 Ba da tã Batesada na. Nirib baseba da tar burafɔɔ tã U sa’ani na ka ka belimit Yezu yi U zaŋ U nu’ug si’ih u. 23 U da gĩ fɔɔga nu’ug tar u yi teŋ la poŋi nkpeŋ ha ka Un da iŋ U nantɔ̃ɔ̃t sɔ̃ u nini ka zaŋ U nu’uh paɣɛl u zugu ka bɔ’ɔh u yii, <<I nyɛt se’el laa?>> 24 Ka buraa la gɔrig saazugu ka yel yii, <<Mam nyɛ nirib ka ba a aa tiih n ken la.>> 25 Ka Yezu da le zaŋ U nu’uh paɣɛl u nini la zugu ya’ah; ka u da wol zĩĩ, ka u nini la da leb nyɛt, ka u da pana nyɛt se’el woo somma. 26 Ka Yezu da bah u yi u kul, ka yel u yii, <<Da le dolih nirib la sa’ani ha.>>

27 Yezu ni U nya’andolib la da be la ken ni ti paa Kayisari teh n be Filipi teŋ la, ka ba sɔrum zugu ka U da bɔ’ɔh U nya’andolib mɛŋ yii, <<Nirib yet yi Mam a la ɔni?>> 28 Ka ba lebih U yii, <<Geon Baptis, ka seba yet yii, Ilaagɛ, ka seba kpelin yet yi, Na’ayen nɔdɛ’ɛhirib la nkɔ̃.>> 29 Ka U bɔ’ɔh ba yii, <<Ka yam yet yi N a la ɔni?>> Ka Pita lebih U yii, <<Nyɛ N a Fããt la.>> 30 Ka Yezu kpa’am ba yi ba da yel so so Ɔn n a so’o.

31 Ka U da pana pĩ’ĩl pa’an ba yi Asaal Dawɔɔ la nan nyɛ namihug n ka makire, ka kpɛɛnam la ni, malema kpɛɛnam la ni wara pa’alib la zaɣah Mam ka ko’ M ka dabiha atã daar N nan vo’o dɔɔ ya’ah. 32 U da yel ba laa woo ka pu sɔɣɔ se’el se’el la. Ka Pita da tar U leb nkpeŋ ti yel U yii, dee wa kun tɔ’ɔn iŋe. 33 Ka Yezu ŋmɛrig beh U nya’andolib la ka tãh Pita yet yii, <<Sitaana wa, lebum Mam nya’aŋ ha, i pu tar Na’ayen yela i putẽ’ẽr nii, ka i tẽ’ẽhira nirisaal yela.>> 34 Yezu da bɔɔl U nya’andolib la ni nirikooŋ la mi ka yel ba yii, <<Seba n bɔɔt yi ba a Mam nya’andolib nar yi ba zaɣah ba mɛh ka zi ba mpuur-dɔɔt dol Mam. 35 Seba n bɔɔt yi ba gu’ ba vom nan kɔŋ bu, ka seba n kɔŋ ba vom Mam zugu, ni Na’ayen yela la zugu nan gu’ bu. 36 Ka ŋwɔteni ka ba nan nyɛ, bam n nyɛ teŋa laɣat zã’ã ka kɔŋ ba vom? 37 Ba nan zaŋ la nan tɛk ba vom ma zugo? 38 Seba n zot vi ni Mam ni N yelehum ma be’em saŋa wa nirib tɔɔn, Asaal Dawɔɔ la mi nan zot vi ni badem U lebig daar ka U lebit na ni U Ba’ paŋ ni malekasoma la.>>