1 Ke akpatre, nditọ ete mi, yak Ọbọñ ọnọ mbufo ọyọhọ idara. Ifinake mi nditọñọ ntak ñwet se mma ñkewewet nnọ mbufo, emi eyedian ifure ọnọ mbufo.

2 Etiñ enyin ekpeme mme mmọ oro enamde idiọkñkpọ, mme ebua oro, mme mmọ emi eyirede ke edinim mbobi. 3 Edi ñnyin, ikam idighe mmọ, ikana ata mbobi, koro ñnyin ituakde ibuot inọ Abasi ke Spirit Esie, inyuñ idara ke uwem ñnyin ke Kraist Jisọs. Ñnyin ibuọtke idem ke utom obukidem.

4 Ami mekeme ye ntak, ndibuọt idem ke mme ñkpọ ntre. Edieke owo ndomokiet ekerede ete ke imọ ikpọbuọt idem ke utom obukidem, ami makam ñnyene ediwak ntak ke ndikere ntre. 5 Ekenim mi mbobi ke ini ami ñkedide eyen urua kiet ke emana. Ami ndi eyen Isrel ke emana, nto ke ubon Benjamin, eyen Hibru ọyọhọ ke iyip. Nte ededi emi etiñde ebaña edinim mbet mme Ju, ami ñkedi Farisi kiet. 6 Ami mma nsin ifik eti eti tutu ami mma nsin ufọk Abasi enyin. Nte ededi emi owo ekekemede ndinen oto ke edinim mme mbet, ami ñkenyeneke ndo.

7 Ndien kpukpru mme ñkpọ oro emi ami ñkabatde nte udori, ami ñyebat mmọ idahaemi nte ntak urua, ke ntak Kraist. 8 Idighe mme ñkpọ oro ikpọñ, ami mbat kpukpru ñkpọ nte ata ntak urua ke ntak ñkpọ emi ọsọñde urua akan, ndidiọñọ Kraist Jisọs Ọbọñ mi. Ke ntak Esie, ami motomo kpukpru ñkpọ nduọñọ, ami ñyese kpukpru ñkpọ nte mbio, man otodo ami ñkeme ndinyene Kraist. 9 Ñnyuñ ndiana ye Enye ofuri ofuri. Ami ñnyeneke aba edinen ido idem mi emi otode ke edinim mbet. Ami ñnyene idahaemi, edinen ido emi enọde eto ke mbuọtidem ke Kraist, edinen ido emi otode Abasi emi eberede ke mbuọtidem. 10 Kpukpru se ami ñyomde edi ami ndidiọñọ Kraist, ñnyuñ ñkut odudu ediset ke ñkpa Esie ke uwem mi, ndibuana ke mme ukut Esie, ñnyuñ ñkpa ñkpa emi ebietde ñkpa Esie, 11 ye idorenyin nte ke eyemenede mi ñko ke idem mi ke ñkpa esin ke uwem.

12 Ami ndọhọke nte ke mekokut unen, mme mọfọfọn mma. Edi ami ñka iso ndiñwana ndibọ enọ emi Kraist Jisọs ama akakan mi ọnọ idem Esie.

13 Ke editim ntiñ nditọ ete, ami ñkereke nte ke mọbọbọ enọ mbuba itọk emi ñnyene, edi ñkpọ kiet emi ami nnamde, edi ami ndifre se ikebede ke edem, ñnyuñ ñnwana ofuri ukeme mi ndisime se inade ke iso. 14 Do, ami mfehe mbine utit mbuba man otodo ami ñkeme ndibọ utib mbuba emi edide ikot emi Abasi okotde mi ke Kraist ọnọ uwem emi odude ke enyọñ.

15 Kpukpru ñnyin emi ima ikọkọri ima ke ñkpọ Spirit, ana inyene utọ ekikere emi. Nte ededi, edieke ekikere mbufo ọkpuhọrede ke ubak ñkpọ, Abasi eyenam ñkpọ emi añwaña mbufo. 16 Nte ededi, eyak ñnyin ikaka iso nditiene mme ubonñkpọ emi ñnyin iketienede tutu esim emi.

17 Eka iso ndikpebe mi, nditọ ete mi. Ñnyin imenim nnen nnen uwutñkpọ inọ mbufo, do, ekpañ utọñ enọ mme mmọ oro etienede mme ukpepñkpọ emi. 18 Ami mma ntetiñ emi nnọ mbufo ediwak ini, ndien ke emi, ami mọtọñọ ntak ntiñ ye mmọñeyet nte mme ediwak owo edu emi ido uwem mmọ anamde mmọ edi mme asua ñkpa Kraist ke Krọs. 19 Mmọ edikọsuñọ ke ikañ nsobo, koro abasi mmọ edide udọñitọñ obukidem mmọ, mmọ etañ idem ke mmọ ekpekopde but ebaña enyuñ ekere ebaña kpasuk mme ñkpọ emi otukde uwem emi, ke ererimbot mi. 20 Ñnyin idi nditọ Akwa Obio Ubọñ Abasi, ndien ñnyin ibet ke ata udọñ ndikut nte Andinyaña, kpa Ọbọñ Jisọs ọsuhọrede oto ke Obio Ubọñ Abasi edi. 21 Enye eyekpuhọde mmemmem ikpọkidem ñnyin emi edikpade, ndien anam mmọ ebiet Esie emi ọyọhọde ye ubọñ. Enye edinam emi ke odudu oro Enye enyenede ndida nduri kpukpru ñkpọ nsin ke idak ukara Esie.