Reino dos céus

गारल धन

44 येशू कलाँ, "स्वर्गक राज कौनो मनैयक एकथो खेट्वामे गारके धारल धन हस हो। जहाँ एकथो दोसुर मनैया भेटाइत, और फेनदोस्रे कोरके नुकादेहत, ताकि दोसुर जाने ना भेटाँइत। तब उ मनैया आनन्दित होके चलजाइत, और अपन थेन रहल सक्कु चिज बेँचके उ खेट्वाहे किनलेहत।"

बहुमूल्य मोती

45 येशू कलाँ, "फेनदोस्रे स्वर्गक राज मजा हिरामोती खोजुइया एकथो व्यापारी हस हो। 46 ऊ एकथो बहुमूल्य मोती भेटाइल, ते ऊ जाके अपन थेन रहल सक्कु चिज बेँचके उ मोतीहे किनलेहत।"

लहटक बियक दृष्टान्त

31 येशू ओइन्हे एकथो दोसुर दृष्टान्त कलाँ, "परमेश्वरके राज धर्तीक सक्कु बियामेसे सक्कुहुनसे छुटी लहटक बिया हस हो। 32 ओसिक ते लहटक बिया सक्कु बियामेसे छुटी हो। पर यी जब भारी हुइत। तब बहरके बारीक सक्कु सागसब्जीनसे ढेंग होजाइत। यकर असिन नम्मा-नम्मा दहियाँ हुइथिस कि आकाशमे उरुइया चिरैँ फेन यकर दहियँक छाहीँमे ठाँट बनाई सेक्थाँ।"

खमीरके दृष्टान्त

33 येशू ओइन्हे दोसुर दृष्टान्त कलाँ, "स्वर्गक राज* खमीर हस हो, जोन एकथो जन्नी मनैया पच्चीस किलो पीठामे मिलाइल। और उ पूरा पीठा खमीरसे फुलके ठिक नै हुइतसम् उहिहे एकथो ठाउँमे धारल।"

सोहुँक दृष्टान्त

24 येशू फेनदोस्रे ओइन्हे दोसुर दृष्टान्त सुनैलाँ: "स्वर्गक राज एकथो जिम्दरवा हस हो, जे अपन खेट्वामे मजा बिया बुइल। 25 पर जब मनै सुततिहिँत, तब् जिम्दरवक दुश्मन आइल, और गोहूँक बिच्चे-बिच्चेम सोहुँ बोके चलगिल। 26 जब बोँट निकरके ओम्ने दाना लागल, तब् सोहुँ फेन देखा परल। 27 जिम्दरवक नोकरनके आके उहिहे कलाँ, ‘का अप्नि, अपन खेट्वामे मजा बिया नै बुइल रही? वहाँ सोहुँ कहाँसे आइल?’ 28 जिम्दरवा ओइन्हे कहल, ‘कौनो एकथो दुश्मन आके सोहुँ बोदेहल बा।’ नोकरनके उहिहे पुँछ्लाँ, ‘का हम्रे जाके उ सोहुँ पनाई?’ 29 पर उ जिम्दरवा कहल, ‘नाई, ओसिक ना करो, नै ते तुहुरे सोहुँ उँखारेबेर गोहूँ फेन उँखारदेबो। 30 कटना सिजनसम दुन्हुनहे संगसंगे बाह्रे देऊ।’ काटेबेर कटुइयनहे कबुँ, ‘आघे सोहुँ उँखारके जराइक लग पुल्ला बाँधो, पर गोहूँ भर मोरिक बक्खारीमे धारो।’"

