Proximidade

4 यहोवे ते मतादा रिया तँईं बोलो;

हमेशा तेसरी जयजयकार करदे रओ।

11 यहोवा ओर तेसरी सामर्था खे टोल़ो;

तेसरा दर्शण पाणे खे लगातार मईणत करदे रओ।

6 जदुओ तक यहोवा मिली सकोआ, तदुओ तक तेसरी टोल़ा रे रओ, जदुओ तक से तेरे नेड़े ए, तदुओ तक तेसखे आका पाओ;*

4 मैं सिर्फ एक ई बरदान प्रभुए ते मांगी राखेया,

मां तेतेरे ई जत्नो रे लगेया रा रणा,

ताकि आऊँ पूरी जिन्दगी प्रभुए रे मईलो रे रई सकूँ ओर प्रभुए री सुन्दरता खे देखी सकूँ

ओर तेसरे मईलो रे दर्शण करुँ।*

10 तेरे आँगणो रे एक दिन रणा ओरी जगा ह्जार दिन रणे ते केथी खरा ए।

दुष्टा रे डेरेया रे रणे ते आपणे परमेशरो रे मन्दरो रिया देऊल़ी पाँदे खड़े रणा माखे जादा अच्छा लगोआ।

11 तां माखे से बाट दखाणी;

जो अनन्त जीवनो रिया तरफा खे जाओई;

तेरी मौजुदगिया रे माखे आनंद ओर सदा री खुशी मिलोई।*

17 जेबे तार्मिक माणूं दुहाई देओए तेबे प्रभु सुणोआ

ओर तिना खे सबी मुसीबता ते बचाओआ।

18 प्रभु पश्चाताप करने वाल़ेया री सुणने ओर मताद करने रिया तँईं त्यार रओआ

ओर दु:खी आत्मा वाल़े माणूंए खे बचाओआ।

5 तुसा री नरमाई सबी लोका सामणे प्रकट ओ। प्रभुए रा वापस आऊणा नेड़े ए।

13 एक बखत था जेबे तुसे परमेशरो ते दूर थे पर एबे यीशु मसीह रे खूनो रे जरिए तेसरे नेड़े आईगे रे।

6 पक्का पलाई ओर करूणा जिन्दगी पर मां साथे बणी री रणी

ओर मां प्रभुए रे कअरे जुगो-जुगो तक रणा।

18 "मां तुसे अनाथ नि छाडणे, आऊँ तुसा गे वापस आऊँआ।

57 म्हारा यहोवा परमेशर जिंयाँ म्हारे बुजुर्गा साथे रओ था, तिंयाँ ई आसा साथे बी रओ, से आसा खे छाडो नि ओर ना ई आसा खे त्यागो।

31 तेबे बी तैं जो बड़ा दयालु ए, तिना रा अन्त नि कित्तेया ओर ना सेयो त्यागे, कऊँकि तूँ अनुग्रह करने वाल़ा ओर दयालु परमेशर ए।

आखरी नमस्कार

16 आँऊ प्रार्थना करूँआ कि प्रभु जो शान्तिया री सूबल़ ए, आपू ई तुसा खे सदा और हर प्रकारा री शान्ति देओ। आँऊ प्रार्थना करूँआ कि प्रभु तुसा सबी साथे रओ।

आखरी अभिवादन

11 ओ साथी विश्वासियो, आँऊ इना शब्दा साथे आपणी चिट्ठी बन्द करूँआ। खुश रओ, सिद्ध बणदे जाओ, एकी दूजे खे औंसला देंदे रओ, एक ई मन राखो, मेल-मिलापो साथे रओ। तेबे प्यार और शान्तिया रा परमेशर तुसा साथे रणा।

13 इजी तेई आसे जाणूंए कि आसे तेसदे बणे रे रऊँए और से आसा रे, कऊँकि तिने आपणी पवित्र आत्मा आसा खे देई राखेया।

18 परमेशर कदी बी किने नि देखेया, केवल एकलौता पुत्रे, जो सच्ची ई आपू परमेशर ए, और जो पिते री गोदा रे ए, तिने ई ये प्रगट कित्तेया कि परमेशर केड़ा ए।

28 मूसा तो तेती यहोवे साथे बिना रोटी-पाणी खाए-पिये चाल़ी दिन ओर चाल़ी राती रया ओर तेबे तिने तिना पात्थरो रिया तख़्तिया पाँदे वाचा रे वचन मतलब दस आज्ञा लिखी तिया।

9 तेथो रे बमारा खे ठीक करो और तिना खे बोलो कि परमेशरो रा राज्य तुसा रे नेड़े आयी पऊँची रा।

