1 Kusua unọ enye emi ọsọñọde fi ke emana, edi kpekpe ye enye nte enye edi ete fo. Nam ñkpọ ye ñkparawa iren nte nditọ ete fo iren. 2 Mme ikpọ iban nte mme eka fo, ye mme ñkparawa iban nte nditọ iban ke kpukpru edisana uwem.

3 Nọ mme ebekpa emi edide ata ebekpa ukpono. 4 Edi edieke ebekpa enyenede nditọ, mme nditọ nditọ, mmọ enyene ndikpep ndida mbuọtidem mmọ nsin ke edinam ke edise ñkpọ mbaña ufọk mmọ, ke edise ñkpọ mbaña mme eka mmọ ye mme eka eka mmọ, koro emi edi se inemde Abasi esit.

5 Ñwan emi edide ebekpa ke akpanikọ, emi minyeneke owo ndomokiet ndise ñkpọ mbaña enye, emen idorenyin esie odori ke Abasi ndien aka iso ndibọñ akam ñnyuñ mbeñe Abasi uñwam ke okoneyo ye uwemeyo. 6 Edi, ebekpa emi ayakde idem esie ọnọ uwem ibaña ye inemesit ama akpakpa ama okposuk edi emi enye odude ke uwem. 7 Nọ mmọ ewuhọ emi, man owo ndomokiet edinam edue.

8 Edi edieke owo kiet ekededi misehe ñkpọ ibaña mme mmọ emi ebuanade ñkpọ ye enye, akpan akpan, mmọ emi etimde edi ekpuk esie, mbon ufọk esie, enye esin mbuọtidem, ndien itie esie ọdiọk akan enyemi minimke ke akpanikọ.

9 Kusin ebekpa ndomokiet ke udim mme ebekpa tutu enye ebe isua ata ke emana. Ke ndidian do, ana nte enye edi enye emi ọkọdọde ndọ ini kiet ye owo kiet, 10 onyuñ enyene eti itoro nti edinam, ñwan emi akanamde nditọ esie ekọri ke eti usuñ, akadarade mme isen ke ufọk esie, ekeyetde ikpat ikọt Abasi, akañwamde mme mmọ emi ekedude ke mfina, okonyuñ ayakde idem esie ọnọ ke kpukpru nti utom.

11 Edi kusin mme ebekpa emi edide ñkparawa iban ke udim mme ebekpa, koro kadaña ini udọñitọñ mmọ edinyikde mmọ ndidọ ndọ mmọ eyewọñọde ekpọñ Kraist, 12 ndien eyebiom mmọ ikpe ke edibiat akpa eñwọñọ emi mmọ ekenamde enọ Kraist. 13 Ke ebede oro, mmọ eduk ke ido ifu enyuñ eka iso ndisaña ke ufọk ke ufọk; edi se idiọkde diọk ikan oro, edi emi mmọ ekade iso ndikeñ inua ñnyuñ nsin idem ke se mibeheke mmọ, enyuñ eka iso nditiñ ikọ mbaña se mmọ mikpetiñke ikọ ibaña. 14 Ke ntre, ami ñkpama mme ebekpa emi esuk edide ñkparawa iban ekpenyene ndidọ ndọ, mman nditọ, ñnyuñ nse ñkpọ mbaña ufọk mmọ, man mmọ edinọ mme asua ñnyin ifet nditiñ idiọk ikọ mbaña ñnyin. 15 Koro ndusuk mme ebekpa ema efefiak edem etiene Setan.

16 Edi edieke ñwan kiet ekededi emi edide andinim ke akpanikọ ndien enye enyene mme ebekpa ke ekpuk esie, enye enyene ndise ñkpọ mbaña mmọ, inaha enye ayak mbiomo mmọ ọnọ ufọk Abasi, man ufọk Abasi ekeme ndise ñkpọ mbaña mme ebekpa emi edide ikpọñ.

17 Mme mbuot ufọk Abasi emi enamde utom mmọ ọfọn nte mme adausuñ edot ndibọ utib emi odotde, akpan akpan mme mmọ oro enamde ñkpọsọñ utom ke edikwọrọ ikọ ye ke edikpep ñkpọ. 18 Koro ikọ Abasi ọdọhọ ete, "Kubọp inua enañ emi edighide ibokpot", ndien, "koro eyen utom odotde ñkpọ eyen utom esie."

19 Ekukpañ utọñ enọ edori ikọ emi edoride adaidaha ufọk Abasi tutu edi owo iba mme ita eda ntọt oro edi nte mme ntiense. 20 Sua nọ kpukpru mme mmọ emi enamde idiọkñkpọ añwa añwa, man otodo mmọ ekpekop ndik.

21 Ke iso Abasi ye eke Kraist Jisọs, ye eke mme ndisana enjel, ami, ke uteñe Abasi, mokot fi nte yak afo osuk ibuot ọnọ mme item emi okubak owo enyin ke se ededi emi afo anamde. 22 Kuwara ndidori owo ubọk nsin ke utom Ọbọñ. Kubuana ke idiọkñkpọ mme mmọ efen, nim idem fo ke edisana. 23 Kuñwọñ mmọñ ikpọñ ikpọñ, edi ñwọñ esisit wain ke ntak idibi fo, ye ke emi afo osuk ọdọñọde kpukpru ini.

24 Idiọkñkpọ ndusuk owo ana añwa añwa owo ndikut, ndien mme idiọkñkpọ mmọ ebem mmọ iso akada ke itie ikpe, edi mme idiọkñkpọ mme mmọ eken, ekut ke ukperedem ini. 25 Ke ukem usuñ oro ke ekut mme nti ido añwa añwa; ndien kpa ye idem mme mmọ oro miwọrọke añwa añwa, ikemeke ndidibe.