सोहुँक दृष्टान्तके मतलब

36 तब् येशू भीड़हे छोरके घरेम गैलाँ, और हुँकार चेलनके हुँकार थेन आके कलाँ, "हम्रिहिन्हे खेट्वक सोहुँक दृष्टान्तके मतलब बतादी।" 37 ऊ ओइन्हे जवाफ देलाँ, "मजा बिया छिटुइया मै, मनैयक छावा हइतुँ। 38 खेट्वा संसारके मनै हुइँत। मजा बिया भर परमेश्वरके राजके मनै हुइँत, और सोहुँ शैतानके मनै हुइँत। 39 सोहुँ लगुइया दुश्मन भर शैतान हो। कट्नी उ समयहे जनाइत, जब संसारके अन्त्य हुई। कटुइयन स्वर्गदूतनके हुइताँ। 40 जसिके सोहुँहे उँखारके आगीमे भसम करजाजाइत, संसारके अन्त्यमे फेन ओस्तेहेँ हुई। 41 मै, मनैयक छावा अपन स्वर्गदूतनहे पठैम। और ओइने परमेश्वरके राजमे पाप करे लगैना सक्कु कारण और खराब काम करुइया सक्कुहुनहे वहाँसे निकारदिहीँ। 42 और स्वर्गदूतनके ओइन्हे आगिक भट्ठीमे फेँकादिहीँ। वहाँ मनै रुइहीँ और कष्टमे दाँत किचकिचैहीँ। 43 तब् धर्मी जनहुँक्रे अपन बाबक राजमे सूर्य हस चहकार हुइहीँ। यदि तुहुरे बुझे चहथो कलेसे, यी बातमे ध्यान देऊ कि मै अब्बे तुहुरिन्से का कनु।"

मच्छी मरना जाल

47 येशू कलाँ, "स्वर्गक राज समुन्दरमे मच्छी मारक लग फेँकाइल जाल हस फेन हो, जेम्ने हर मेरके मच्छी परथाँ। 48 और जब जाल भरगिल, ते मनै उहिहे तानके आँरितिर निकरलाँ। और बैठके मजा-मजा मच्छी भर छिट्वामे जमा करलाँ, और काम नै लग्ना मच्छी भर सक्कु बाहेर फेँकादेलाँ। 49 ओस्तेके यी संसारके अन्त्यमे हुई, स्वर्गदूतनके आके दुष्ट मनैनहे धर्मी मनैनके बिच्चेमसे अलग करहीँ, 50 और दुष्ट मनैनहे आगिक भट्ठीमे फेँकादिहीँ। जहाँ मनै रुइहीँ, और कष्टमे दाँत किचकिचैहीँ।"

धन्य वचन

3 "धन्य हुइँत उ मनै, जेने अपन लग परमेश्वरके जरुरीक महसुस करथाँ।

काकरेकी स्वर्गक राज ओइनेहेन्के हो।

4 धन्य हुइँत उ मनै, जेने शोक करथाँ।

काकरेकी परमेश्वर ओइन्हे सान्त्वना दिहीँ।

5 धन्य हुइँत उ मनै, जेने नम्र बताँ,

ओइन्केमे परमेश्वर अपन वाचा पूरा करहीँ।

6 धन्य हुइँत उ मनै, जेने धार्मिक जीवन जिए चहथाँ।

काकरेकी परमेश्वर ओइन्के इच्छा पूरा करहीँ।

7 धन्य हुइँत उ मनै, जेने दया करथाँ।

काकरेकी परमेश्वर ओइन्हे दया करहीँ।

8 धन्य हुइँत उ मनै, जेनके मन शुद्ध बतिन।

काकरेकी ओइने परमेश्वरहे देख्हीँ।

9 धन्य हुइँत उ मनै, जेने मेलमिलाप करवैथाँ।

काकरेकी ओइने परमेश्वरके सन्तान कहलाजिहीँ।

10 धन्य हुइँत उ मनै, जेने धार्मिक जीवन जिलक कारण सट्वा पैथाँ।

काकरेकी स्वर्गक राज ओइनेहेँनके हुइतिन।"

11 "धन्य हुइतो तुहुरे, जब मोरिक चेला हुइलक कारण मनै तुहुरिन्के निन्दा करहीँ और सतैहीँ और ठगके तुहुरिन्के विरोधमे सक्कु मेरके खराब बात बत्वैहीँ। 12 तब् रमाऊ और गजब खुशी होऊ। काकरेकी तुहुरिन्के बहुत भारी ईनाम स्वर्गमे धारल बा। काकरेकी अस्तेके बहुत समय आघे परमेश्वरके अगमवक्तनहे ओइने सताइल रहिँत।"

