1 Yezu pana da pĩ’ĩl tar maɣaha maɣahit tet nirib la yet yii, <<Buraa n da se u tiih poog, mɛ nangɔmir kaa ku ti mum, tũ daam kɔ̃k bɔk ku poŋi, mɛ yitoɣoma gɔhuk ku ni, zaŋ gu’ul pogutib, ka keŋ tense’e ha. 2 Ka tiwola la pɔ̃hik saŋa n da paa la, u da tom u da’abir yi u keŋ pogutib la sa’ani ti dɛ’ɛ u tɔ̃t na te u. 3 Ka pogutib la da gba’a da’abir la ŋmɛ, ka sa’ag u ka u leb nuzaalih. 4 Ka u le tom da’abir dikɔ̃, ka ba gba’a ɔŋ mi ŋmɛ u zugu ka yaal u. 5 Ka u le tom ba nkɔ̃, ka ba gĩ u kɔ’ɔn ŋmɛ ko’. Ba n iŋ da’abseba woo ka u tom la se’em a la, ba ŋmɛ baseba mi ka ko’ seba. 6 Ka poog daan la kpelin tar nir nkɔ̃ n a u mɛŋ dawɔba’ar ka u nan tom. Ba’ahug zã’ã la u da tom u ka tẽ’ẽh yii, 'Ba nan na’ahu ɔŋ n a m mɛŋ dawɔɔ la zugu.’ 7 Pogutib la n da nyɛ poog-daan dawɔɔ la n kenna la, ba da yel taaba yii, 'So n nan ti tɛɛ so poog la n kenna wa. Kemi na ka ti ko’ u ka laɣat la tɛɛ a tam den.’ 8 Yela ka ba da serin gba’agu ko, ka zaŋ u ningbiŋ la lob bah poog la yeŋ ha. 9 Poog-daan la pana nan iŋ la yela? U nan keŋ ti ko pogutib la ka zaŋ poog la tɛɛ te seba. 10 Ya pu kããl gbauŋ la zĩse’e n yel yii,

'Kugese’er ka mɛtib la zaɣah la, n tɛɛ a ɛ̃ɛ̃bir kugir;’

11 Daan la toomir n da ŋwala, ka ti nyɛ ka di a yelepakir tet ti’?>> 12 Ba n da baŋ yi U mak maɣahir la gɛ̃ɛ̃h la bam la, ba da bɔɔt yi ba gbã’ã U mi, ka dabɛɛm n da tar ba nirikooŋ la zugu. Ka ba da bah U ka keŋ.

13 Ka ba tom Farasiinam ni Hɛrɔd kpɛ’ɛnam Yezu sa’ani na yi ba bɛ̃r U ni Un tɔɣɔt se’em la. 14 Ka ba tana yel U yii, <<Pa’alaa, ti mi yi Nyɛ a la yelemɛŋir daan, ka mi pu yelehit niriba, se’el n so la I pu gãhit niriba, ka I pa’an Na’ayen sɔr la dola yelemɛŋir. La tar sɔr yi ti wɔɔt lempoo tet Siiza bee ti da wɔɔt tet u? 15 Ti wɔm bee ti da wɔɔra?>> Ka Yezu n da baŋ ba gɔ̃’ɔ̃hug tɔɣum la, U da yel ba yii, <<Yela ka ya makit Mam? Te mi nim laɣakɔ̃bir na ka M beh.>> 16 Ka ba tar laɣakɔ̃bir na, ka U bɔ’ɔh ba yii, <<Ɔn zugu foto ni u wo’or n be ni wa?>> Ka ba lebih yii, <<Na’ab Siiza.>> 17 Ka Yezu yel ba yii, <<Zaŋ mi se’el n a na’ab la bon te u, ka zaŋ se’el mi n a Na’ayen bon te U.>> Ka U lebihug la iŋ ba pakir.

18 Sadusidem seba n pu sak yi nir n kpi u nan vo’o dɔɔ kum poŋi la, n da tã Yezu sa’ani na bɔ’ɔh U yii, 19 <<Pa’alaa, Moozis da golih gbauŋ niŋa te ti yi 'buraagin kpi ka ke u pɔɣɔ ka ba mi ka biiga, u sɔ̃ɔ̃g tɔ’ɔn di bompɔk la dɔɣɔ biih te u.’ 20 Buraah siyopoi n a sɔ̃ɔ̃t n da be, ka kpɛɛm la di pɔɣɔ, ka ka pu dɔɣɛ ka u kpi. 21 Ka u yebese’e n dol u nya’aŋ la tɛɛ di pɔkɔ̃ɔ̃r la, mi kpi ka pu dɔɣɔ ni kaa, ka so n taɣel butã la mi iŋ yela. 22 Sɔ̃ɔ̃t tiyopoi la zã’ã da di bompɔk la mi, ka ba so da pu mak dɔɣɔ ni kaa. Ka la ti paa sanse’e ka bompɔk la mi kpi. 23 Kum vo’ogir daar la n ti paa, ba ɔn n nan so bompɔk la? Se’el n so la ba zã’ã da di ka mi.>>

