1 Edi afo enyene ndikpep se ukpepñkpọ Kraist oyomde. 2 Dọhọ mme ñkani owo ete yak mmọ ediọñọ idem, enyene ifiọk, enyuñ efara ke idem, ekop odudu ke mbuọtidem mmọ, enyene ima, enyuñ enyene ime.

3 Ke ukem ukem usuñ emi dọhọ mme ñkani iban ete yak mmọ edu uwem nte mme iban emi edude edisana uwem ekpenyenede ndidu. Mmọ inyeneke ndidi mme andibiat owo ke edem, mme ndiduk ufin nnọ mmin. Mmọ enyene ndikpep ukpepñkpọ emi ọfọnde, 4 man otodo mmọ ekpekeme nditeme ñkparawa iban ndima mme ebe mmọ ye mme nditọ mmọ, 5 ndinyene mfarakeidem, ñnyuñ ndu edisana uwem, ñnyuñ ndi nti iban ufọk ndọ, emi esukde ibuot enọ mme ebe mmọ, mbak owo baba kiet editiñ idiọk ikọ abaña etop emi otode Abasi.

6 Ke ukem usuñ, ami ñnyik mme ñkparawa iren ndidu uwem mfarakeidem. 7 Afo ke idem fo ke kpukpru ñkpọ, enyene ndidi uwutñkpọ ke mme nti utom. Nam akpanikọ ñnyuñ sin ifik ke se afo ekpepde, 8 Tiñ mme enyene uwem ikọ emi owo mikemeke ndisari, man mme asua fo ekop but kadaña emi mmọ minyeneke idiọkñkpọ ndomokiet nditiñ mbaña ñnyin.

9 Ifin enyene ndikop uyo mme ete ufin mmọ, ñnyuñ nnem mmọ esit ke kpukpru ñkpọ. Mmọ inyeneke ndibọrọ mmọ ikọ, 10 mme ndiyip ñkpọ mmọ. Utu ke oro, mmọ enyene ndiwut nte ke mmimọ ifọfọn kpukpru ini inyuñ idi mbon emi owo ọkpọbuọtde idem ye mmimọ man eda eti itoro esọk ukpepñkpọ emi abañade Abasi andinyaña ñnyin ke kpukpru se mmọ enamde.

11 Koro Abasi ama ayarade mfọn Esie emi adade edinyaña ọsọk kpukpru owo. 12 Mfọn oro eteme ñnyin ndisana mme ido uwem emi misañake ikekem ye uduak Abasi ñyak, ye idiọk udọñ ererimbot emi, ndidu uwem mfarakeidem, edinen uwem, ye uwem emi Abasi oyomde ke ererimbot emi; 13 nte ñnyin itiede ibet mfọnmma usen idorenyin ñnyin oro, emi ubọñ Akwa Abasi ye andinyaña ñnyin Jisọs Kraist ediwọrọde iwut idem. 14 Enye ama ayak idem Esie ọnọ ñnyin, ndinyaña ñnyin nsio ke kpukpru oburobut ido, onyuñ anam ñnyin idi mme ndisana ikọt Abasi, emi inyenede Enye ikpọñ ikpọñ, inyuñ ikopde udọñ ndinam nti ñkpọ, 15 Kpep mme ñkpọ emi, nyuñ da ọyọhọ odudu ukara fo sin ke edinam, nte afo akade iso ndidọñ mme owo esit, onyuñ asua ọnọ mme mmọ emi ekopde fi. Kuyak mmọ ndomokiet ese fi ke usuhọde enyin.