स्वर्गक राजमे सक्कुहुनसे भारी

1 वहे समयमे चेलनके येशूक थेन आके पुँछ्लाँ, "स्वर्गक राजमे सक्कुहुनसे भारी के हो?" 2 येशू एकथो छुटिमुती लौँदाहे लग्गे बलाके ओइन्के बिच्चेम ठरह्वैलाँ। 3 और कलाँ, "जात्तिके, मै तुहुरिन्हे कहतुँ, मन बदलके तुहुरे छुटी लरका हस नै हुइबो कलेसे कबु स्वर्गक राजमे नै पैँठ्बो। 4 जे यी छुटी लौँदा हस अपनहे नम्र बनाई, वहे स्वर्गक राजमे सक्कुहुनसे भारी हुई।

14 पर येशू कलाँ, "लरकनहे मोरिक थेन आई देऊ और ओइन्हे ना रोको। काकरेकी परमेश्वरके राज ओइन्के लग हो, जेने यी लरकनके हस विश्वासयोग्य और नम्र बताँ।"

23 तब् येशू अपन चेलनहे कलाँ, "जात्तिके, मै तुहुरिन्हे कहतुँ, धनी मनैनहे परमेश्वरके राजमे पैँठ्ना महा कर्रा बा! 24 फेनदोस्रे मै तुहुरिन्हे कहतुँ, ऊँटवाहे सुईक नाखा सोज निकरना कर्रा बा। पर एकथो धनी मनैयक लग परमेश्वरके राजमे जैना यिहिसे फेन धेउर कर्रा बा।" 25 जब चेलनके यी सुन्लाँ, ते ओइने आकुर धेउर अचम्ममे परगिलाँ। और ओइने एकदोसर जहनसे कहे लग्लाँ, "यकर मतलब यी हो कि किहुहे फेन ओइन्के पापके लग सजाय हुइनासे केऊ नै बँचाई सेकी।" 26 येशू ओइन्हे हेरके कलाँ, "मनैनके लग यी बात असम्भव बा। पर परमेश्वरके लग सक्कु बात सम्भव बा।"

5 हे मोरिक प्रिय भैयो, सुनो, परमेश्वर यी संसारमे गरीब मनैनहे बहुत विश्वास देले बताँ। और परमेश्वर ओइन्से यी वाचा कर्ले बताँ कि ऊ ओइन्हे अपन राजके उत्तराधिकारी बनैहीँ। और उ सक्कुहुनहे फेन जेनहे परमेश्वर प्रेम करथाँ।

21 "महिन्हे ‘प्रभु, प्रभु’ कहुइया सक्कु जाने स्वर्गक राजमे जाई नै भेटैहीँ। स्वर्गमे रहुइया मोरिक बाबक इच्छा पालन करुइया मनैया किल परमेश्वरके राजमे जाई भेटाई।

19 तबेकमारे जे यी छुटिसे छुटी आज्ञामेसे कौनो एकथोहे फेन पालन नै करी, और मनैनहे ओस्तेहेँ करक सिखाई कलेसे परमेश्वरके राजमे ऊ सक्कुहुनसे छुटी कहलाजाई। पर जे फेन ओकर पालन करी और मनैनहे फेन ओस्तेहेँ सिखाई, वहे परमेश्वरके राजमे सक्कुहुनसे भारी कहलाजाई। 20 काकरेकी मै तुहुरिन्हे कहतुँ, कि यदि तुहुरे यहूदी कानुनके गुरुनसे और फरिसीनसे मजासे कानुन पालन नै करबो कलेसे तुहुरे स्वर्गक राजमे कबु जाई नै सेक्बो।"

9 "पर तुहुरे असिके प्राथना करहो:

