1 Ñwed emi oto Pọl, Ọbọsuru Kraist Jisọs, ke uduak Abasi, emi edọñde ndikwọrọ mbaña uwem oro ekeñwọñọde ke edidiana kiet ye Kraist Jisọs.

2 Ñwet nnọ Timoti, edima eyen mi. Yak Abasi Ete ye Kraist Jisọs Ọbọñ ñnyin ọnọ fi mfọn, mbọm ye emem.

3 Ami nnọ Abasi emi ami ñkponode ye iñwañ iñwañ esit, ekọm kpa nte mme ete ete mi ekenamde. Ami ñkọkọm Enye ini ekededi emi ami ntide fi ke akam mi kpukpru ini, ke okoneyo ye uwemeyo.

4 Ami meti mmọñeyet fo, ndien ami moyom ndikut fi eti eti, man otodo esit mi ọyọhọ ye idara. 5 Ami meti ata mbuọtidem emi afo enyenede, ukem mbuọtidem emi eka eka fo Lus, ye eka fo Yunis ekenyuñ enyenede. Ami mọyuhọ nte ke afo emenyene utọ mbuọtidem oro ñko.

6 Ke ntak emi ke ami nti fi nte yak afo ayak mme enọ emi Abasi ọkọnọde fi ke ini emi ñkodoride fi ubọk edu uwem. 7 Koro Spirit emi Abasi ọnọde ñnyin inamke ñnyin idi mbon ufep, Spirit Esie akam ọyọhọ ñnyin ye odudu, ima, ye mfarakeidem. 8 Kukop but ndien, ke editie ntiense mbaña Ọbọñ ñnyin, kunyuñ ukop but ubaña mi owo ñkpọkọbi Esie. Edi kam buana ke edikut ukut kabaña Eti mbuk emi, nte Abasi ọnọnọ fi odudu ndinam ntre.

9 Enye akanyaña ndien okot ñnyin ikabade idi ikọt Esie, itoho ke se ñnyin ima ikanam, edi oto ke uduak ye mfọn Esie. Enye ọkọnọ ñnyin mfọn emi oto ke Kraist Jisọs, mbemiso ererimbot ọtọtọñọ, 10 edi idahaemi emeyarade enọ ñnyin oto ke edidi Andinyaña ñnyin Kraist Jisọs. Enye ama etre odudu ñkpa, ndien ebe ke Eti Mbuk Esie ayarade nsinsi uwem. 11 Abasi ama emek mi ndikwọrọ Eti Mbuk emi nte Ọbọsuru ye andikpep, 12 ndien edi ke ntak emi ke ami mbọ mme utọ ukut emi. Edi esit mi osuk ọyọyọhọ ye idorenyin, koro ami mọdiọñọ enyemi ami mbuọtde idem ye Enye, ndien metim mfiọk nte ke Enye ekeme nditim nnim tutu esim usen oro, se ami ñyakde nsin Enye ke ubọk.

13 Sọñọ mum mme ikọ akpanikọ emi ami ñkekpepde fi, nte uwutñkpọ emi afo enyenede nditiene, ñnyuñ du ke mbuọtidem, ye ima emi edide eke ñnyin ke edidiana kiet ye Kraist Jisọs. 14 Tim kpukpru mme nti ñkpọ emi ekeyakde esin fi ke ubọk nim, emi okotode ke odudu Edisana Spirit emi oduñde ñnyin ke idem. 15 Afo ọmọfiọk ete ke kpukpru owo ke ñkanñkuk Esia ema efeñe ekpọñ mi, tutu esim Fikelọs ye Emokenes. 16 Yak Abasi owut ufọk Onesiforọs mbọm, koro enye ọkọdọñde mi esit ke ediwak ini. Enye ikokopke but ibaña nte ke ami ndu ke ufọk ñkpọkọbi, 17 edi enye ekebebehe ke obio Rom, enye ama ọtọñọ ndiyom mi tutu enye edikut mi. 18 Yak Abasi añwam enye ndibọ mbọm nto Ọbọñ ke Usen oro! Afo emetim ọdiọñọ kpukpru se enye akanamde ọnọ mi ke Efisọs.