1 Kpukpru mme mmọ emi edide ifin enyene ndikpono mme ete ufin mmọ, man owo baba kiet editiñ idiọk ikọ abaña enyiñ Abasi, ye ukpepñkpọ ñnyin. 2 Mme ifin emi enamde utom enọ mme ete ufin emi edide mme andinim ke akpanikọ, ekunam baba ñkpọ kiet ndisuhọde mmọ ke emi mmọ edide mme nditọ ete mmọ. Utu ke oro, ana mmọ ekam enam ñkpọ enọ mmọ ọfọn akan, koro mme mmọ emi ediade utib utom mmọ edi mme andinim ke akpanikọ emi mmọ emade. Afo enyene ndikpep ñnyuñ ñkwọrọ mme ñkpọ emi. 3 Owo ekededi emi ekpepde ukpuhọde ukpepñkpọ efen, minyuñ inyimeke ye ikọ akpanikọ emi otode Ọbọñ Jisọs Kraist, ye ukpepñkpọ ido ukpono ñnyin, 4 ntañidem ememen enye emen, ndien enye idiọñọke baba ñkpọ kiet. Enye enyene oburobut udọñ ndineni ñnyuñ ntọhọ utọk kabaña mme ikọ, ndien emi ada udu, ubahade, emiom, ye idiọk eyighe edi, 5 ye uyire uyire eneni ke otu mme owo emi esit mmọ ama akabiara, ndien akpanikọ iduhọ mmọ aba ke esit. Mmọ ekere ete ke usuñ ukpono Abasi edi usuñ ndida nnam uforo nnọ idem mmọ.

6 Edi ukpono Abasi ye uyuhọ ke se owo enyenede edi akwa udori. 7 Ñnyin ikada nso idi ke ererimbot? Idaha ñkpọ ndomokiet! Nso ke ñnyin ikeme ndida ñwọrọ ke ererimbot? Idaha ñkpọ ndomokiet! 8 Ke ntem, edieke ñnyin inyenede se ñnyin idiade ye se isinede, oro akpana ekem ñnyin. 9 Edi mme mmọ emi eyomde ndiforo eduọñọ eduk ke idomo, ndien afia ediwak nditeñ ye ndiọi ndiọi udọñ emi adade owo esin ke ñwure ye nsobo omum mmọ. 10 Koro ima okuk edi oruñ ofuri idiọkñkpọ Ubak owo ekop ọkpọsọñ udọñ ndinyene okuk tutu mmọ eyo ekpọñ mbuọtidem, enyuñ ebuñ esit mmọ ye mme ediwak ukut.

11 Edi ama edi afo, owo Abasi, sioño idem kpọñ kpukpru mme ñkpọ emi, sin ifik yom edinen ido, ido owo Abasi, mbuọtidem, ima, anyan ime, ye ifure ifure ido. 12 Fehe mbuba mbuọtidem emi ke ọyọhọ ukeme fo, ñnyuñ bọ nsinsi uwem nọ idem fo, koro ekedi ke ntak uwem emi ke Abasi okokot fi ke ini emi afo eketiñde añwa añwa ke iso ediwak mme ntiense abaña mbuọtidem fo.

13 Ke iso Abasi emi ọnọde kpukpru ñkpọ uwem, ye ke iso Kraist Jisọs emi eketiede eti ntiense ke iso Pọntiọs Pailet, ami mowuk fi: 14 Suk ibuot nọ ewuhọ emi nyuñ nim enye ke edisana, ye ke unana ndo, tutu esim usen emi Ọbọñ ñnyin Jisọs Kraist ediwọrọde iwut idem. 15 Abasi eyenam ediwọrọ ñwut idem Esie edi ke ñkem ñkem ini, mfọnmma ye andikara kierakiet, Edidem mme ndidem ye Ọbọñ mme mbọñ. 16 Enye ikpọñ ikpọñ odu uwem ke nsinsi, Enye oduñ ke uñwana emi owo ndomokiet mikemeke ndisaña ñkpere. Akananam owo baba kiet ikwe Enye, owo baba kiet inyuñ ikemeke ndikut Enye. Yak ukpono ye nsinsi odudu enyene Enye! Amen.

17 Wuk mme mmọ oro eforode ke ñkpọ uwem emi ete, mmọ ekubure mbure, ekunyuñ eyak idorenyin mmọ edori ke ñkpọ nte inyene, edi yak edori enyin ke Abasi, emi ọnọde ñnyin kpukpru ñkpọ ke ntatubọk ndida nnem idem ñnyin esit. 18 Wuk mmọ ndinam nti ñkpọ, enyuñ eforo ke edinam nti utom, enyuñ efọn ido enyuñ ebeñe idem ndibuana inyene mmọ ye mme mmọ efen. 19 Ke usuñ emi, mmọ eyenim inyene enọ idem mmọ, emi edidide ọkpọsọñ itiat idak isọñ ke ini iso. Ndien mmọ eyekeme ndibọ uwem emi edide ata uwem.

20 Timoti, tim nim se eyakde esin fi ke ubọk ndikpeme. Fara idem fo ke mme ikọ emi midaha ubọñ inọ Abasi, ye ndisime eneni emi ndusuk owo eduede ekot ifiọk. 21 Koro ubak owo edọhọ ete ke mmimọ imenyene ifiọk, ndien oto ke emi emekpu usuñ mbuọtidem. Yak mfọn Abasi odu ye kpukpru mbufo.