‘हे हमार बाबा,

जे स्वर्गमे बतो,

तोहाँर नाउँ पवित्र मानजाए।

10 तोहाँर राज आए।

तोहाँरिक इच्छा जसिन स्वर्गमे बा,

ओस्तेहेँ यी पृथ्वीमे पूरा होए।

डुब्कि देहुइया यूहन्ना

1 वहे समयमे डुब्कि देहुइया यूहन्ना यहूदिया प्रदेशके उजाड़-ठाउँमे आइल, और असिक कती प्रचार करे लागल, 2 "अपन मन बद्लो और पाप करना छोरदेऊ, काकरेकी परमेश्वरके राज लग्गेहेँ आगिल बा।"

17 तब्बेहेँसे प्रचार कर्ती येशू कहे लग्लाँ, "परमेश्वरके राज लग्गेहेँ आगिल बा। अपन मन बद्लो और पाप करना छोरदेऊ।"

7 ‘स्वर्गक राज लग्गेहेँ आगिल बा,’ कती प्रचार करो।

11 मै तुहुरिन्हे कहतुँ, पूरुव और पश्छिउँ ओहोँरसे यहूदी और बहुत्ते गैर-यहूदी मनै अइहीँ। और अब्राहाम, इसहाक और याकूबके संग स्वर्गक राजके खाना खाई बैठिहीँ।

11 "जात्तिके, मै तुहुरिन्हे कहतुँ, जन्नीकमेसे जल्मलहुँक्रिहिनमे डुब्कि-देहुइया यूहन्नासे महान दोसुर केऊ नै हुइल हो। तभुन फेन परमेश्वरके राजमे जे सक्कुहुनसे छुटी बा, ऊ उहिसे आकुर महान हो। 12 जबसे डुब्कि-देहुइया यूहन्ना प्रचार करना सुरु करल, उ समयसे अभिनसम स्वर्गक राज जोरसे आघे बह्रता, और हिंसक मनै यिहिहे नाश करना कोशिस करतताँ।

28 तबेकमारे हिलाई नै सेकजैना राज भेटैलक ओहोँरसे हम्रे परमेश्वरहे धन्यवाद देहे परत। तबेकमारे हम्रे भक्ति और डरसे परमेश्वरहे ग्रहणयोग्य आराधना चह्राई, जिहिसे ऊ खुशी हुइथाँ। 29 काकरेकी हमार परमेश्वर भसम परुइया आगी हस हुइताँ।

10 तबेकमारे हे मोरिक विश्वासी भैयो, अपनहे और दोसुर मनैनहे यी साबित करो कि परमेश्वर जात्तिकमे तुहुरिन्हे हुँकार अनुशरण करक लग बलाइल बताँ। और तुहुरिन्हे हुँकार मनै हुइक लग रोजल बताँ। यदि तुहुरे यी गुण स्वीकार कर्लो कलेसे तुहुरे ख्रीष्टहे भरोसा करना कबु नै छोर्बो।

11 और ओक्रेहे संगसंगे परमेश्वर तुहुरिन्हे उ येशू ख्रीष्टके रहल राज्यमे भव्य स्वागत करहीँ, जे हमार प्रभु और मुक्तिदाता हुइँत। ऊ वहाँ सदामानके लग रज्वा होके राज करहीँ।

18 और प्रभु महिन्हे सक्कु खराब कामसे छुटैहीँ। ऊ महिन्हे बँचाके स्वर्गमे लैजिहीँ, जहाँ ऊ रज्वक रुपमे राज करथाँ। हुँकार महिमा सदासर्वदा हुइती रहे। आमेन! (यकर मतलब हुइत, अस्तेहेँ होए।)

धनहे धरना ठाउँ

32 येशू कलाँ, "मोरिक रेखदेखमे तुहुरे एकथो छुटिमुती भेँरीनके बगाल हस बतो, तबेकमारे कौनो फेन बातसे ना डराऊ! काकरेकी परमेश्वर बाबा तुहुरिन्हे राज देहक लग खुशी बा।

5 काकरेकी तुहुरे मजासे जन्थो कि कौनो छिनार काम करना मनैया, या अशुद्ध काम करना मनैया, या लाल्ची मनैया एकथो उ मूर्ति पुजुइया हस हो, जेने यी संसारके चिजहे आराधना करथाँ। ओइने कबु फेन ख्रीष्ट और परमेश्वरके राजमे हकदार नै बन्हीँ।