1 Yezu da bah zĩkaŋ ka U nya’andolib la da dol ni U kul U mɛŋ teŋ. 2 La da a la vo’ohug daar, ka Yezu da kpɛ̃ po’ohug dobil la ni ti pĩ’ĩl pa’an, ka la iŋ pakir te seba woo n da wom Un pa’an se’em la. Ka bɔ’ɔhit taaba yii, <<Burakãã la wa nyɛ ŋwala zã’ã la ya? Ka iŋa yela nyɛ yamboo la wa? U iŋa yela mi toonnyalema wa ka tomit a wa! 3 U ka la kampinta la, Mɛɛri biburibig ka u sɔ̃ɔ̃t a Gemis ni Geoses ni Geudas ni Simɔn, u tɔ̃ɔ̃h pu laɣam be ni ti kpelaa?>> Ka zaɣah U ni nsũnyiim. 4 Ka Yezu yel ba yii, <<zĩ’ĩ woo, Na’ayen nɔdɛ’ɛhirib nyɛt na’ahi mi, ka ba mɛŋ teŋ-dem, ni ba mɛŋ nirib ni ba mɛŋ yiridem m pu na’ahit baa.>> 5 U da pu nyaŋ tom toonnyalema niŋa, ka bã’ãnam bɛ’ɛla wa ka U da zaŋ U nu’ug paɣɛl ba zut ka ba nyɛ nimma’ahum. 6 La da iŋ pakir te Yezu ni nirib la n da pu tar sera sakir la.

Ka Yezu da keŋ tembibih se’eh n kpɛ la ti pa’an niŋa. 7 U da bɔɔl U nya’andolib piiga ni bayi la ti sɛɣɛ ba bayi bayi tom, ka te ba kpe’eoŋ n nan nyaŋ kat sibɛ’ɛh. 8 U da yel ba yi ba da tar diiga bee tapɔk bee ligiri bee se’el se’ela, tarin dɔya ma’a. 9 Pir mi taɣara ka yɛ fuug kukɔ̃ kukɔ̃ ma’a. 10 Ka U yel ba yii, <<Yam paa tense’e ka nirib la dɛ’ɛ ya ba yir, been niŋa ka ti yi. 11 Zĩse’e woo ka nirib la pu dɛ’ɛ ya bee womih ya tɔɣum, yan yim ka kpa’ah ya nɔba ntan bah niŋa, lan ka ba nan baŋ yi ba pu iŋ somma.>> 12 Ka nya’andolib la da yi keŋ ti pa’an nirib la yi ba bah ba toombe’et. 13 Ba da kat kolekpãbɛ’ɛh berigu yihit ka tar kpaam sɔ̃ɔ̃t bã’ãnam berigu ka ba nyɛt ba tebuk.

14 Na’ab Hɛrɔd da wom yi Yezu yelesomir la da yerig tenkaŋ la zã’ã. Ka seba da yet yii, <<Geon Baptis n vo’o kum poŋi leb na; yela n so ka U nyaŋ tomit toonnyalema la.>> 15 Seba da yet yii, <<U a la Ilaagɛ.>> Ka seba mi yet yii, <<U a la Na’ayen nɔdɛ’ɛh, a aa nɔdɛ’ɛh seba n da poɣum be daalimi ha la.>> 16 Na’ab Hɛrɔd da wom ãã wa ka yel yii, <<U a la Geon, so ka mam da fik u zugu la, n le vo’o leb na.>> 17 Hɛrɔd mɛŋ da tom buraah ka ba gbã’ã Geon bob u tar keŋ ti wo’, yit la Hɛrɔd n da di u bɛɛr Filip pɔɣɔ Hɛrɔdiyas la zugu. 18 Geon da yel Na’ab Hɛrɔd yii, <<la kih mi yi i di i sɔ̃ɔ̃g pɔɣa.>> 19 Hɛrɔdiyas, Hɛrɔd bɛɛr pɔɣɔ la da zaŋa lan yaa Geon ka bɔɔt yi u ko’ u. 20 Hɛrɔd da zot Geon mi, lan zugo, u da mi yi Geon a la popɛɛl ni kassi daan, den zugu ka u da bah u bããlam ka pu ko’ u wa. Hɛrɔd da ni womihit Geon tɔɣum ka la daamit u mi. Ka ni yela mɛŋ zã’ã u da ni sin ka bɔɔt u tɔɣum la mi. 21 Fɔl n da naam dola Hɛrɔd dɔɣum daar ka u bɔɔl nanam ni soogɛ-kpɛ’ɛnam ni Galilii nirikãra na yi ba dɛ’ɛm ka di. 22 Niŋa ka Hɛrɔdiyas bibompuŋ tana wa’ wa’a n ke ka Hɛrɔd ni saam la sũya ma’a. Ka Na’ab la yel bompuŋ la yii, <<Yelim nyɛ sũũr n bɔɔt se’el ka n nan te i.>> 23 Hali ka po’ nɔɔr te bompuŋ la yii, <<se’el woo ka i bɔɔt n nan te i hali ni lan poɣun a yi n porig n na’am so’olum ma nzemiri te i.>> 24 Ka bompuŋ la yi yeŋ bɔ’ɔh u ma’ yii, <<N nan yel yi bo?>> Ka u ma’ la lebih yii, <<Yelim yi i bɔɔra Geon Baptis zugu.>> 25 Ka bompuŋ la zo kpɛ̃ yel na’ab la yii, <<Mam bɔɔt yi i zaŋa Geon Baptis zugu iŋ laa ni te mam nan-nan na.>> 26 Ka na’ab la sũũr da sa’am zɔ’ɔ, ka un po’ nɔɔr saam tɔɔn la zugu u kun zaɣah bompuŋ la m bɔɔt se’el laa. 27 U pana da tom soogɛ yi u keŋ tar Geon Baptis zugu na. Ka u keŋ ban wo’ u zĩ’ĩ la ti fik u zugu na. 28 Ka u Zaŋ zugu la iŋ laa poŋin tar ti te bompuŋ la, ka u dɛ’ɛ ti te u ma’. 29 U nya’andolib la n da wom di la ba da keŋ ti zaŋ u ningbiŋ la mi ti laa.

