Reino dos céus

44 "Obio Ubọñ Abasi etie nte ñkpọuto emi owo okutde nte ọbuhọde ke isọñ iñwañ, ndien enye otim ofuk enim, ndien ke idaraesit enye aka akanyam kpukpru se enye ekenyenede ada edep iñwañ oro."

45 "Ñko, Obio Ubọñ Abasi ebiet anyam urua emi oyomde mme nsọñurua itiat; 46 ndien ke enye ama okokut eti esie, emi ọsọñde urua, enye akanyam kpukpru inyene esie ada edep enye."

31 Enye onyuñ otop ñke efen ọnọ mmọ, ete: "Obio Ubọñ Abasi etie nte ñkpasip ofriyo kiet, emi owo ọtọde ke iñwañ esie. 32 Enye ekpri akan ke otu mme ñkpasip, edi ke ini enye ọkọride enye akabade edi akamba eto emi mme inuen enyọñ ekemede ndibọp efọk, ñnyuñ nduñ ke esit."

33 Enye afiak otop ñke efen, ete, "Eda Obio Ubọñ Abasi edomo ye ibọk unam uyo emi ñwan odomode onyuñ abuak ke ndom uyo ndinam enye emenerede idem, emi enye onyuñ abuakde kpukpru tutu enye abuaha ofuri ofuri ye ndom uyo."

24 Se ñke efen mi emi Jisọs akadade ekpep ñkpọ abaña Obio Ubọñ Abasi: "Obio Ubọñ Abasi etie nte ọtọ iñwañ emi ọtọde nti ñkpasip ke iñwañ esie. 25 Edi ke okoneyo usen kiet, nte kpukpru owo enade ede idap, asua esie edi editọ mme ndiọi ñkpasip abuak ye nti ñkpasip ibokpot esie, ndien okokure enye ọwọrọ ọkpọñ iñwañ oro. 26 Ndien kadaña emi nti ñkpasip etọñọde ndikọri mme ndiọi ñkpasip oro enyuñ ekọri ye mmọ ukem ukem."

27 Mme anam utom ke iñwañ edisian enyene iñwañ, ete, "Ete, iñwañ fo emi afo ọkọtọde nti mfri, eyeyọhọ idahaemi ye mme mbaraekpe."

28 Ndien enye ama ọbọrọ ete, "Asua mi anam oro." Mmọ ebup enye ete, "Nte ñnyin iwubede kpukpru mmọ ifep?"

29 "Edi Enye ama ọbọrọ mmọ, ete Baba-o, mbak mbufo ediwot mme mmọ eken edide nti mfri ibokpot ke edinam ntre. 30 Eyak kpukpru mmọ ekọri ebiet kiet tutu osim usen ñkpeñe, ndien ñyedọhọ mme ekpeñe ibokpot esat nti esioño enyuñ etebe mmọ ekọñ ke enyọñ ikañ, ndien efọp kpukpru mme ndiọi ñkpasip."

36 Ke Enye ama akadaha ọkpọñ otu owo ke añwa, Enye ama oduk ufọk, ndien mme mbet Esie ema edidọhọ Enye ete, yak Enye anam mmimọ ifiọk se ñke ndiọi ñkpasip iñwañ oro ọwọrọde.

37 Enye ama ọbọrọ mmọ ete, "Enye emi ọkọtọde nti ñkpasip edi Eyen Owo (Jisọs). 38 Iñwañ oro edi ererimbot; ndien nti ñkpasip edi nditọ Obio Ubọñ Abasi, ndiọi ñkpasip edi nditọ andidiọk (Setan). 39 Asua emi ọkọtọde ndiọi ñkpasip abuak edi Setan; ini idọk edi utit ererimbot; ndien mme ekpeñe ibokpot edi mme isuñutom Abasi (mme Enjel)."

40 Nte esatde ndiọi ñkpasip esioño enyuñ efọp ke ikañ, kpa ntre ke utit ofuri ererimbot editie, 41 Eyen owo eyedọñ mme asañautom Abasi (enjel) Esie, ndien mmọ eyewubede kpukpru mme ñkpọ emi adade owo esin ke idiọkñkpọ, ye mme mmọ emi enamde idiọk ido ke Obio Ubọñ Esie osioño, 42 enyuñ etomo mmọ edọñ ke akwa edeme ikañ emi asakde, ke ebiet emi ntuaña ye ntaedet edidude. 43 Ndien mme ndinen owo eyeyama nte utin usenubọk ke Obio Ubọñ Ete mmọ. Enye emi enyenede utọñ yak enye okop.