यहूदा दे आसा राजे रे सुदार

1 तेबे परमेशरो रा आत्मा ओदेदो रे पाऊ अजर्याह रे समाई गा, 2 ओर से आसा राजे साथे मिलणे खे निकल़ेया ओर तेसखे बोलेया, "ओ आसा राजा ओर ओ सारे यहूदा ओर बिन्यामीनो रे लोको, मेरी सुणो, जदुओ तक तुसे यहोवे साथे रणे, तदुओ तक से तुसा साथे रणा ओर जे तुसे तेसरी टोल़ा दे लगे रे रओगे, तेबे तो से तुसा साथे मिलेया करना, पर जे तुसे तेसखे छाडी देओगे, तो तेस तुसे बी छाडी देणे। 3 बऊत दिना तक इस्राएल बिना सच्चे परमेशरो ते ओर बिना सिखाणे वाल़े पुरोईत ओर बिना बिधानो ते रया। 4 पर जेबे-जेबे सेयो मुसीबता रे पड़ी की इस्राएलो रे परमेशर यहोवे रिया तरफा खे फिरे ओर से टोल़ेया, तेबे-तेबे से तिना खे मिलेया। 5 तेस बखते ना तो जाणे वाल़ेया खे कोई शान्ति ओ थी ओर ना आऊणे वाल़ेया खे, बल्कि सारे देशो रे सब रणे वाल़ेया रे बड़ा आल्ला-गोल्ला ओ था। 6 देशा खे देश ओर शईरा खे दूजे शईर नाश करने लगी रे थे, कऊँकि परमेशर कई प्रकारा रे कष्ट देई की तिना खे डराणे लगी रे थे। 7 पर जेथो तक तेरी गल्ल ए, मजबूत बणो ओर काम करदे रओ, कऊँकि परमेशरो तुसा खे तुसा रे अच्छे कामा रा प्रतिफल देणा।"

8 जेबे आसा राजे यो वचन ओर ओदेद नबीए री भविष्यबाणी सुणी, तेबे तिने याओ बानी की यहूदा ओर बिन्यामीनो रे सारे देशो ते ओर तिना शईरा ते जो तिने एप्रैमो रे पाह्ड़ी इलाके ते लई ले थे, सारी घिनौनी चीजा दूर कित्तिया ओर यहोवे री जो बेदी यहोवे रे बरांडे सामणे थी, से नये सिरे ते बणाई। 9 तिने सारे यहूदा ओर बिन्यामीन ओर एप्रैम, मनश्शे ओर शिमोनो ते जो लोक तेस साथे रओ थे, सेयो कट्ठे कित्ते, कऊँकि सेयो ये देखी की कि तेसरा यहोवा परमेशर तेस साथे रओआ, इस्राएलो ते कई जणे तेसगे आए। 10 आसा राजे रे राजो दे पन्द्रुए सालो रे तीजे मीन्ने दे सेयो यरूशलेम शईरो रे कट्ठे ऊए। 11 तेस ई दिने तिने लड़ाईया दे तिना लूटा बीचा ते 700 गाए बल़द ओर 7,000 पेडा-बाकरिया लईया, ओर यहोवे खे बलि चढ़ाईया। 12 तिने वाचा बानी कि आसा आपणे पूरे मन ओर सारे प्राणो ते आपणे बुजुर्गा रे परमेशर यहोवे री आराधना करदे रणा; 13 ओर क्या बड़ा, क्या छोटा, क्या जवाणस, क्या मर्द, जो कोई इस्राएलो रे परमेशर यहोवे री पग्ती नि करो, से काया जाणा। 14 ओर तिने जयजयकार करी की तुरहिया ओर रड़सिंगे बजांदे ऊए ऊच्ची आवाजा दे यहोवे री कसम खाई। 15 ये कसम खाई की सब यहूदी खुश ऊए, कऊँकि तिने आपणे सारे मनो ते कसम खाई ओर बड़े चाव साथे से टोल़ेया ओर से तिना खे मिलेया ओर यहोवे तिना खे चऊँ कनारा ते राम दित्तेया।

16 आसा राजे री दादी माका जेसे अशेरा देविया रिया तँईं एक घिनौनी मूर्ति बणाई थी, तिने से राजमाता रे पदो ते टाईती ओर आसा राजे अशेरा री मूर्ति बाडी की पीसी ती ओर किद्रोन नाल़े दे सेटी ती। 17 ऊच्ची जगा इस्राएलो ते नि टाल़िया, तेबे बी आसा राजे रा मन पूरी जिन्दगी निष्कपट रया। 18 तिने जो सूईना-चाँदी ओर पांडे तेसरे बाओए चढ़ाए थे ओर जो तिने आपू चढ़ाए थे, सेयो परमेशरो रे मन्दरो दे पऊँचाई ते। 19 आसा राजे रे राजो दे पैंतीए सालो तक फेर लड़ाई नि ऊई।