1 Eti emi: Ọkpọsọñ ini eyedi ke mme ukperedem usen. 2 Mme owo eyefam efam, edọrọ itọñ, ebure mbure enyuñ ekut idem, mmọ eyemiom emiom, etut utọñ ye ete ye eka mmọ, enana esit ekọm, esin ndikpono Abasi, 3 mmọ eyediọk ido, enana esit mbọm, esabade owo ke edem, eduọ obom enyuñ etie ñwo ñwo; mmọ eyesua se ifọnde, mmọ eyedi mbon etabi, 4 etime ido, enyuñ efut eyọhọ ye ntañidem, mmọ eyema inemesit ekan nte emade Abasi, 5 mmọ edimum enyọñ enyọñ ido ukpono ikama, ndien esin odudu emi asañade ye edikpono Abasi. Da nsan nsan ye uto mme owo emi.

6 Ubak mmọ eda edu ñkari eduk ke mme ufọk ekekara mme iban mmemidem emi udobi idiọkñkpọ mmọ efikde mmọ onyuñ adade mmọ esin ke kpukpru ndiọi udọñ, 7 mme iban emi ekade iso ndibọ ukpepñkpọ edi ikemeke ndisim ifiọk akpanikọ. 8 Kpa nte Janes ye Jambres ekefañade mfaña ye Moses, ntre ñko ke mme mmọ emi efaña akpanikọ, mme owo emi esit mmọ miduhọ aba uwem, emi ema ekenyuñ eduọ ekpọñ mbuọtidem.

9 Edi mmọ idikaha anyan, koro kpukpru owo eyekut nte mmọ esimede, kpa nte eketibede ye Janes ye Jambres.

10 Edi afo emetiene ukpepñkpọ mi, edu uwem mi, ye uduak mi ke uwem, afo ama etiñ enyin ese mbuọtidem mi, ime mi, ima mi, ye ediyọ mi, 11 ukọbọ mi, ye ukut mi. Afo ọmọdiọñọ kpukpru se iketibede ye ami ke Antiọk, Aikoniọm, ye ke Listra, oburobut isin enyin emi ami ñkọyọde. Edi Abasi ama anyaña mi osio ke kpukpru. 12 Kpukpru mme mmọ emi eyomde ndidu uwem emi enemde Abasi esit ke edidiana kiet ye Kraist Jisọs, enyene ndikut isin enyin ye ukọbọ; 13 edi mme oburobut owo, ye mbio ñwutidem eyekaka iso ekọri ke ọkpọsọñ idiọk ido, ke ndibiaña mme mmọ efen, kpa nte mme mmọ ebiañade mmọ ñko.

14 Edi, ama edi afo, kaka iso ke akpanikọ emi ekekpepde fi ñnyuñ sọñọ mum akpanikọ kama, afo ọmọdiọñọ mme uduot owo emi mme andikpep fo ekedide, 15 ndien afo emeti ete tọñọ ke ini emi afo ekedide eyenọwọñ afo ama ọdiọñọ edisana ñwed Abasi, emi ekemede ndinọ fi ifiọk emi akade ọkọsuñọ ke edinyaña oto ke mbuọtidem ke Kraist Jisọs. 16 Ekewet ikọ Abasi eto ndausuñ Abasi, ndien enye ọfọn ke ndida ñkpep owo akpanikọ, ndisua nnọ owo ke idiọkñkpọ, ke edineñede mme ndudue, ye ke ndinọ item nte esañade ye edu edinen uwem, 17 man otodo owo emi anamde ñkpọ ọnọ Abasi okpodot ọyọhọ ọyọhọ, enyuñ ebọbọ enye mbọbọ ndikeme ndinam kpukpru nti utom.