47 "Utọñọntak ñko, eda Obio Ubọñ Abasi edomo ye mme ọkọ iyak emi mi etopde iyire mmọ efuk ke inyañ ibom, ndien emum mme nsio nsio oruk iyak. 48 Ndien ke iyire ama ọkọyọhọ, mmọ eduri edọk obot, enyuñ etọñọ ndisat iyak kiet kiet ke iyire nsioño, ndien etañ kpukpru se ifọnde edọñ ke akpasa enyuñ etomo mmọ emi mifọnke eduọñọ. 49 Emi edi se iditibede ke utit ererimbot. Mme Enjel eyesuhọde edi, edibahade mme ndiọi owo ye nti owo. 50 Ndien etomo mme ndiọi owo edọñ ke akwa edeme ikañ, ke ebiet emi ntuaña ye ntaedet edidude."

3 "Ọfọfọn ọnọ mmọ emi edide ubuene ke spirit,

koro Obio Ubọñ Abasi enyenede mmọ;

4 Ọfọfọn ọnọ mmọ emi efuhọde,

koro edidọñde mmọ esit,

5 Ọfọfọn ọnọ mmọ emi enyenede ifure ifure ido,

koro mmọ edidade isọñ inyene;

6 Ọfọfọn ọnọ mmọ emi ekopde biọñ ye nsatitọñ kabaña edinen ido,

koro edinamde mmọ eyuhọ;

7 Ọfọfọn ọnọ mmọ emi etuade owo mbọm,

koro eyetua mmọ mbọm,

8 Ọfọfọn ọnọ mmọ emi esit mmọ asanade,

koro mmọ eyekut Abasi;

9 Ọfọfọn ọnọ mme anam emem,

koro eyekot mmọ nditọ Abasi;

10 Ọfọfọn ọnọ mmọ oro ekọbọde mmọ ke ntak eti edu uwem,

koro Obio Ubọñ Abasi enyenede mmọ.

11 Ọfọfọn ọnọ mbufo, ke ini mme owo esabarede, enyuñ ekọbọde mbufo, enyuñ etiñ mme nsionsio ndiọi ikọ ebaña mbufo ke nsu ke ntak Mi. 12 Enem esit, enyuñ edara eti eti, koro utib mbufo okponde ke enyọñ, koro kpa ntem ke mme owo ekekọbọ mme Asiak Uduak Abasi emi ekebemde mbufo iso.

Etie Nte Ñkpri Nditọ

1 Kpa ke ini oro mbet ema ebine Jisọs ekebup enye ete, "Anie edikpon ikan ke Obio Ubọñ Abasi?"

2 Jisọs ama okot ekpri eyenọwọñ onyuñ anam enye ada ke ufọt mmọ. 3 Onyuñ ọdọhọ ete, "Kakpan, ke ndọhọ mbufo nte, ibọhọke mbufo ekabade, enyuñ etie nte ñkpri nditọ, mbufo ididukke Obio Ubọñ Abasi. 4 Ke ntre, owo ekededi emi ọsuhọrede idem esie, etie nte ekpri eyenọwọñ emi, kpa enye okpon akan ke Obio Ubọñ Abasi.

14 Jisọs ama ọdọhọ, ete, "Eyak ñkpri nditọ etiene Mi, ekukpan mmọ, koro Obio Ubọñ Abasi enyenede utọ mmọ emi."

23 Do ke Jisọs ọkọdọhọ mbet Esie ete, "Ami ntiñ akpanikọ nnọ mbufo nte ke edi ata ọkpọsọñ ñkpọ owo inyene ndiduk Obio Ubọñ Abasi. 24 Ami mfiak ndọhọ mbufo nte ke edi mmemmem ñkpọ enañ ndibe ke odudu abiabon akan owo inyene ndiduk Obio Ubọñ Abasi."

25 Ndien ke ini mme mbet ekopde ikọ emi idem ama akpa mmọ eti eti, ndien mmọ ema ebup ete, "Anie ndien ke ekeme ndinyaña?"

26 Edi Jisọs owuk enyin ese mmọ, onyuñ ọdọhọ mmọ ete, "Owo ikemeke ndinam emi, edi Abasi ekeme ndinam kpukpru ñkpọ."

5 Ekpañ utọñ, ndima nditọ ete mi! Nte Abasi imekke mme mbon emi edide ubuene ke enyin mbon ererimbot man mmọ edi mbon emi Enye ọkọñwọñọde edi imọ ke mbuotidem enyuñ eda obio ubọñ emi enyene?

