1 Ke se itukde edidi Ọbọñ ñnyin Jisọs Kraist, ye editañ ñnyin mbok ọtọkiet ye Enye, ami mekpe mbufo ubọk nditọ ete, 2 ekusọp etimerede ekikere mbufo mme ndiyak etimede mbufo ke emi edọhọde ete usen Ọbọñ ama ededi. Ekeme ndidi eketiñ emi ke prọfesi mme ke edikwọrọ ikọ. Mme ekeme-ndinyuñ ndọhọ nte ke ñnyin ikewewet emi ke ñwed. 3 Ekuyak owo ndomokiet ada mbufo anam ndisime ke usuñ baba kiet.

Koro usen oro ididighe tutu akpatre ndutime ada itie, ndien oburobut owo oro ọwọrọ owut idem, emi enimde enye enọ ikañ nsobo. 4 Enye eyefaña onyuñ atuaha ye kpukpru se mme owo ekponode, ye kpukpru mme ñkpri abasi emi mme owo enimde ke edisana. Enye eyemenede idem esie odori okoñ akan mmọ kpukpru, ndien oduk eketie ke esit edisana ebiet ukpono Abasi, onyuñ ọdọhọ ete ke imọ idi Abasi. 5 Nte mbufo itighi? Ami mma ntetiñ mme ñkpọ emi nnọ mbufo ke ini emi ami ñkodude ye mbufo. 6 Edi enyene ñkpọ emi akpande enye nditibe idahaemi, ndien mbufo emefiọk se ñkpọ oro edide. Ke edikem ini ndien, oburobut owo oro eyewọrọ owut idem.

7 Mme ndedibe oburobut ido ema etetọñọ utom, edi se iditibede, iditibeke tutu emen enye emi omumde enye akama efep ke usuñ. 8 Do ndien ke oburobut owo oro ediwọrọ iwut idem, ndien Ọbọñ Jisọs eyewot enye ye ibifik emi ọwọrọde Enye ke inua, ndien onyuñ osobo enye oto ke utibe ediwọrọ ñwut idem Esie, ke Enye ama edi. 9 Oburobut owo oro edidi ye odudu Setan onyuñ anam kpukpru mme utibe ñkpọ ye mme nsu nsu idiọñọ ye mme ñkpọ ñyọ. 10 Ndien eyeda kpukpru mme oruk oburobut abiaña etiene mme mmọ emi editakde. Mmọ editak koro mmọ ikadarake inyuñ ima akpanikọ man otodo enyaña mmọ. 11 Ke ntak emi Abasi ọdọñ odudu ndudue ndinam utom ke idem mmọ man otodo mmọ enim nsu ke akpanikọ. 12 Ibọrọ edi ntem, kpukpru mme mmọ emi mikenimke ke akpanikọ edi enyenede inemesit ke idiọkñkpọ, eyesobo mmọ. 13 Ñnyin inyene ndikọm Abasi kpukpru ini kabaña mbufo, nditọ Ete, mbufo emi Abasi amade. Koro Abasi emek mbufo nte mme mmọ emi enyenede ndibem iso ñnyaña, ke odudu Edisana Spirit, ndinam mbufo ndisana ikọt Abasi, oto ke mbuọtidem emi mbufo ebuọtde ke akpanikọ. 14 Abasi okobot mbufo kabaña emi oto ke Eti Mbuk emi ñnyin ikọkwọrọde inọ mbufo, Enye okokot mbufo edibọ udeme ubọñ Ọbọñ ñnyin Jisọs Kraist.

15 Ke ntre, nditọ ete, esọñọ eda, enyuñ emum akpanikọ oro ñnyin ikekpepde mbufo ke edikọkwọrọ ye ke mme ñwed ñnyin ekama.

16 Ọbọñ ñnyin Jisọs Kraist ke idem Esie, ye Abasi Ete ñnyin, emi akamade ñnyin, ndien ke mbọm Esie ama ọnọ ñnyin nsinsi nsọñidem ye mfọnmma idorenyin, 17 akpakam ọyọhọ esit mbufo ye idọñesit onyuñ anam mbufo esọñ idem ke edinam ye editiñ kpukpru se ifọnde.