1 Ke akpa itie, ndien, ami ndọhọ nte yak enam eseme, ye akam, ye ebeñe, ye ekọm enọ Abasi kabaña kpukpru owo;

2 ebọñ ebaña mme ndidem, ye kpukpru mme mmọ emi edude ke ukara man ikpodu ke ifure ye emem, ke ọyọhọ ndik Abasi ye edinen edu uwem. 3 Emi ọfọn onyuñ enem Abasi Andinyaña esit, 4 emi oyomde nte enyaña kpukpru owo, mmọ enyuñ ediọñọ akpanikọ. 5 Koro edi Abasi kiet odu, kiet kpọt ñko onyuñ odu emi adade Abasi adian ye mme owo ọtọkiet, kpa owo oro Kraist Jisọs, 6 emi ọkọnọde idem Esie ndifak kpukpru owo.

Emi ekedi ediyarade ke ñkem ñkem ini, nte ke Abasi oyom enyaña kpukpru owo, 7 ndien ke ntak emi ke ekedọñ mi nte Ọbọsuru ye andikpep enọ mme mmọ emi midighe mme Ju, ndisuan etop mbuọtidem ye akpanikọ emi. Ami nsuhu nsu; ami ntiñ akpanikọ! 8 Ami ñyom iren ke kpukpru ebiet ebọñ akam, mme iren emi ema ekebahade mmọ enim enọ Abasi ndien mmọ emenerede ubọk mmọ mbiba ke enyọñ ke akam emi minyeneke iyaresit ye eneni. 9 Ami ñko ñyom iban efara ke idem enyuñ enyene eti ibuot ebaña se mmọ esinede, enyuñ ediọñ idem nte ọfọnde; idighe ke edidọk nsio nsio oruk idet, mme ye mme ñkpọ mbanaidem gold, mme eke nsọñurua itiat, mme mme nsọñurua ọfọñidem, 10 edi, edi ye nti edinam, nte ọfọnde ekem ye iban emi enyimede ete ke mmimọ idi nditọ Abasi. 11 Iban enyene ndikpep ñkpọ ke ndobo uyo ye ke kpukpru nsuhọde idem.

12 Ami ñnyimeke iban ndikpep ñkpọ mme ndida ukara ke ibuot irenowo; mmọ enyene nditie suñ. 13 Koro ekebem iso ebot Adam, ndien edibot If. 14 Ndien ikedighe Adam ke ekebiaña, ekedi ñwan ke ekebiaña ndien ekebiat ibet Abasi. 15 Edi eye nyaña iban ke ntak uman eyen edieke mmọ ekade iso ke mbuọtidem, ye ima, ye edisana uwem, ye mfarakeidem.