1 Ñwed emi oto Pọl emi edide Ọbọsuru Kraist Jisọs ke idak ubon ñkpọ Abasi Andinyaña ye Kraist Jisọs idorenyin ñnyin.

2 Ñwet nnọ Timoti, ata eyen mi ke mbuọtidem. Abasi Ete ye Kraist Jisọs Ọbọñ ñnyin, akpakam ọnọ fi mfọn, mbọm ye emem.

3 Ami ñyom ọsọñọ etie ke Efisọs, kpa nte ñkenyikde fi ke usuñ edika Masidonia mi. Mme usuk owo do ke ekpep nsu nsu ido ukpono, ndien enyene ndiwuk mmọ etre. 4 Dọhọ mmọ ekpọñ mme utọ mbuk ñke oro, ye ke ñnyan enyiñ mme ete mmọ oro, koro mme ñkpọ emi eda eneni edi, mmọ idaha ubọñ inọ Abasi, emi ediọñọde eto ke mbuọtidem. 5 Ntak ewuhọ emi edi ndidemede ima emi otode ke edisana esit, iñwañ iñwañ esit, ye ata mbuọtidem.

6 Ubak owo efiak edem ekpọñ emi enyuñ esop usuñ eduk ke mme ndisime nneme. 7 Mmọ eyom ndidi mme andikpep ibet Abasi, edi mmọ idiọñọke se mmọ etiñde ebaña, mme idem ikọ inua emi mmọ etiñde uko uko. 8 Ñnyin imọdiọñọ ite ke ibet ọfọn, edieke edade esin ke edinam ke usuñ emi odotde. 9 Ana nte eti emi, nte ke ikanamke ibet inọ mme ndinen owo, edi ekenam enọ mme abiat ibet, ye mme anam idiọkñkpọ, ye mme mmọ emi mibakke Abasi, ye mme mmọ emi esinede ke ufin idiọkñkpọ, ye mme mmọ emi mituakke ibuot inọ Abasi ke Spirit, ye mme mmọ emi ewotde mme ete ye mme eka mmọ, ye mme owot owo, 10 ye mme mbon use, ye mbon mbubiam ido, ye mme mmọ emi eyipde owo enyam, ye mbio nsu, ye mme etie ntiense nsu, mme enamde ñkpọ kiet ekededi efen emi atuahade ye ukpepñkpọ emi edide ata akpanikọ. 11 Ekut ukpepñkpọ oro ke Eti Mbuk, emi ekeyakde esin mi ke ubọk ndifiori nnọ kpukpru owo, Eti Mbuk emi otode ñkoññkan ye mfọnmma Abasi.

12 Ami nnọ Kraist Jisọs Ọbọñ ñnyin ekọm, emi ọnọde mi odudu ndida nnam utom emi. Ñkọm Enye ke ndibat mi nte enyemi odotde ye ndimek mi ndinam ñkpọ nnọ Enye, 13 okposuk edi emi ñketiñde mme ndiọi ikọ mbaña Enye ke ini emi ekebede, ñkonyuñ ñkọbọde ñnyuñ mmiom Enye. Edi Abasi ama enyene mbọm abaña mi, koro ami mmeñkenimke ke akpanikọ anam ami ñkọdiọñọke se ami ñkanamde. 14 Ndien Ọbọñ ñnyin ama añwaña uyọhọ mfọn Esie ọnọ mi mbuọtidem ye ima emi edide eke ñnyin ke edidiana kiet ye Kraist Jisọs.

15 Se etiñde emi edi akpanikọ emi anade nte enyime ke ofuri ofuri usuñ, enyuñ enim ke akpanikọ nte ke: Kraist Jisọs ekedi ke ererimbot ndinyaña mme anamidiọk, ami ndiọk ñkan kpukpru ke otu mmọ. 16 Ndien ekedi ke ntak emi ke Abasi akatua mi mbọm, man otodo Kraist Jisọs okpowut mi ọyọhọ ima Esie, ke edinam Esie ye ami ata oburobut anam idiọkñkpọ, man edi uwutñkpọ ọnọ kpukpru mme mmọ emi edinimde Enye ke akpanikọ ke eyoiso, inyuñ ibọ nsinsi uwem. 17 Ke emi, yak ukpono ye ubọñ enyene nsinsi Edidem Enyemi odude uwem ke nsinsi, emi owo minyuñ ikwe Enye ke enyin, ke nsinsi nsinsi. Amen.

18 Timoti, eyen mi, ami mayak ewuhọ emi nsin fi ke ubọk. Emi asaña ekekem ye ntiñ-nnim uduak Abasi emi eketiñde toto ke ata anyan ini ebaña fi. Yak mme ikọ emi edi ñkpọ ekọñ fo nte afo añwanade eti eñwan emi, 19 ndien sọñọ mum mbuọtidem fo ke edisana esit kama. Ediwak mme owo ikpañke utọñ inọ esit mmọ, ndien ewuri mbuọtidem mmọ. 20 Mme ndidu ke otu mmọ edi: Imeniọs ye Aleksanda emi mmañkayak mmọ nnọ odudu Setan man otodo ekpep mmọ nditre nditiñ idiọk ikọ mbaña Abasi.