8 Ke akpatre, mme nditọ ete mi, eyak esit mbufo ọyọhọ ye mme ñkpọ oro ọfọnde, enyuñ edotde itoro, mme ñkpọ emi edide akpanikọ, enyenede ukpono, enende, esanade, edotde se emade, enyuñ enyenede uku.

2 Ekunam ñkpọ ke edu uwem mbufo nte asañade akababa ye edu uwem mbon ererimbot emi midiọñọke Abasi, edi eyak Abasi ọkpuhọde mbufo oto esit esit ke edikabade esit mbufo ofuri ofuri. Ke ntre ke mbufo edikeme ndifiọk uduak Abasi, se ifọnde ye se inemde Enye esit, ye se ifọnde ima.

13 Ke ntre, ebeñe esit mbufo enim enọ edinam. Eneñede eda, enyuñ ewuk idorenyin mbufo ofuri ofuri ke edidiọñ emi edinọde mbufo ke ini emi ediyararede Jisọs Kraist iwut.

20 Ubọñ enyene Enye emi ekemede ndinam ñkan nte ñnyin ibeñede Enye, mme ndikere mbaña, nte asañade ekekem ye odudu Esie emi anamde utom ke idem ñnyin. 21 Ubọñ enyene Abasi ke ufọk Abasi ye ke Kraist Jisọs, ke kpukpru ini, ke nsinsi nsinsi! Amen.

12 Ikọ Abasi ododu uwem, onyuñ okop odudu. Enye ọsọp akan ofut iso iba ekededi. Enye ekpi kpukpru oduk aka ekesim ebiet emi ukpọñ ye spirit esobode, ye ebiet emi ikek ye ndiaọkpọ esobode. Enye ekpe mme udọñ esit ye mme ekikere esit owo ikpe.

20 Ndien Enye afiak adian do ete, "Edi se iwọrọde owo ke idem esabarede owo. 21 Koro mme ndiọi ekikere emi edide idiọk udọñ, inọ, uwot owo, use eto ke esit owo ewọñọ edi. 22 Ediyom ñkpọ emi enyenede mbon efen ye oburobut ido, ye abiaña ye obukpo ido ye efibe ye iseri ye ntañidem ye mme ndisime ido efen. 23 Kpukpru mme ndiọi ñkpọ emi eto owo ke idem ewọñọ; mmọ edi se isabarede mbufo enyuñ enam mbufo ekudot ndidi eke Abasi."

25 Mmọdo Ami ndọhọ mbufo nte, ekuyak ekikere etimede mbufo ke ntak uwem mbufo, ke se mbufo edidiade, mme se mbufo ediñwọñde, mme ke ntak ikpọkidem mbufo, se mbufo edisinede. Nte uwem ifọnke ikan udia, ikpọkidem ñko ikanke edisine ñkpọ?

7 Ndien ke ebọñde akam ekutiñ mme uwak ikpuikpu ikọ nte mme anam idiọk enamde, koro mmọ ekerede ete ke edikop akam mmimọ ito ke uwak ikọ mmọ.

1 Ke idaha oro, otu owo ama ọtọt onyuñ awak ke mme tọsin, tutu ndusuk owo etọñọ ndidighi mme mmọ eken ke ikpat. Jisọs ama ọwọñọrede ese mme mbet Esie, onyuñ ọdọhọ mmọ ete, "Ekpeme idem ye mme Farisi, ye usuñ nte mmọ edade ebiaña mme owo nte ke mmimọ imọfọn, ke ini mmọ mifọnke. Edi utọ mbubik oro ikemeke ndidibe ke nsinsi. 2 Inyeneke se efukdefuk emi midifuhọkede, mme se edipde, emi midiyarakede. 3 Ikọ kiet ekededi emi mbufo etiñde ke ekim, eyekop ke uñwana. Ndien se ededi emi edọñde nte odu ke esit ubet eyefiori ke enyọñ ọkọm ufọk."

4 "Ntiñ emi nnọ mbufo mme ufan Mi nte, ekufehe mmọ emi ewotde obukidem ndien ikemeke ndinam ñkpọ efen emi ọdiọkde akan ndian do. 5 Edi Ami ñyewut mbufo enye emi mbufo enyenede ndibak. Ebak Enye emi enyenede odudu ndiwot, ñnyuñ mmen ntop nsin ke itie ikañ ndutuhọ. Ih, Ami ndọhọ mbufo nte ebak Enye.