30 Yezu nya’andolib la da leb U sa’ani na, ka yel U bam n tom toonse’a, ka pa’al nirib se’em. 31 Ka U yel ba yii, <<Kemi na ka ti keŋ zĩse’e n a suramm ka ya vo’oh bɛ’ɛla.>> Nirib n da ba’ ken ka lebit ka ba pu nyɛt saŋa nan vo’oh bee di diire. 32 Ba da kpɛ̃ ããruŋ niŋa keŋ zĩse’e n a suramm. 33 Nirikooŋ da nyɛ ban yɛ’, ka baŋ ban a seba ka mi keŋ nɔba kalam kalam deŋ paa Yezu ni U nirib la yiiga. 34 Ka Yezu n da paa sigi ããruŋ la ni ka nyɛ nirib la n zɔ’ɔ se’em la, nimbɔ̃’ɔ̃g da gbã’ãgu, ba da ŋmani ni pihi n ka kemira, ka pana da pĩ’ĩl pa’an yela berigu. 35 La da ŋwɔɔn ni ka U nya’andolib la tana yel U yii, <<kpela a la sɛ̃k, ka la mi ŋwɔɔn; 36 ke ka nirib la keŋ tempoŋi ni yɛse’a n be yamma la da dii di.>> 37 Ka Yezu lebih ba yel yii, <<Yam mɛŋ te mi ba se’el ka ba di.>> Ka ba yel U yii, <<Ti yi ti nyɛ ligiri sidi-tuhir ni kɔbisinaahi la ya da’ dii ka la paa ba?>> 38 Ka U lebih bɔ’ɔh ba yii, <<Yam tar la boruboru bale? Ka ba keŋ ti beh ka leb na yel yii, <<Boruboru banu, ni zimi ayi m be.>> 39 Ka Yezu yel U nya’andolib la yi ba ke ka nirib la zi’in mɔma’aha la zugu bɔɣir bɔɣir ka ba tɔ̃r ba. 40 Seba da zĩ la kɔbig kɔbig ka seba zĩ pihinu-nu. 41 Ka Yezu zaŋ boruboru la ni zimi la gɔrig beh Na’ayen zugu po’oh ka gbɛ̃’ɛ̃h te U nya’andolib la yi ba tɔ̃r nirib la, ka zaŋ zimi la mi gbɛ̃’ɛ̃h te ba zã’ã. 42 Ka ba zã’ã di tɛɣɛ. 43 Ka U nya’andolib la vaa boruboru ni zinse’a ka ba di tɛɣɛ ka la kpelim la pɛ’ɛl pe’et piiga ni tiyi. 44 Nirib seba n da di dii la kãl da a la buraah tuha anu.

45 Nila nɔɔ ka Yezu da ke ka U nya’andolib la kpɛ̃ ããruŋ yi ba yak mɔɣir keŋ Betsayida teŋ ka U mɛŋ kpelim yi U keeh nirib la. 46 Un keeh ba bah la U dɔ la zɔɔr zugu yi U po’oh Na’ayen. 47 Zaanɔɔr da ti ma’a ka ããruŋ la keŋ bela mɔɣir la ni ha ka Yezu ma’a n be doon. 48 U da nyɛ ka sambekãt lobit berigu, ka U nya’andolib la pu tã gaat ããruŋ la somma, ka U dɔɔ zɛ’ ken kɔ’ɔm la zugu to’ohit ba beogin wo’oŋ wo’oŋ ka la nam pu nɛɛge. U daa bɔ’ɔt yi U lɔk mi gaat ba ha. 49 Amaa ban da nyɛ U ka U ken kɔ’ɔm la zugu la ba da tẽ’ẽh yi U a la kok, ka te kaahik suram suram; 50 ba zã’ã da nyɛ U, ka amaa dabɛɛm n da sãã ba. Ka U da iŋ kalam tɔɣɔ te ba yel yii, <<Iŋ mi sũkpɛ’ɛmir, ka la a la Mam, da zotin dabɛɛm.>> 51 Ka pana kpɛ̃ ããruŋ la paa ba ka sambeok la gɔ’ɔ kalam. La da a la pakir te ba lan zugu, 52 ba sũya n da digilim la zugu ka ba da pu bɔk boruboru toonnyalema la gbine.

53 Ban da yak mɔɣir la, ba da paaga Genesaret teŋ ka lo ããruŋ la zɛ’ɛl. 54 Ban da yi ããruŋ la ni na la nirib da baŋ Yezu mi kalam, 55 ka zo kalam kalam kaa teŋ la zã’ã zi ba’anam ba sona zut tã ban baŋ Yezu n be zĩ’ĩ la na. 56 Un da ni keŋ zĩ’ĩ, tembibih bee tenkãra, samana ni, bee zĩ’ĩ woo ba zãhit ba’anam dɔ’ɔn na yela hali ni da’ah ni belemit Yezu yi U ya’an poɣun ke ka ba ba’anam la kalim U fuug nɔɔr, ka seba woo n da serin kalim U fuug nɔɔr la nyɛ ba nima’ahum.