1 Ñwed emi oto Pọl emi edide isuñutom Abasi ye Ọbọsuru Jisọs Kraist:

Ekemek mi enyuñ edọñ mi ñkañwam mbuọtidem mme mmọ emi Abasi ekemekde, ñnyuñ nda mmọ usuñ ke akpanikọ emi ido ukpono ñnyin ekpepde, 2 emi idorenyin nsinsi uwem, Abasi emi misuhu nsu, ọkọñwọñọ ndinọ ñnyin uwem emi mbemiso ererimbot ọtọtọñọ. 3 Ndien ke ukem ukem ini, Enye ama ayarade Enye ke Etop Esie emi Enye akayakde esin mi ke ubọk oto ke edinyik Abasi andinyaña ñnyin.

4 Ami ñwet ñwed emi nnọ Taitọs ata eyen mi ke mbuọtidem emi ñnyin ibuanade. Abasi Ete, ye Kraist Andinyaña ñnyin akpakam ọnọ fi mfọn ye emem.

5 Ami ñkọkpọñ fi ke Kret man otodo afo obon mme ñkpọ ke itie nte ọkọsuhọde ndibon, onyuñ emek mme adaidaha ufọk Abasi ke kpukpru obio. Ti mme item mi: 6 Adaidaha inyeneke ndinyene ndo, enye enyene ndinyene ñwan kiet kpọt, ndien nditọ esie enyene ndidi mme mmọ emi enimde Abasi ke akpanikọ; inyeneke ndinam ido unam unam mme ndidi nditọ ntututọñ.

7 Sia enye esede enyin ke utom Abasi, enye nte adausuñ ikpenyeneke ndo, enye inyeneke ndidi owo ntañidem ye owo iwiwa esit, mme akpa mmin, mme owo eñwan, mme owo ọdọrọ itọñ. 8 Enye enyene ndidi owo emi ọfọnde ido ye mme owo, onyuñ ama se ifọnde. Enye enyene ndifara ke idem, onyuñ edi edinen owo, asana, onyuñ akara uwem esie. 9 Enye enyene ndisọñọ mmum etop emi mme owo ekemede ndibuọt idem ke esit, emi onyuñ asañade ekekem ye ukpepñkpọ Ọbọñ Jisọs; ke usuñ emi, enye eyekeme ndidọñ mme mmọ eñwen esit, oto ke ukpepñkpọ emi edide akpanikọ, onyuñ ayarade owut mme ndudue mme mmọ emi efañade mfaña ye enye.

10 Koro ediwak mbon nsọñibuot edu emi ebiañade mme mmọ efen oto unana ifiọk mmọ, akpan akpan mme mmọ emi ekabarede esit eto ido ukpono mme Ju. 11 Ana etre mmọ ye se mmọ ekade iso nditiñ, koro mmọ ke etimede ediwak mme ekpuk, oto ke edikpep se mmọ mikpekpepke, ke ntak unana iso obut uñwana okuk. 12 Ekedi kiet emi ekedide owo obio Kret ke idem esie, ye kiet ke otu mme Asiak Uduak Abasi mmọ, ekedọhọ ete, ke "mbon Kret edi mbon nsu kpukpru ini, edi mme ndiọi mme unam ikọt, ye mme ifu emi edọrọde itọñ." 13 Ndien se enye etiñde edi akpanikọ. Ke ntak emi ana afo asua ọnọ mmọ añwa añwa man otodo mmọ ekpekeme ndinyene mbuọtidem emi ọsọñde idem, 14 ndien idiyireke aba ke mme ikpuikpu mbuk ñke mme Ju ye mme ewuhọ emi otode ubọk mme owo emi ema ekesin akpanikọ.

15 Kpukpru ñkpọ asasana ọnọ mmọ emi esanade ke idem mmọ, edi ñkpọ ndomokiet isanake inọ mmọ emi ema ekesabarede idem mmọ enyuñ enana ndinim ke akpanikọ, koro ekikere esit mmọ ye ubiomo ikpe mmọ ama akabiara. 16 Mmọ edọhọ ete mmimọ imọdiọñọ Abasi, edi ekañ enye ke ido edinam mmọ. Mmọ esua owo, enyuñ etut utọñ, inyuñ ikemeke ndinam baba eti ñkpọ kiet.