1 Ka beog n da kãhig la, malemadem tɔɔngat la ni malemadem kpɛɛnam la ni teŋ la kpɛɛnam la ni wara pa’alib la zã’ã da laɣɛh zi’in nyɛ taaba. Ba da tɔɣɔ ko nɔɔr yi ba lo Yezu tar ti te Palet. 2 Palet da bɔ’ɔh Yezu yii, <<Nyɛ n a Geudem Na’ab laa?>> ka U lebih yii, <<I yel la yela wa.>>

3 Malemadem tɔɔngatib la da zɛrig Yezu mi ni yela zɔ’ɔ zɔ’ɔ. 4 Yela ka Palet le bɔ’ɔh U yii, <<I ka lebihug nan lebihee? Behum yelese’a zã’ã ka ba tar ziin I waa.>> 5 Ka Yezu da pu lebih yel se’el se’el la, ka la da iŋ Palet pakir.

6 Ba Azɔɔgaat malema daar la n da ni ti paagit, na’ab la da ni wo’oga nir nkɔ̃ ba sãrega doog la ni bah, nirib la mɛŋ mi n ni pa’al nir so ka ba bɔɔt yi u wo’o bah ka u bah u daan. 7 Yela ma’a la, ba nirib mɛŋ baseba n da dɔɔ zabir ni teŋ la kpɛɛnam la ka ba da gbã ba wo sãrega ni, ba nkɔ̃ da a la Barabas. 8 Nirikooŋ la da laɣɛh Palet sa’ani na yet u yi u bah paɣarib la nkɔ̃ a aa ba malema la n pa’al se’em la. 9 Ka u da pana lebih bɔ’ɔh ba yii, <<Ya bɔɔt yi m bah la Geudem Na’ab la te yaa?>> 10 U da mi yi ŋwũũr zugu ka malema kpɛɛnam la da gbã’ã Yezu na te u. 11 Ka malema kpɛɛnam la da pẽẽl nirikooŋ la gãɣat yet Palet yi u bah Barabas te ba. 12 Ka Palet le bɔ’ɔh ba yii, <<Ya pana bɔɔt yi n iŋ Yezu so ka ya bɔɔn yi Geudem Na’ab la la yela?>> 13 Ka ba tãhit lebihit ha yii, <<kpa'am U mpuuredɔɔg zugu!>> 14 Ka Palet leb bɔ’ɔh ba yii, <<La n zugo, U toma toombekoni?>> Ka ba malengin nyirig gaat yela yet yii, <<kpa'am U mpuuredɔɔg zugu!>> 15 Ka Palet n da bɔɔt yi u iŋ se’el n nan pɛɛ nirikooŋ la poo la u da yih Barabas te ba, ka bah ka ba bo’ Yezu ka pana zaŋ U te ba yi ba tar keŋ ti kpa mpuuredɔɔg zugu.

16 Soogɛnam la da tar Yezu kpɛ̃ na’ab la yir ndɔŋi ka bɔɔl ba taab la zã’ã laɣɛh. 17 Ba da pana zaŋ fuzẽ’ẽog yɛɛl U ka zaŋ gɔ̃’ɔ̃h woɣɛ muŋ vugul U zugu. 18 Ba da pana pĩ’ĩl U ẽrigir tɔɔt nɔba po’ohit U ka yet yii, <<Naa, Geudem Na’abaa!>> 19 Ba da ŋmɛ’ɛt U zugu ni dɔɔr ka tobihit nantɔ̃ɔ̃t ma’at U, ka kpã’ãt duna teŋ lut vã’ã vã’ã yi bam na’ahit U mi. 20 Ba n da ẽẽrig U ŋwala ba’ah la, ba da yɛɛ fuzẽ’ẽog la ka ba zaŋ yɛɛl U la mi ka zaŋ U mɛŋ laɣɛt la lebih yɛ U. Ba pana da tar U yi keŋ yi ba ti kpa.