24 Ka Yezu da yel ba yii, <<La ka ŋwala n pa’al yi ya tuu mi ka pu mi Na’ayen toolum gbauŋ la bee Na’ayen paŋa? 25 Se’el n so la, nirib n ti vo’o ba kum poŋi, pɔɣɔdir bee ser ɛl kun ti bee, ba ti a mi aa Na’ayen Malekanam m be saazugu ha se’em la. 26 La n le a la kum vo’ogir la yela, ya pu kããl se’el n be Moozis gbauŋ la ni, dol mɔɔg la n da taa buɣum la. Na’ayen da yel Moozis yii, <Mam a la Ebraham Na’ayen, Aizik Na’ayen ni Gekɔb Na’ayen.> 27 Na’ayen a la seba n vo’ Na’ayen ka ka seba n kpi Na’ayene, Ya ba’ tuu mi.>>

28 Gban-mi’irib la poŋi nkɔ̃ n da vurih lɛm na ka wom ka ba ŋmɛ’ɛt nɔkpɛ’ɛmir ni taaba, ka un da baŋ yi lebihug la ka Yezu da lebih la a somma la, u da le bɔ’ɔh U yii, <<Na’ayen nɔya la poŋi, di den n a yiiga bee gaat ba zã’ãga?>> 29 Ka Yezu lebih yel yii, <<Nɔse’er n gaat zã’ã a la, 'Womih mi somma, Izirɛal dem maa: Daan la n a ti Na’ayen la, a la nkɔ̃la; 30 Nɔŋim i Daan Na’ayen la ni i sũũr zã’ã, ni i sii zã’ã, ni i putẽ’ẽr zã’ã, ni i paŋ zã’ã!’ 31 Se’el n taɣel buyi a la, 'I nɔŋ i taraan a aa nyɛ n nɔŋ i mɛŋ se’em la.’ Nɔdiŋir pu le be gaat ãã la waa.>> 32 Ka gban-mi’irib la yel U yii, <<I tar yelemɛŋir, Pa’alaa; I yel yelemɛŋir yi Na’ayen a la nkɔ̃ la, ka la n ka Ɔŋaa so pu le bee’; 33 ka 'i mi nɔŋ U ni i sũũr zã’ã, ni i baŋir zã’ã, ni i paŋ zã’ã ka nɔŋ i taraan a aa nyɛ n nɔŋ i mɛŋ se’em la, ŋwala a somma gaat nyɛ n koot dun-muma kããbit Na’ayen.>> 34 Yezu n wom ka buraa la lebih tɔɣum la ni yam se’em la, U yel u yii, <<Nyɛ pu zãã ni Na’ayen na’am yir laa.>> Niŋa nya’aŋ nir da pu le sak bɔ’ɔh U se’el la.

35 Yezu N da be Na’ayen po’ohug doog la ni pa’an la, U da bɔ’ɔh yii, <<La nan iŋa yela ka gban-mi’irib la yet yi Fããt la a la Devit dawɔɔga? 36 Devit mɛŋ, dol Vo’ohun Som poŋi da yel yii,

<Daan la da yel mam Daan yii,

<<Zi’inim Mam dituŋ nu’ug bɔba wa,

gur Ma n ti bah ka i dindem dɔ i nɔba ni.>> >

37 Devit mɛŋ bɔɔn U la Daan; ka la nan iŋa yela ka u a U dawɔɔga?>> Ka nirikooŋ la da womihit U ni popeelum.

38 Un da be ni pa’an la, U da yet ba yii, <<Mi’in gban-mi’iriba yel, seba n nɔŋ yi ba yeet fukãra ɛɛt kaagit, ka nirib po’ohit ka na’ahit da’ah poŋi wa, 39 Ka mi nɔŋ ba zĩ tɔɔn kogih zugu po'ohug dot la ni, ni nirizuya zi’inug zĩ’ĩ dɛ’ɛn-kãra zĩ’ĩh. 40 Ba fããra pɔkɔ̃ya laɣat ka po’ohit po’oh-wɔɣa yi nirib nyɛ ba. Ba nan nyɛ sã’ãhese’eog n ka makire.>>

41 Yezu da zĩ mi tɔ teeb pe'eog la n zɛ zĩ’ĩ la yendoog la ni, ka behit nirikooŋ la n tar ligiri ken it ku poŋin la. Bontatib zɔ’ɔ zɔ’ɔ da tar ligiri berug berug ken it pe'eog la ni. 42 Ka U da nyɛ ka pɔkɔ̃ɔ̃r n a nɔŋ-daan paa niŋa zaŋ u laɣakɔ̃ba ayi n nan zem ni sidi nkɔ̃ iŋ niŋa. 43 Ka U pana bɔɔl U nya’andolib la yel ba yii, <<Yelemɛŋir ka N yet ya wa, pɔkɔ̃ɔ̃ra n a nɔŋ-daana n te gaat seba woo n tar ba teeb na iŋ pe'eoga ni wa. 44 Se’el n so la, ba zã’ã yiha se’el bɛ’ɛla ba ligikãra la poŋi tar na te, ka bompɔk ka ni ka nɔŋ la zã’ã, te la se’el ka ka tar, ka te la se’el zã’ã ka ka naan dolihin ni di la.>>