1 Ñwed emi oto Pọl emi edide Ọbọsuru Kraist Jisọs, onyuñ oto eyen eka ñnyin Timoti.

2 Ñwet nnọ ikọt Abasi emi edude ke Kolosia, mmọ emi edide mme nditọ ete emi enamde akpanikọ ye Kraist. Yak Abasi Ete ñnyin ọnọ mbufo mfọn ye emem.

3 Ñnyin inọnọ Abasi ekọm kpukpru ini, emi edide Ete Ọbọñ ñnyin Jisọs Kraist, ke ini emi ñnyin ibọñde akam ibaña mbufo. 4 Koro ñnyin ima ikop ibaña mbuọtidem mbufo ke Kraist Jisọs, ye ima emi mbufo enyenede ebaña kpukpru ikọt Abasi. 5 Ke ini etop akpanikọ Eti Mbuk emi ekesimde mbufo ke akpa ifet, mbufo ema ekop ebaña idorenyin emi enye anyanade ọnọ mbufo. Ke ntre mbuọtidem ye ima mbufo odoro ke se mbufo edoride enyin ebaña emi etimde enim ke Obio Ubọñ Abasi enọ mbufo. 6 Eti Mbuk emi asaña ye mme edidiọñ, ndien onyuñ asuana ọyọhọ ofuri ererimbot, kpa nte ekedide ke otu mbufo ọtọñọde ke ini emi mbufo ekekopde ke akpa utọñ ebaña mfọn Abasi, ndien mbufo edidiọñọ mfọn emi nte edide.

7 Mbufo ekekpep emi eto Epafras, edima nsaña utom ñnyin, emi edide enyemi anamde utom ke akpanikọ ọnọ Kraist ke ntak ñnyin. 8 Enye ama etiñ ọnọ ñnyin abaña ima emi Spirit ama ọkọnọ mbufo. 9 Ke ntak emi ñnyin ke ika iso kpukpru ini ndisin mbufo ke akam, tọñọ nte ñnyin ikokop ibaña mbufo. Ñnyin ibeñe Abasi ọyọhọ mbufo ye ifiọk emi abañade uduak Esie, ye kpukpru ikike, ye ediyarade emi Spirit Esie ọnọde. 10 Ke ntre ke mbufo edikeme ndidu uwem nte Ọbọñ oyomde, enyuñ enam se inemde Enye esit kpukpru ini. Uwem mbufo ọyọyọhọ ye kpukpru nti mfri ke edinam kpukpru nti utom, ndien mbufo eyekọri ke ifiọk emi abañade Abasi.

11 Abasi akpakam anam mbufo ekop odudu eto ke odudu emi otode ke ñkoññkan odudu Esie, man otodo mbufo ekpekeme ndiyọ kpukpru ñkpọ ke ime. 12 Ndien enyuñ enọ Ete emi akanamde mbufo edot ndinyene udeme ke se Abasi ọkọsuhọde ọnọ ikọt Esie ke Obio Ubọñ uñwana Esie ekọm ke esit idara. 13 Enye ama afak ñnyin osio ke odudu ekim, onyuñ ada ñnyin ke ifure edisin ke Obio Ubọñ edima Eyen Esie, 14 emi otode ke Enye enam ñnyin ibọhọ, oro edi, edifen mme idiọkñkpọ ñnyin.

