1 Ke akpatre, nditọ ete, ebọñ akam ebaña ñnyin, ete yak Etop Ọbọñ aka iso nditara usọp usọp, onyuñ ọbọ ubọñ kpa nte eketibede ke otu mbufo. 2 Ebọñ akam ñko ete Abasi anyaña ñnyin osio ke ubọk mme oburobut ye mme ndiọi owo koro midighe kpukpru owo enim Eti Etop emi ke akpanikọ. 3 Edi Abasi edi anam akpanikọ. Enye eyenam mbufo ekop nsọñidem, onyuñ ekpeme mbufo man oburobut owo oro. 4 Ndien Abasi ọnọ ñnyin idorenyin ke idem mbufo, ñnyin imenyene iwuk ite mbufo ke enam, eyenyuñ eka iso ndinam se ñnyin itiñde inọ mbufo. 5 Abasi akpakam ada esit mbufo usuñ ọkọsuñọ ke ima Abasi ye ime emi Kraist ọnọde.

6 Ke enyiñ Ọbọñ Kraist ñnyin imowuk mbufo, nditọ ete: ediañade nsaña ye kpukpru nditọ ete emi edude uwem ifu, emi mitieneke mme item emi ñnyin ikọnọde mmọ. 7 Mbufo ke idem mbufo emetim efiọk ete ke ana mbufo enam ukem ukem se ñnyin ikanamde: ñnyin ikedighe mbon ifu ke ini emi ñnyin ikodude ye mbufo. 8 Ñnyin ikọbọhọ uñwam ito owo ndomokiet itre ndikpe ñkpọ ke esit. Utu ke oro, ñnyin ikanam utom inyuñ ikut ukut, ke uwemeyo ye ke okoneyo, ñnyin ikaka iso ndinam utom man ñnyin ididi mbiomo inọ owo mbufo ndomokiet. 9 Ñnyin ikanam emi, idighe koro ñnyin mikenyeneke unen ndibup mbufo se ñnyin ikananade, ñnyin ikanam emi ndidi uwutñkpọ nnọ mbufo nditiene. 10 Ke ini emi ñnyin ikodude ye mbufo ñnyin ima itiñ inọ mbufo ite: "Owo ekededi emi miyomke ndinam utom inaha eyak enye adia udia."

11 Ñnyin itiñ emi koro ñnyin imokop ite ke ubak mme owo edu ke otu mbufo emi edude uwem ifu, emi minamke ñkpọ ndomokiet ebe ndisin enyin ke mme mbubehe mme mmọ efen. 12 Ke enyiñ Ọbọñ Jisọs Kraist ñnyin imowuk inyuñ iduri mme mmọ oro utọñ ite: yak mmọ edu uwem eke odotde, enyuñ enam utom enyene se mmọ edade edu uwem. 13 Ama edi mbufo, nditọ ete, mbufo inyeneke ndikpa mba ke edinam eti ñkpọ.

14 Owo ekeme ndidu ke otu mbufo emi midisukke ibuot inọ etop emi ñnyin inọde esọk mbufo ke ñwed emi, edieke edide ntre, etiñ enyin ese utọ owo oro, ekunyene ñkpọ ndomokiet ndinam ye enye, man otodo enye okop but. 15 Edi ekunam ñkpọ ye enye nte owo usua, utu ke oro eduri enye utọñ nte eyen ete. 16 Yak Ọbọñ ke idem Esie, emi edide ebiet emi emem ñnyin otode, ọnọ mbufo emem ke kpukpru ini ye ke kpukpru usuñ, Ọbọñ odu ye kpukpru mbufo. 17 Ami ñwet ñwed emi ke ubọk mi: Ekọm emi oto Pọl. Emi edi usuñ emi nsiwetde enyiñ mi ke kpukpru ñwed mi. 18 Yak mfọn Ọbọñ ñnyin Jisọs Kraist odu ye kpukpru mbufo.