1 Yak ntiñ nnọ mbufo mbaña, ọkpọsọñ utom emi nnamde kabaña mbufo, ye mme mmọ emi edude ke Laodisia, ye kpukpru mme mmọ emi midiọñọke mi iso ye iso. 2 Ami nnam ntre man esit mmọ ọyọhọ ye uko, ñko man eduri mmọ edian ọtọ kiet ke ima, enyuñ enyene ifiọk ebaña utibe iwuk emi otode ke ata ifiọk. Ke ntre mmọ ekpediọñọ Abasi, emi edide Kraist ke idem Esie. 3 Enye edi eyen ukpọhọde emi ọkpọhọrede kpukpru mme ndedibe ñkpọuto emi etode ke ikike ye ifiọk Abasi.

4 Ami ntiñ ndien nnọ mbufo nte ekuyak owo ndomokiet abiaña mbufo oto ke nsu nsu eneni, ekpedi eneni emi ọfọn se ọfọfọn. 5 Okposuk edi emi ami mme nduhọ ye mbufo ke ikpọkidem, edi ami ke ndodu ye mbufo ke Spirit, monyuñ ñkop inemesit ndikut ọkpọsọñ iwuk emi mbufo edade ediana ọtọ kiet ke mbuọtidem mbufo ke Kraist. 6 Sia mbufo ema ekenyime Kraist Jisọs nte ọbọñ, ediana kiet ye Enye. 7 Eyak oruñ mbufo ọsuhọde oduk ke Enye, ebọp uwem mbufo ke Enye, enyuñ ekaka iso ndikop nsọñidem ke mbuọtidem mbufo, nte ekekpepde mbufo. Ndien enyuñ eyọhọ ye ekọm.

8 Eneñede ekpeme, ekuyak owo baba kiet omum mbufo nte mbuot ekọñ oto ke ikpuikpu abiaña ifiọk ibuot owo, emi otode ke mme ukpepñkpọ emi mme owo etibide edi, ye eke mme spirit emi ekarade ke ufum enyọñ emi midighe eke Kraist. 9 Koro ọyọhọ ọyọhọ obot Abasi odu ke Kraist, ke idem emana Esie nte owo. 10 Ndien enọ mbufo ọyọhọ uwem ke edidiana kiet ye Enye. Enye edi adaibuot ukara ọnọ kpukpru ukara ye odudu spirit kiet ekededi.

11 Ke edidiana kiet ye Enye ema enim mbufo mbobi, idighe mbobi emi edade ubọk owo enim, edi, edi enyemi Kraist enimde ke idem Esie, emi esinede edikpọk ñyak ke odudu idiọkñkpọ obukidem emi. 12 Koro ke ini emi ekenimde mbufo babtisim, ema ebuk mbufo ye Kraist, ndien ke babtisim ema emenede mbufo ñko ye Kraist oto ke mbuọtidem emi mbufo enyenede ke ọkpọsọñ odudu Abasi, emi ekemenerede Enye osio ke ñkpa.

13 Ama enyene ini emi mbufo ekekpañade ke spirit oto ke mme idiọkñkpọ mbufo, ye ke emi mbufo ekedide mme mbio emi midighe ubon mme Ju emi mikenyeneke ibet. Edi ke emi Abasi ama ada mbufo esin ke uwem ye Kraist, Abasi ama adaha do ọnọ ñnyin ke kpukpru mme idiọkñkpọ ñnyin. 14 Enye ama awai ñwed isọn ñnyin emi mikefọnke ye Enye, adian ye mme ibet Esie emi ọkọbọpde ñnyin, onyuñ emen enye efep ofuri ofuri ke edikọñ Enye ke etoñkpa. 15 Ndien ke etoñkpa emi ke Kraist akafak idem Esie osio ke ukara ye mme odudu mme spirit, Enye ama esuene mmọ añwa añwa onyuñ ada mmọ nte mbuot ekọñ ke udim uyọrọ ekọñ edikan Esie.

16 Ke ntem ekuyak owo ndomokiet anam mme ibet abaña se mbufo ediade mme se eñwọñde, mme abañade mme edisana usen, mme usọrọ obufa ọfiọñ, mme Satide. 17 Kpukpru mme ñkpọ emi edi mme mbukpọñ ñkpọ emi edide ke iso, idem ata ñkpọ edi Kraist. 18 Ekuyak owo ndomokiet ọsuhọrede mbufo oto koro enye ekerede ete ke imọ imokoñ ikan mbufo oto ke ukeme edikut ñkukut esie, mme onyuñ eyirede abaña nsu nsu nsuhọrede idem ye edituak ibuot nnọ mme enjel. Utọ owo oro ọyọhọ ye ntañidem ke unana ntak, oto ke usuñ emi enye ekerede ñkpọ, 19 onyuñ etrede ndimum Kraist ñkama, emi edide ibuot. Ke idak ukara Kraist ke ofuri idem enyene udia, enyuñ emum Enye ekama ke ndido ye mme osip Esie, onyuñ ọkọri nte Abasi oyomde Enye ọkọri.

20 Mbufo ema ekpa ye Kraist ndien ema ekpọk mbufo eyak ke ukara mme spirit emi edude ke ufum enyọñ. Ntak emi mbufo edude uwem nte mbufo esuk edu ke ererimbot emi-e? Nso idi ntak emi mbufo esukde ibuot enọ mme utọ mbet ntem-e? 21 "Ekutuk emi! Ekutabi oko! Ekutuk enye eken?" 22 Kpukpru mme ñkpọ emi ewọrọ ikpuikpu ye mbiara kadaña emi edade mmọ enam ñkpọ. Mmọ edi mme mbet ye ukpepñkpọ ubọk owo. 23 Ekeme ndidi nte ke ifiọk odu ke mmọ ndinyik mme owo ekpono mme enjel, ye nsuhọde idem emi edide abiaña, ye mme ñkpọsọñ ufen emi enọde obukidem, edi mmọ inyeneke ufọn ke ndikara udọñitọñ obukidem.