1 Yezu ni U nya’andolib la n da pɔ̃r Geruzalɛm, paagit Betefage ni Betani, n lɛm ni Olif zɔɔr la, U da tom U nya’andolib la bayi, 2 ka yel ba yii, <<Kemi kpɛ̃ teŋa n be ya tɔɔn ha wa, ka ya n kɔ’ɔn kpɛ̃ ba’ah ya nan nyɛ ka bombil ka so nan pu bã’ã ka; lo zɛ’, lorig mi ka tar na. 3 Ka so’ n bɔ’ɔh ya yii, 'Ya it yela bo?’ ya n yel u yii, <Daan la n bɔɔt, ka U nan tar ka leb kalam na.’ >> 4 Ba da keŋ ya serin te nyɛ ka bombil lo zɛ’ lɛm ni koliŋ pal la nkpeŋ. Ka ba n da lorigit ka la, 5 seba n da zɛ’ niŋa bɔba la da bɔ’ɔh ba yii, <<Ya it la nani, lorigit bombil la?>> 6 Ba da yel ba Yezu N yel se’em la, ka ba bah ka ba lorig keŋ. 7 Ka ba pana tar bombil la na te Yezu ka zaŋ ba fut paɣɛl ka zugu ka U bã’ã. 8 Ka nirib berigu da yarih ba fut sɔr la zugu ka seba ããh kpãlinkpããt vããt yarih sɔrum zugu. 9 Ka seba n da gaat tɔɔn ha la ni seba n da dol U la zã’ã laɣum sakit yii, <<Hozaana!

Zusondaan n a so n tã ti Daan wo’or la zugu na!

10 Zusoŋ n a ti yaab Devit na’am teŋ la n kenna la! Hozaana be tensoŋ na’am yir!>> 11 Ka U pana da kpɛ̃ Geruzalɛm keŋ kpɛ̃ Na’ayen po’ohug doog la ni; ka Un da beh kaa kaa nyɛ se’el woo la, la da ŋwɔɔn ni, ka U da yi keŋ Betani ni U nya’andolib pii ni bayi la.

12 Beog n da kãã ka ba zɛ’ɛl Betani leb na la, Yezu kom n da dumit. 13 Ka Un da gɔrig zugu nyɛ ka nkaŋ a vippi ni vããt la, U da paa tẽ’ẽh yi U nan nyɛ wola ka zugu. Ka Un da paa beh la wola da ka nii, vããt ma’a, la da ka mu’ut saŋa n laa. 14 U da yel tii la yii, <<So kun maalin di nyɛ wa wol ya’aha.>> Ka U nya’andolib la da wom bu.

15 Ba da pana tã Geruzalɛm na. Ka Yezu da kpɛ̃ Na’ayen po’ohug doog la ni kat seba n kɔɔhit la, ni seba n da’at la yihit niŋa, ka tẽbit teebula la ka ba da tar tɛɛhit ligiri la ni koɣih la ka ba da zĩ kɔɔhit nangbana lebihit zɛ’ɛn; 16 U mi da pu sakit ka so ziit se’el dol Na’ayen po’ohug doog la poŋi gat ta 17 U da pa’an yet yii, <<La pu golih dɔ yii,

'Mam yir nan bɔɔna po’ohug yir tet teh waabii’?

Ka yam zaŋ di lebig naɣayifããrih yire.>>

18 Ka malema kpɛɛnam ni gban-mi’irib la n da wom ŋwala la, ba da mɔ’ɔga nini ɛɛt ba n nan iŋ se’em ko’ U, ka dabɛɛm mi lee tar ba nirib la zã’ã n da dɛ’ɛ U pa’alug la. 19 Ka zaanɔɔr n da ma’a la, Yezu ni U nya’andolib la da bah teŋ kaŋ mi ka keŋ.

20 Beogin ka ba da gat la, U nya’andolib la da nyɛ ka nkaŋ la ko’omi ŋmaa tin paa ka nyaɣa ni. 21 Ka Pita tẽẽ ka yel U yii, <<Pa’alaa, beh maa! Nkaŋ la ka I po nɔɔr te la kpi mi.>> 22 Yezu lebih ba yii, <<Tarin sera sakir ni Na’ayen. 23 N yet ya la yelemɛŋir, nyɛ n yel zɔɔra yi, 'dɔɔgum sigi mɔɣɔra ni ha,’ ka pu tar putẽra ayi ayii, ka mɔr sera sakir yi nyɛ n yel se’el la nan iŋ, la serin yi la iŋ mi. 24 Yela la N yet ya yii, Ya n soh se’el ya po’ohug poŋi sak mi sera yi ya poɣun nyɛ di mi, ka di nan a ya den. 25 <<Sanse’e woo ka ya po’ohit, di mi suguru te so woo n gɛ̃ɛ̃h ya se’el, yela ka ya Ba’ M be tensoŋin la mi nan di suguru te ya ni ya yelebe’et la.>> 26 Ka ya m pu dit suguru te taabaa, ya Ba’ n be tensoŋi la mi kum malegun di suguru te yaa.

27 Yezu ni U nya’andolib la da le tã Geruzalɛm na. Ka Un da yɛ kpɛ̃’ɛ̃t Na’ayen po’ohug doog la ni la malema-kpɛɛnam ni gban-mi’irib la ni ba po’ohug doog kpɛɛnam la da tã U sa’ani na, 28 ka bɔ’ɔh U yii, <<Lan kpe’eoŋ ka nyɛ tar tomit yelenyalin ãã zã’ãga? I nyɛ I kpe’eoŋa la yaha tar tomit yel ãã la wa?>> 29 Ka Yezu lebih ba yii, <<N nam bɔ’ɔh ya bɔ’ɔhug kukɔ̃ ka ya lebihum ka M pana yel ya Mam kpe’eoŋ la n zɛ’ɛl zĩ’ĩ na. 30 Geon kɔ’ɔm soo la da zɛ’ɛl la saazugu na bee nirisaal maluŋo? Lebih mi nim.>> 31 Ba da leb ti gããt ni taaba yet yii, <<Ti n yel U yii, 'la zɛ’ɛl la saazugu na,’ U nan yel yii, <La da iŋa yela ka ya pu dɛ’ɛ u nɔɔr la?’ 32 <<Ka ti n yel yii, <La a la nirisaal putẽ’ẽre’?>> Dabɛɛm da tar ba la nirikooŋ la zugu, se’el n so la nir woo da sak ya yii, Geon a la Na’ayen nɔdɛ’ɛhit yelemɛŋir. 33 Yela ka ba lebih Yezu yii, <<Ba pu mi’i,>> Ka Yezu yel ba yii, <<Mam mi kun yel ya kpe’eonse’eog ka N tar tomit la n yi zĩ’ĩ naa.>>