15 Kraist edi nsioñwut mbiet Abasi emi ñnyin mikwe ke enyin. Enye edi akpa Eyen eren, emi akande kpukpru mme ñkpọ emi ekebotde. 16 Ekedi ke Enye ke Abasi okobot kpukpru ñkpọ ke Obio Ubọñ Abasi ye ke isọñ, se owo ekutde ke enyin ye se owo mikwe, ye mme odudu spirit, mbọñ, mme akara ukara, ye mme odudu ukara. Abasi okobot enyọñ ye isọñ oto ke Enye, onyuñ ọnọ Enye. 17 Enye ama ododu mbemiso ñkpọ ndomokiet ododu, ndien ke edidiana kiet ye Enye kpukpru ñkpọ ada mme nnen nnen itie mmọ. 18 Enye edi ibuot ikpọkidem Esie, emi edide ufọk Abasi; Enye edi ebiet emi uwem otode oduk ikpọkidem emi; Enye edi akpa Eyen eren, emi ekemenerede ke ñkpa, man otodo Enye ikpọñ ikpọñ ekpenyene akpa itie ke kpukpru ñkpọ. 19 Ekedi ke ñkpembiere Abasi ke Eyen ekenyene ọyọhọ obot Abasi ke idem Esie.

20 Ke Eyen ndien, ke Abasi ekebiere ndida ofuri ererimbot mfiak nnọ idem Esie. Abasi akada ñkpa Eyen Esie ke Krọs anam emem, ndien afiak ada kpukpru ñkpọ ọnọ idem Esie, mi ke isọñ ye ko ke Obio Ubọñ Abasi. 21 Ama enyene ini emi mbufo ekedade nsan nsan ye Abasi, ekenyuñ edi mme asua Esie, ke ntak mme idiọkñkpọ emi mbufo ekenamde, ekenyuñ ekerede. 22 Edi ke emi, ke ntak ñkpa obukidem emi Eyen Esie akakpade, Abasi akabade anam mbufo edi mme ufan Esie, man otodo Enye ada mbufo ke edisana, ke mfọn-mma idaha, ye ke idak unana ndudue, oduk iso Esie. 23 Ana mbufo ekaka iso ke akpanikọ ke edida ke itiat idakisọñ emi ọsọñde idem onyuñ enyenede iwuk, ndien ekuyak enyeñe mbufo edorode ke idorenyin emi mbufo ekenyenede ke ini emi mbufo ekekopde Eti Mbuk uwọrọ ufin emi. Edi ke ntak Eti Etop emi ke ami Pọl, ñkabade ndi asañautom Eti Etop emi ekwọrọde enọ kpukpru owo ke ofuri ererimbot.

24 Ndien ke emi ami madara ke mme ukut emi ami ñkutde ke ntak mbufo. Koro oto ke mme ukut emi ami ñkutde ke ikpọkidem ke ami ññwana ndinam se ikọsuhọde ke ukut Kraist ọyọhọ kabaña ikpọkidem Esie, emi edide ufọk Abasi.

25 Ndien edi Abasi anam mi ndi asañautom Ufọk Abasi, onyuñ ọnọ mi ubiọñ emi ke ufọn mbufo. Edi ubiọñ edisuan Eti Etop Esie ọyọhọ ọyọhọ, 26 emi edide ndedibe ñkpọ emi Enye ekedipde ubon owo toto ke mme emana edem emi ekebede, ndien ke emi Enye ayarade ọnọ mme ikọt Esie. 27 Ubonñkpọ Abasi edi emi: ndiyarade mme ndibe ñkpọ Esie nnọ mme ikọt Esie, ndibe ñkpọ emi ọyọhọde ye uko ye ubọñ emi Enye enyenede ọnọ kpukpru owo. Ndien ndibe ñkpọ oro edi emi: Kraist odu mbufo ke idem, emi ọwọrọ ete ke mbufo eyebuana ke ubọñ Abasi.

28 Ke ntem, ñnyin ikwọrọ Kraist inọ kpukpru owo. Ñnyin iduri utọñ, inyuñ ikpep kpukpru owo, ke kpukpru ifiọk, man otodo ikpeda owo kiet kiet iduk iso Abasi, nte mme mmọ emi eyọhọde ye ifiọk Abasi, enyuñ edianade kiet ye Kraist. 29 Man ñkeme ndinam ñkpọ emi, ami nda akamba odudu emi Kraist ọnọde mi, emi akade iso ndinam utom ke idem mi, nsin ifik ye ñwaidem.