21 Idighe kpukpru mmọ emi ekotde Mi ete, Ọbọñ, Ọbọñ, ediduk ke Obio Ubọñ Abasi; edi enyemi akade iso ndinam uyo Ete Mi emi odude ke enyọñ.

19 Ke ntre, edieke owo ekededi abiatde andikpri ñkan ke otu mme ibet onyuñ ekpepde mbon efen ndinam ntre, enye eyedi andikpri ñkan ke Obio Ubọñ Abasi. Edi ama edi mmọ emi ekpepde ndien enyuñ enam se ibet etemede, mmọ eyekpon ke Obio Ubọñ Abasi.

20 Edi Ami nduri mbufo utọñ nte, ibọhọke nti ido mbufo ekpon ekan eke mme Farisi ye eke mme ada ibuot ukara mme Ju, mbufo idikemeke ke baba usuñ ndomokiet ndiduk ke Obio Ubọñ Abasi.

9 "Ebọñ akam ndien ntem ete, Ete ñnyin emi odude ke enyọñ, yak ikpono Enyiñ Fo: 10 Yak Obio Ubọñ Fo edi, yak inam uduak Fo ke isọñ, nte emi enamde ke enyọñ;

Jọn Babtis Ọtọñọ Utom Esie

1 Ke mme usen oro Jọn Babtis ama ọtọñọ ndikwọrọ ikọ ke isọñ utatan Judia, ete: 2 "Mbufo ekabade esit, koro Obio Ubọñ Abasi ekpere."

17 Ọtọñọde ke ini oro; Jisọs ama ọtọñọ ndikwọrọ etop Esie ete, "Mbufo ekabade esit koro Obio Ubọñ Abasi ekpere."

7 Eka ekenam mmọ efiọk ete ke Obio Ubọñ Abasi ekpere.

11 Ndien Ami ndọhọ mbufo nte ke ediwak owo eyeto ke edem usiahautin, ye ke edem usoputin, editie ye Ebraham ye Aisik ye Jekọb ke Obio Ubọñ Abasi.

11 Ke akpanikọ ke ndọhọ mbufo nte, ke otu mme mmọ emi iban emande owo baba kiet akananam iduhọ uwem emi okponde akan Jọn Baptis. Edi enye emi ekpride akan ke Obio Ubọñ Abasi okpon akan enye. 12 Ọtọñọde ke ini Jọn Babtis tutu osim emi, Obio Ubọñ Abasi ke akaka iso ye odudu ndien mbio odudu emum enye ke nsọñubọk.

28 Eyak ñnyin inyene esit ekọm, ndien, koro ñnyin ibọpde obio ubọñ emi ñkpọ mikemeke ndinyeñe. Eyak ñnyin inyene esit ekọm, inyuñ ituak ibuot inọ Abasi ke usuñ emi edinemde Enye esit, ye ukpono ye ndik. 29 Koro Abasi ñnyin edi ikañ emi atadeta ñkpọ abiat.

10 Ke ntre, nditọ ete mi, eneñerede esin ifik eti eti ndinam ikot emi Abasi okokotde mbufo ye edimek emi Abasi ekemekde mbufo edi se mbufo edade esin ke edinam kpukpru usen, edieke mbufo enamde ntre, mbufo ididuọhọ ikpọñ usuñ. 11 Ke usuñ emi, eyenọ mbufo ọyọhọ unen ndiduk ke nsinsi Obio Ubọñ Ọbọñ ye Andinyaña ñnyin Jisọs Kraist.

18 Ndien Abasi eyefak mi osio ke kpukpru oburobut ñkpọ, onyuñ ada mi aka ke Obio Ubọñ Esie ke enyọñ. Yak ubọñ enyene Enye ke nsinsi nsinsi! Amen.

32 "Ekufehe ndik, ekpri otu erọñ, koro edi inemesit Ete mbufo ndinọ mbufo Obio Ubọñ.

5 Akpana mbufo etim efiọk emi ete, ke baba owo ndomokiet emi edide owo use, owo emi misanake mme owo idiọkitọñ (koro idiọkitọñ edide edikpono ndem) idinyeneke udeme ke Obio Ubọñ Kraist ye eke Abasi.