6 Nte owo inyamke akarañ Abasi ition ke anini iba? Kpa ke ntre Abasi ifreke baba kiet ke otu mmọ. 7 Ke akpanikọ, kpa ye idet ibuot mbufo ema ebat kpukpru. Ekufehe ndik, koro mbufo emesọñ urua ekan ediwak akarañ Abasi."

8 "Ami ntiñ emi nnọ mbufo nte, owo ekededi emi ayararede Mi añwaañwa ọnọ mme owo, Eyen owo eyenyuñ ayarade enye uko uko ọnọ mme enjel Abasi. 9 Edi owo ekededi emi akañde Mi ke iso mme owo, ñyenyuñ ñkañ enye ke iso mme Asañautom Abasi (enjel). 10 Ndien owo ekededi emi editiñde ikọ idian Eyen Owo eyefen enọ enye, edi owo ekededi emi edisabarede Edisana Spirit, idifenke inọ enye."

11 "Ke ini edade mbufo eka ikpe ke iso mme ikpọ ada idaha ukara mme Ju, ye mme ada ibuot ke ufọk akam, ekukere ebaña se mbufo editiñde. 12 Koro Edisana Spirit Abasi eyeteme mbufo se editiñde ke utọ ini oro."

13 Ntem ke owo kiet ke otu mme owo oro okokot Enye ete, "Andikpep dọhọ eyen eka mi abaharede inyene ete ñnyin ye ami."

14 Edi Jisọs ama ọbọrọ enye ete, "Ufan anie ekenim Mi ebiere ikpe ke ufọt mbufo?" 15 Do ndien ke Enye ọkọdọhọ mmọ ete, "Ekpeme! Ekara idem mbufo ebaña kpukpru oruk idiọk itọñ, koro idem ata uwem owo itoho ke uwak inyene emi enye enyenede, enye ekpenyene inyene uwak nte ededi."

16 Ndien Enye ama ọnọ mmọ mbuk emi: "Isọñ enyene ñkpọ owo kiet ama osioño ata ediwak mfri. 17 Enye ama ọtọñọ ndikere ke esit esie, ete, ‘Ami ndinam didie? Ami ñnyeneke itie ndinim mme mbuñwum iñwañ mi.’ " 18 Ndien ke akpatre enye ama ebiere ete, emi edi se ñnyenede ndinam. Ami ñyewuri mme ufọk ubon udia mi ndien ntọñọ ntak mbọp se ikponde, ndien ami ñyedọñ mme mbuñwum iñwañ mi ye mme inyene mi do. 19 Ndien ñyesuhọde ntie, ñnyuñ ndọhọ idem mi nte, "Afo emenyene ediwak nti ñkpọ emi afo etimde obon ọnọ ediwak isua: Dia uwem suñ; dia, ta, ñwọñ nyuñ nem idem fo esit."

20 Edi Abasi ama ọdọhọ enye ete, "Afo ndisime owo! Kpa ke okoneyo emi ñyebọ fi uwem fo. Ndien anie edinyene se afo eketimde onim ọnọ idem fo?"

21 "Emi edi se iditibede ye owo kiet ekededi emi ọkọde inyene onim ọnọ idem esie, edi iforoke ke ñkañ Abasi." 22 Do ke Jisọs ọkọdọhọ mme mbet Esie ete, "Ntem ke Ami ndọhọ mbufo nte, yak mbufo ekufina idem mbufo ebaña uwem mbufo, kabaña se mbufo edidiade, mme se mbufo edisinede, 23 koro uwem okpon akan udia, ikpọkidem ñko okpon akan ọfọñ. 24 Kere baña mme utere, mmọ itọhọtọ, inyuñ idọkke, inyuñ inyeneke itie ubon udia, edi Abasi ọbọk mmọ. Ndien mbufo emesọñ urua ekan mme inuen.

25 Anie ke otu mbufo ke edifina idem esie ekeme ndidian ini ñkanika kiet ke ini uwem esie? 26 Adaña nte mbufo mikemeke ndinam ñkpọ emi ekpride ntem ntak emi mbufo efinade idem mbufo ebaña mme ñkpọ eken-e?"

