1 Ke ntem, nditọ ete mi, mbufo emi ami mmade eti eti ñnyuñ ñkopde udọñitọñ ndikut, mbufo emi enamde mi ñkop inemesit, mbufo emi ami ndade ntaña ase, esọñ eda ke uwem mbufo ke Ọbọñ.

2 Mbọk mekpe mbufo ubọk, Juodia ye Sintise, nte yak mmọ eñwana nditie ke emem ye kiet eken, nte nditọ ete iban ke Ọbọñ. 3 Ndien mbufo ñko, mme nsaña mi ke mbuọtidem, ñyom mbufo eñwam iban emi, koro mmọ ema enam utom eti eti ye ami ke edisuan Eti Mbuk Obio Ubọñ, ye Klemen, ye kpukpru mme nsañautom mi eken, emi enyiñ mmọ odude ke ñwed Abasi, emi abañade mme odu uwem.

4 Mbufo ekpekam ekop inemesit kpukpru ini ke uwem mbufo ke Ọbọñ: ami ntọñọ ntak ndọhọ nte, Edara! 5 Ewut kpukpru owo ifure ifure uwem. Ọbọñ ñnyin eyedi idibighike. 6 Ekufina idem mbufo kabaña ñkpọ ndomokiet, edi ke kpukpru ñkpọ ebup Abasi se mbufo eyomde ke akam, ebup Enye kpukpru ini ye esit ekọm. 7 Ndien emem Abasi emi ayañade ifiọk owo, eyenam esit ye ekikere mbufo ana suñ-ñ ke edidiana kiet ye Kraist Jisọs.

8 Ke akpatre, mme nditọ ete mi, eyak esit mbufo ọyọhọ ye mme ñkpọ oro ọfọnde, enyuñ edotde itoro, mme ñkpọ emi edide akpanikọ, enyenede ukpono, enende, esanade, edotde se emade, enyuñ enyenede uku. 9 Eda se mbufo ekekpepde, ekenyuñ ebọde eto mi esin ke edinam, ke edinam ye ke ikọ inua mi. Ndien Abasi emi ọnọde ñnyin emem eyedu ye mbufo.

10 Ñkemeke nditiñ akwa idara emi ami ñnyenede ke uwem mi ke Ọbọñ! Ke anyan ini ama ekebe mbufo ema etọñọ ntak enyene ifet ndiwut nte mbufo ekerede ebaña mi. Emi iwutke ete ke mbufo ema etre ndikere mbaña mi, edi mbufo ikenyeneke ifet ndisio ñwut. 11 Ntiñke ntem koro ñkerede nte ke mbufo ema esin mi, koro ami mekpep ndiyuhọ ke se ami ñnyenede. 12 Ami mọdiọñọ se owo ndidu ke unana ọwọrọde, ye se owo ndinyene ñkan se enye oyomde ọwọrọde. Ami ñkekpep ndibe ñkpọ emi man otodo ke ebiet kiet ekededi, ye ke ini ekededi, ami ñkpokop uyuhọ, mme mme dia ñyuhọ mme ntie biọñ, menyene awak akaha mme ọsuhọde akaha. 13 Ami menyene odudu ndisọñọ nda ke kpukpru ini ekededi oto ke odudu emi Kraist ọnọde mi. 14 Edi ama ọfọn eti eti mbufo ndiñwam mi ke ini afanikọñ mi.

15 Mbufo mbon Filipai ke idem mbufo emefiọk etim ọfọn ete ke ini emi ñkọkpọñde Masidonia ke nsio nsio ini emi ami ñkọtọñọde ndikwọrọ Eti Etop emi, mbufo ekedi ñkukure ufọk Abasi emi ekeñwamde mi, edi mbufo ekedi mme mmọ emi ekebuanade ke ntakurua mi ye mme udori mi. 16 Ama ebe ini kiet, ke ini emi ami ñkoyomde uñwam ke Tesalonika, edi mbufo ekenọ uñwam esọk mi. 17 Idighe nte ami nsaña ñyom enọ, edi ami ñyom ndikut nte edoride udori ke ibat utom mbufo.

18 Ami mọbọ ọyọhọ ukpe okuk mme akande oro, emenọ mme unana mi nte odotde, ke emi ami mma ñkọbọ mme enọ emi mbufo ekenọde ke ubọk Epafrọditọs. Emi ebiet edinem ufuọñ ñkpọ emi efọpde enọ Abasi, uwa emi Enye ọbọde ye inemesit. 19 Ndien Abasi mi, ye kpukpru uwak inyene Esie ke Kraist Jisọs eyenọ mbufo kpukpru unana mbufo. 20 Yak Abasi ye Ete ñnyin ọbọ ubọñ ke nsinsi nsinsi. Amen.

21 Ekọm kpukpru ikọt Abasi emi edide inyene Kraist Jisọs. Mme nditọ ete mi ye ami imọnọ ekọm esọk mbufo. 22 Kpukpru ikọt Abasi mi, akpan akpan mme mmọ emi edude ke ufọk ubọñ Sisa edidem mme idut enọ ekọm esọk mbufo. 23 Eyak mfọn Ọbọñ ñnyin Jisọs Kraist odu ye kpukpru mbufo. Amen.