1 Spirit etiñ añwa añwa ete ke ndusuk owo eyekpọñ akpanikọ ke ukperedem ini, mmọ eyesuk ibuot enọ mme nsu nsu spirit, enyuñ etiene mme ukpepñkpọ mme ndedehe spirit. 2 Mme uduot ukpepñkpọ emi eto ke abiaña mme owo emi edide mme osu nsu; emi esit mmọ ama akakpa onyuñ ebiet nte eda ufiop ukwak efọp 3 Mme utọ owo emi ekpep ete ke ifọnke owo ndidọ ñwan, ñnyuñ ndia mme ndusuk udia. Edi Abasi akanam mme udia emi ete edia, ke mme mmọ emi enimde ke akpanikọ enyuñ ediọñọde akpanikọ ema ekebọñ akam enọ Abasi ekọm. 4 Kpukpru ñkpọ emi Abasi akanamde efọn, inaha esin ndomokiet, edi ana nte ebọ kpukpru ye akam ekọm, 5 koro ikọ Abasi ye akam anam enam enye asana.

6 Edieke afo udunọde mme nditọ ete mme item emi, afo eyedi eti asañautom Kraist Jisọs, nte afo adiade udia Spirit oto ke ikọ Abasi, emi edide ikọ mbuọtidem, ye ke ata ukpepñkpọ emi mbufo eketienede.

7 Edi ediañade nsaña ye mme ikpuikpu nneme emi midaha ubọñ inọ Abasi, emi midotke owo ndineme. Ka iso sin idem fo ke ukpep ndidu uwem nte Abasi oyomde. 8 Edisiñede obukidem enyene esisit ufọn ke esit, edi nsiñede idem ke Spirit enyene udori ke kpukpru usuñ, koro enye asañade ye eñwọñọ uwem mi idahaemi ye eke ini iso. 9 Emi edi ikọ akpanikọ, emi anade enyime ọyọhọ ọyọhọ enyuñ enim ke akpanikọ. 10 Ntak edi oro ñnyin isinde ifik inyuñ inam ọkpọsọñ utom, koro ñnyin imende idorenyin ñnyin idori ke odu uwem Abasi, emi edide Andinyaña kpukpru owo, akpan akpan eke mme mmọ emi enimde ke akpanikọ.

11 Wuk nyuñ kpep mme ñkpọ emi. 12 Kuyak owo baba kiet ese fi ke usuhọde enyin koro afo edide eyen ọwọñ, edi, di uwutñkpọ nọ mme andinim ke akpanikọ, ke ikọ inua fo, ke edu uwem fo, ye ke ima fo, mbuọtidem fo, ye edisana uwem. 13 Ka iso ndiwa idem fo tutu ami ndi, ke edikot ñwed Abasi añwa añwa ye ke edikwọrọ ikọ ye edikpep ñkpọ.

14 Kufumi enọ Spirit emi odude fi ke idem emi ekenọde fi eto ke ediyarade uduak Abasi ndien mme adaidaha ufọk Abasi ekenyuñ edoride fi ubọk. 15 Da mme ñkpọ emi sin ke edinam, nyuñ yak idem fo nọ mmọ, man otodo kpukpru owo ekut ñkọri fo. 16 Kpeme idem fo, nyuñ kpeme ukpepñkpọ fo. Ka iso ndinam ntem, koro ke edinam ntem afo eyenyaña idem fo ye mme mmọ emi ekpañde utọñ ekop fi.