27 "Ekere ebaña nte ekpọñidim ekọride. Mmọ inamke utom inyuñ ifiakke ndidi. Edi, Ami ntiñ emi nnọ mbufo, nte, kpa ye edidem Sọlọmọn ke kpukpru ubọñ ye uyai esie, ikesineke se iyede nte ekpoñidim. 28 Edieke emi edide usuñ nte Abasi adade esine mbiet iñwañ usine ñkpọ, mbiet emi odude uwem mfin, ndien ñkpọñ emen etop esin ke ikañ, adaña didie ke Enye edisine mbufo ọfọñ, O mbufo mbon ñkpri mbuọtidem! 29 Ndien ekukere ebaña udia mme se ediñwọñde; ekuyak mme ñkpọ emi etimede mbufo esit. 30 Koro mbon ererimbot emi minimke Abasi ke akpanikọ ediọk itọñ ebaña mme ñkpọ ntem, ndien Ete mbufo ọfiọk ete, ana mbufo enyene mme ñkpọ emi. 31 Edi eyom Obio Ubọñ Esie ndien eyedian kpukpru ñkpọ emi enọ mbufo ñko."

32 "Ekufehe ndik, ekpri otu erọñ, koro edi inemesit Ete mbufo ndinọ mbufo Obio Ubọñ. 33 Enyam kpukpru se enyenede enyuñ eda enọ mmọ emi minyeneke. Enọ idem mbufo mme ekpat okuk emi miditahake, inyene ke enyọñ emi midikureke, ke ebiet emi baba inọ ndomokiet misañake ikpere, utañkpọ ñkọ midibiatke. 34 Koro ebiet emi inyene mbufo odude, ebiet oro ke esit ye ekikere mbufo enyene ndidu ñko."

35 "Ebọp ọfọñ mbufo ke isin ọsọñ, ebeñe idem utom, enyuñ enam utueneikañ mbufo akaka iso ndisak. 36 Kpa nte mme owo ebetde eteufọk mmọ ọnyọñ usọrọ ndọ edi, man ke ini enye edikọñde usuñ mmọ ekpekeme ndisọp nsio usuñ nnọ enye.

37 Eyefọn ye mme nditọ ufọk emi eteufọk mmọ edisimde mmọ nte edude ke ukpeme ke ini enye ọnyọñde edi. Ami ntiñ akpanikọ nnọ mbufo, enye eyetim idem esie ndikama mmọ, enye eyenam mmọ etie ke okpokoro ndien enye eyedeme udia ọnọ mmọ.

38 Eyefọn ye nditọ ufọk emi eteufọk mmọ edisimde mmọ ke mbeñeidem, ekpededi enye edisim ke ñkanika usukkiet okoneyo mme ke ufọt okoneyo.

39 Edi efiọk ntem, ete, edieke enyene ufọk ọkpọdiọñọde ini ñkanika emi inọ edidide, enye ikpeyakke ebuñ ufọk esie eduk. 40 Ntre, mbufo ñko enyene ndidu ke mbeñeidem kpukpru ini, koro Eyen Owo eyedi ke ini ñkanika emi mbufo mikekereke ite ke eyedi ntre."

41 Pita ama obup, ete, "Nte Afo obuk mbuk emi ọnọ ñnyin ikpọñ ikpọñ mme obuk ọnọ kpukpru owo?"

42 Ndien Ọbọñ ama ọbọrọ enye ete, "Anie ndien edi akama ukpọhọde emi enyenede mbuọtidem, onyuñ enyenede eti ibuot emi eteufọk ọnọde enye ubiọñ edibọk nditọ ufọk esie eken, ke edinọ mmọ udeme udia mmọ ke eti ini? 43 Eyefọn ye eyen ufọk oro ke ini eteufọk esie ọnyọñde edisim enye nte akade iso ndinam ntre. 44 Ami ntiñ akpanikọ nnọ mbufo nte ke eteufọk esie eyeyak ubiọñ kpukpru inyene esie ọnọ enye.

