1 Ti ikọt mbufo ndisuhọde idem mmọ nnọ mme andikara ukara ye mme odudu ukara. Yak mmọ esuk ibuot enọ mmọ, enyuñ edu ke mbeñeidem ndinam kpukpru nti ñkpọ. 2 Dọhọ mmọ ekutiñ idiọk ikọ ndomokiet ye owo kiet ekededi, edi edu emem emem ye ufan ufan, enyuñ ewut kpukpru owo suñsuñ edu uwem.

3 Koro ama enyene ini emi ñnyin ñko ikedide mme ndisime, mbio ntututọñ, ye mme anam ukwañ ido. Ñnyin ikedi ifin inọ idiọk udọñ ye kpukpru oruk inemesit uwem emi. Ñnyin ikabiat ini uwem ñnyin ke udu ye ufup, mme owo ema esua ñnyin, ñnyin ima inyuñ isua mmọ.

4 Edi ke ini emi mfọnido ye ima Abasi andinyaña ñnyin ọwọrọde owut idem, 5 Enye ama anyaña ñnyin. Ikedighe ke ntak nti utom emi ñnyin ke idem ñnyin ikanamde; edi oto ke mbọm Esie, ke Enye akanyaña ñnyin, oto ke ediyet emi Edisana Spirit ekeyetde ñnyin osio ke mme idiọkñkpọ ñnyin, onyuñ ọnọ ñnyin obufa emana ye obufa uwem. 6 Abasi ama añwaña Edisana Spirit nte ọyọhọde ọduọi, odori ñnyin ke idem oto ke Jisọs Kraist andinyaña ñnyin, 7 man oto ke mfọn Esie enam ñnyin ida nte enende ye Abasi, inyuñ ida nsinsi uwem, emi ñnyin inyenede idorenyin inyene. 8 Ikọ emi edi ọyọhọ akpanikọ. Ami ñyom fi ọsọñọ etiñ ñkpọ abaña mme ñkpọ emi, man otodo mme mmọ emi enimde Abasi ke akpanikọ ekpeyak ini mmọ enọ ke edinam nti utom. Mme ñkpọ emi efọn enyuñ enyene udori ọnọ kpukpru owo.

9 Edi diañarede idem kpọñ ndisime eneni, anyan udim mme ete ete, utọk ye eñwan emi abañade ibet Moses. Mmọ edi ikpuikpu inyuñ inyeneke udori. 10 Duri owo emi ọtọde ubahade utọñ inikiet mme ikaba, ndien afo adiañarede nsaña ọkpọñ enye. 11 Afo ọmọfiọk ete ke utọ owo oro abiara, ndien mme ndiọiñkpọ esie ewut añwa añwa nte ke enye edue.

12 Ke ini emi ndidọñde Atemas mme Taikikọs edi ebine fi, domo ofuri ukeme fo ndidi mbine mi ke Nikopolis, koro ami mebiere ndidu do tutu ini etuep okure. 13 Domo ofuri ukeme fo ndiñwam Senas, ekpe mbet, ye Apọlọs nditọñọ isañ mmọ, nyuñ kut ete ke mmọ enyene kpukpru se inanade mmọ. 14 Kut ete ke ikọt ñnyin eyak ini mmọ enọ ke edinam nti utom, man ekeme ndinyene se idide mme akpan unana mmọ; yak mmọ ekudu uwem ifu.

15 Kpukpru mme mmọ emi edude ye ami enọ ekọm esọk mbufo. Nọ mme ufan ñnyin ke mbuọtidem ekọm ñnyin. Mfọn Abasi odu ye kpukpru mbufo.