21 Ba n da yɛ ni Yezu la, ba da to’oh la saan ka u kpɛ̃’ɛ̃t teŋ la ni na, ka ba da pẽrig u yi u soŋ Yezu zi U mpuuredɔɔg la. Buraaga wo’or da a la Simɔn n yi Saarin teŋ na ka u biih a Alɛkzanda ni Rufus la. 22 Ba da pana tar Yezu paa zĩse’e m bɔɔn Golegota (di vɔ̃ɔ̃r aa zuŋmalenŋmana teŋ). 23 Ba da zaŋ daam gẽrig ni tiim te Yezu yi U ŋwũ ka U da zaɣah. 24 Ka ba pana kpa U mpuuredɔɔg la zugu ka zaŋ U laɣɛt la ŋmɛ gbaŋa yi ba beh so n nan dɛ’ɛ laɣɛse’eog. 25 La da a la beogin kariha awai ka ba kpa U. 26 Ba da golih Un gɛ̃ɛ̃h wara se’em la label mpuuredɔɔg la yii: <<GEUDEM NA’AB LA.>> 27 Ba mi da laɣun kpa Yezu mi ni naɣayii siyi, kakɔ̃ U dituŋ nu’ug, ka nkɔ̃ U gɔbig. 28 Ka Na’ayen yelesoma la golihug la da pirig nɛɛ poyii yii, <<Ba kããl U pa’ah seba m pu dol wara la.>> 29 Niriseba n da dol niŋa gat la, da behit Yezu ka lobera zut ka yet yii, <<Aa! Nyɛ so n yet yi I nan gbi Na’ayen po’ohug doog la bah ka leb mɛ ku dabiha atã poŋi laa, 30 fããgim I mɛŋ, ka sigi mpuuredɔɔga ni na!>> 31 Yela nɔɔ ka malemadem tɔɔngatib la ni wara pa’an pa’alib la mi da ẽrigit U yet yii, <<U fããra seba bahit, ka kun tɔ’ɔn fãã U meŋa. 32 Bahum ka Fããt la, Izirɛal Na’ab la sigi mpuuredɔɔga zugu nan nan na, niŋa ka ti nan nyɛ ka sak sera.>> Seba ka ba da laɣum kpa ni U la mi da kɛɛrit Yezu mi.

33 La n da ti paa wuntɛɛŋ zugu tinsok la, lik da tana pĩ teŋ la zã’ã gbariti ti paa kariha atã. 34 Ka la n da paa kariha atã la, Yezu da kaah ni nkɔr kpɛ’ɛmir yet yii, <<Iloi, Iloi, Lama Sabatani?>> ka di vɔ̃ɔ̃r a la, <<Mam Na’ayene, Mam Na’ayene, la n zugu ka I bah Mam?>> 35 Seba n da dol niŋa gat ka wom la, da yet taaba yii, <<womih mi nii! U bɔɔna Ilaagɛ.>> 36 Ka ba nkɔ̃ zo keŋ ti iŋ dami’ihug iŋ soosoo niŋa, zaŋ lo dibir ni zɛ̃k ti iŋ Yezu nɔɔrin yi U ŋwũ, ka yet yii, <<Aain ki’i, bah mi ka te beh nyaa Ilaagɛ mɛŋ nan tana tar U sigi naa.>> 37 Ka Yezu kaah suppi ka vo’oh U vo’ohug zã’ã fɛ̃uu ka kpi. 38 Sankaŋ ma’a la, fuse’eog ka ba da zaŋ wul bɔkit Na’ayen po’ohug doog la ãã saazugu ti paa teŋ. 39 Soogɛ-kpɛɛm la n da zɛ niŋa ka nyɛ Yezu n kpi se’em la da yet yii, <<Yelemɛŋir, burakãã wa serin a la Na’ayen Dawɔɔ.>>

40 Bompɔɣɔh mi n da zɛ nkpeŋ ka won se’el woo n da it la ka ba poŋi, Mɛɛri Magedalin ni Mɛɛri so n da a Gemis n a bii la, Gosis ni Salomi nam ma’ la da laɣum be niŋa. 41 Yezu n da be Galilii teŋ la, ba da dol U mi ka soŋit U; ba berigu da dol ni Yezu mi tã Geruzalɛm na.

42 Zaanɔɔr n da ma’agit la ka mi a Na’ayen dabihir la maahuŋ daar ka ayim beogin nan a Na’ayen dabihir la, 43 Geuzɛf n a Aramatiya nir ka mi le a kpɛɛnam la nkɔ̃ la, ka mi da mahum gur Na’ayen so’olum la da iŋ sũkãbir keŋ Palet sa’ani soh yi u bah ka u yak Yezu niŋ la laa. 44 Ka Palet a sɛɣɛliŋu un da wom yi Yezu ta’an kpi mi la; ka u da bɔɔl soogɛnam la nkɔ̃ bɔ’ɔh yi u baŋ nyaa Yezu la serin kpi yaa. 45 Ka un da wom soogɛ la sa’ani yi U kpi ya la, u da te Geuzɛf sɔr yi u tɔ’ɔn yak kum la. 46 Geuzɛf da da’ fugɔbig zaŋ pɔb kum la ka u yak la, laa wɔse’eog ka u poɣun da deŋ tũ dɔ’ɔl la. Ka da bilik sɛtaŋ ligil ku nɔɔr. 47 Mɛɛri Magedalin ni Mɛɛri so n a Gosis ma’ la, da nyɛ ba n da laa kum la zĩ’ĩ.