45 Edi, edieke eyen ufọk oro ọtọñọde ndikere ke esit esie ete, Ete ufọk mi eyebighi ndinyọñ ndi, ndien enye ọtọñọ ndimia mme nditọ ufọk eteufọk esie iban ye iren eken, ñnyuñ ññwọñ ñnyuñ ñkpa mmin, 46 Eteufọk akama ukpọhọde oro eyenyọñ edi ke ini emi enye mikedorike enyin ibaña edinyọñ ndi eteufọk esie, ke ini ñkanika emi enye midiọñọke. Enye eyekpok enye idem ke ikpa onyuñ ọnọ enye itie ke otu mme mmọ emi minimke Abasi ke akpanikọ." 47 Eyen ufọk emi ọdiọñọde uduak eteufọk esie, onyuñ etre ndidu ke mbeñeidem, ndinam se eteufọk esie oyomde enye anam, eyemia enye ediwak ubọk ikpa.

48 "Edi owo emi midiọñọke, ndien enye anam se idotde ufen, eyemia enye esisit ubọk ikpa. Eyom ediwak eto ke ubọk owo emi enọde ediwak, ndien enye emi enọde ubiọñ ediwak ñkpọ, eyeyom enye ọnọ ediwak ibat."

49 "Ami ñkedi ndisin ikañ ke ererimbot ndien ọdọñ Mi didie ndikut nte ikañ emi asakde! 50 Enyene babtisim emi Ami ñnyenede ndina, ndien esit mi odu ke mfina tutu Ami nna babtisim oro mma.

51 Nte mbufo ekere ete ke Ami ndi ndisin emem ke isọñ? Baba! Ami ndọhọ mbufo nte, idighe emem, edi ubahade. 52 Ọtọñọde ke emi tutu aka iso, ufọk emi edide owo ition, eyebahade idem eda ita eñwana ye iba, iba eñwana ye ita.

53 Mme ete eyebahade eda eñwana ye nditọ iren, mme nditọ iren ñko eyeda eñwana ye mme ete, mme eka eyeñwana ye mme nditọ iban, nditọ iban ñko eyeñwana ye mme eka. Mme eka ebe eyeñwana ye iban eyen. Mme iban eyen eyebahade eda eñwana ye mme eka ebe."

54 Jisọs ama ọdọhọ otu owo ete, ke ini mbufo ekutde obubit enyọñ obohode ke edem usoputin, ndo ndo oro mbufo ekere ete ke edim ọmọñ edep, ndien onyuñ edi ntre.

55 Ndien ke ini ofum usuk ofumede, mbufo edọhọ ete, ke ebiet eyefiop, ndien edi ntre. 56 Mbon mbubik! Mbufo emekeme ndise isọñ ye ikpa enyọñ ndien etiñ se ọwọrọde, nsidi ntak ndien mbufo mikemeke ndifiọk se mme idiọñọ ini emi ewọrọde? 57 "Nsidi ntak mbufo mikpehe ke idem mbufo ibiere se ifọnde mbufo ndinam?

58 Edieke owo okotde mbufo ikpe ke esop, edomo ofuri ukeme mbufo ndikpe emem mbiere ye enye ke usuñ, mbak enye edida mbufo ọwọrọ iso ekpe ikpe emi ediyakde mbufo inọ mme ekpeme mbet, ndien mme ekpeme mbet esin mbufo ke ufọk ñkpọkọbi.

59 Ami ndọhọ mbufo nte, ke mbufo idiwọrọke tutu mbufo ekpe kpukpru okuk emi anade mbufo ekpe."

3 Ndien ke ntak utibe enọ emi Abasi ọnọde mi, ami ndọhọ kpukpru mbufo nte: Ekukut idem mbufo ekan nte ekpedide. Edi ekam enyene mfarakeidem nte asañade ekekem ye udomo mbuọtidem emi Abasi ọnọde mbufo.

10 Ami mekpe mbufo ubọk nditọ ete ke Enyiñ Ọbọñ ñnyin Jisọs Kraist, nte yak kpukpru mbufo edi kiet ke se mbufo etiñde, man ubahade edidu ke otu mbufo. Ediana ọtọ kiet ke ekikere kiet ye uduak kiet.

11 Anie ke otu owo ọfiọk ekikere owo nte enye ke mibọhọke spirit owo oro esinede enye ke idem? Kpa ke ukem usuñ oro owo ndomokiet idiọñọke, inyuñ ifiọkke ekikere Abasi ke ebede Spirit Abasi.

18 Ekubiaña idem mbufo, edieke owo mbufo ndomokiet ekerede ete ke imọ imọfiọk ñkpọ ke idaha idomo eyo emi, yak enye akabade edi ndisime, man otodo enye ekpenyene ata ifiọk.