1 Mme Eteufọk, enam ñkpọ ye mme ifin mbufo nte enende ye nte onyuñ ọfọnde. Eti ete ke mbufo ñko emenyene eteufọk ke enyọñ.

2 Esọñọ eyire ke akam, enyuñ ekpeme nte ekade iso ndibọñ akam ye esit ekọm enọ Abasi. 3 Kpa ntre ebọñ akam ñko enọ ñnyin, man Abasi ọkpọnọ ñnyin eti ifet ndikwọrọ Eti Etop Esie, ye ndinyuñ ntiñ mme ndibe ñkpọ Kraist. Koro oro edi ntak emi ami ndude idahaemi ke ufọk ñkpọkọbi. 4 Ebọñ akam ndien, ete yak ami ntiñ ikọ Abasi ke usuñ emi ediñwañade nte anade edi.

5 Enam ñkpọ ye mme mmọ emi minimke Abasi ke akpanikọ ke ifiọk, eda kpukpru ifet emi mbufo enyenede esin ke eti edinam. 6 Ikọ inua mbufo enyene ndinenem ñnyuñ ndi se mme owo edarade, ndien mbufo enyene ndidiọñọ nte enọde kpukpru owo nnen nnen ibọrọ.

7 Edima eyen ete ñnyin Taikikọs, emi edide anamutom ke ofuri esit, ye asañautom ye ami ke utom Ọbọñ, eyenọ mbufo kpukpru mbuk abaña mi. 8 Ntak edi oro ami ndọñde enye nnọ mbufo, ndinọ mbufo inemesit, ke nditiñ nnọ mbufo nte ñkpọ akade iso mi ye ñnyin. 9 Enye asaña ye Onesimọs, edima eyen eka emi anamde akpanikọ, enye emi otode ke otu mbufo. Mmọ eyetiñ enọ mbufo kpukpru se ikade iso mi.

10 Aristakọs, emi odude ke ñkpọkọbi ye ami ọnọ ekọm esọk mbufo, kpa ntre ye Mak, eyen eyen eka Banabas. (Mbufo ema ebọbọ item ebaña enye, ndidara enye edieke enye edide ñkañ mbufo). 11 Josua, emi ekotde Jọstọs, onyuñ ọnọ ekọm; mmọ owo ita emi ikpọñ edi mme Ju emi ekekabarede esit, enyuñ enamde utom ye ami kabaña Obio Ubọñ Abasi, ndien mmọ edi akamba uñwam enọ mi.

12 Epafrasi, owo efen emi otode otu mbufo, onyuñ edide isuñutom Kraist ọnọ ekọm ñko. Enye ọbọñ akam akpan akpan kpukpru ini abaña mbufo, ebeñe Abasi ndinam mbufo esọñọ eda, esọñ idem, enyuñ enyene iwuk ke ndisuk ibuot ofuri nnọ uduak Esie. 13 Ami mekeme nditie ntiense mbaña ọkpọsọñ utom esie kabaña mbufo, ye mbon Laodisia ye lrapolis.

14 Luk edima abiaibọk ñnyin, ye Demas enọ ekọm mmọ esọk mbufo.

15 Ekọm nditọ ete ñnyin ke Laodisia, ye Nimfa, ye ufọk Abasi emi esobode ke ufọk esie. 16 Ke ema ekot ñwed emi ema, ekut ete ke ekot enye ñko ke ufọk Abasi ke Laodisia. Kpa ntre mbufo ñko enyuñ ekot ñwed emi Laodisia edinọde esọk mbufo. 17 Ndien edọhọ Asipọs ete, "Nyene iwuk ndikure utom emi ekenọde fi ke iñwañ utom Abasi."

18 Ami Pọl ñwet ekọm emi ke ubọk mi. Ekufre ñkpọkọbi mi! Yak mfọn Abasi odu ye mbufo.