1 Mekpe fi ubọk ke ofuri esit ke iso Abasi ye eke Kraist Jisọs, emi edikpede ikpe kpukpru owo, emi edude ke uwem ye mme mmọ emi ekpañade, ke ntak edifiak ndi Esie, ye ke ntak Obio Ubọñ Esie, ami mowuk fi, 2 nte yak ọkwọrọ etop emi, nte eyire ke nditetiñ enye, ke edide ñkem ñkem ini mme idighe, nam mme owo ekut ye afo, sua nọ, nyuñ dọñ esit, kpep ñkpọ ye kpukpru ime.

3 Ini eyedi emi mme owo midikpañke utọñ inọ ukpepñkpọ akpanikọ, edi eyetiene udọñ esit mmọ, ndien eyekọ enọ idem mmọ mme uwak mme andikpep emi editiñde inọ mmọ se utọñ mmọ edebede mmọ ndikop. 4 Mmọ eyesin ndikpañ utọñ nnọ akpanikọ, ndien ekpañ utọñ mmọ enọ ikpuikpu ñke.

5 Edi afo enyene ndikara idem fo ke kpukpru ifet, yọ ke ukut, nam utom ukwọrọ Eti Mbuk emi, nyuñ nam kpukpru utom fo ekem nte isuñutom Abasi.

6 Edi ama edi ami, ini emekem emi anade nte eduọk iyip mi nte uwa, ini ekem ami ndikpọñ uwem emi. 7 Ami manam ofuri ofuri ukeme mi ke mbuba emi, ami mefehe ọyọhọ idomo itọk, ami mma ñnyuñ mmum mbuọtidem ñkama. 8 Ndien ke emi, enọ edikan ekana ebet mi, anyanya edinen ido, emi Ọbọñ, ekpeunen ikpe, edinọde mi ke Usen oro, ndien idighe ami ikpọñ, edi eyenọ kpukpru mme mmọ emi etiede ke ime ebet edidi Esie.

9 Domo ofuri ukeme fo ndidi mbine mi iwiwa. 10 Demas ama oduk ima ye ererimbot emi, ndien ama efehe ọkpọñ mi; enye ama adaha Tesalonika. Kresiọs akaka Kalesia, ndien Taitọs aka Dalmatia. 11 Luk ikpọñ ikpọñ odu ye ami. Yom Mak, ñnyuñ saña ye enye di, koro enye ekeme ndiñwam mi ke utom emi. 12 Ami mma ndọñ Taikikọs aka Efisọs. 13 Ke ini emi afo ududide, men ọfọñ enyọñ idem mi emi ñkọkpọñde ke Troas ke ubọk Kapọs da sọk mi; men mme ñwed ñko di, akpan akpan mme ñwed oro ewetde ke ikpa unam.

14 Aleksanda, anam utom ukwak anam mi ata akamba idiọkñkpọ. Ọbọñ eyesio enye usiene nte odotde ke se enye anamde. 15 Kpeme idem fo eti eti ye owo emi, koro enye akafañade etop ñnyin ke obom obom usuñ.

16 Owo baba kiet ikadaha ye ami ke akpa ifet emi ñkeñwanade ndi nyaña idem mi, edi kpukpru owo ema efeñe ekpọñ mi. Yak Abasi okubat emi ọnọ mmọ. 17 Edi Ọbọñ ama odu ye ami, ndien onyuñ ọnọ mi odudu, ke ntre ami mma ñkeme ndikwọrọ ọyọhọ etop emi nnọ kpukpru mme mmọ emi midighe mme Ju ndikop, ndien ema efak mi esio ke inua ekpe. 18 Ndien Abasi eyefak mi osio ke kpukpru oburobut ñkpọ, onyuñ ada mi aka ke Obio Ubọñ Esie ke enyọñ. Yak ubọñ enyene Enye ke nsinsi nsinsi! Amen.

19 Ami mọnọ ekọm esọk Prisila ye Akwila ye ufọk Onesiforọs. 20 Erastọs ama ọsọñọ etie ke Kọrint, ndien ami mma ñkpọñ Trofimọs ke Miletọs, koro enye ọkọdọñọde dọñọ.

21 Domo ofuri ukeme fo ndidi mbemiso ekesim ini ọkpọsọñ etuep. Eubulọs, Pudensi, Lainọs, ye Kaludia enọ ekọm, kpa ntre ye kpukpru mme nditọ ete eken. 22 Yak Abasi odu ye spirit fo. Mfọn Abasi odu ye kpukpru mbufo.