Reino dos céus

Muhwano gwa chinu cha galama chochifihilwe.

44 Wuntsajila wa Mulungu wihwana na chinu cha galama ngomi chochifilwe mu mugunda. Munu yumwe akachiwonaje chinu icho akahechelelaje ndala hela na kuchifiha, akabitaje kugutsa finu fyeka fyoavaga nafyo ili akagule mugunda gula.

Wuhwano gwa chinu cha galama ngomi

45 Kaha Wuntsajila wa Mulungu wihwana na munu yumwe yo asakaga chinu cha galama ngomi cho chinchemwa lulu.

46 Hoavaga kuyipata lulu yimwe ya galama ngomi, akagutsaje chila chinu cho avaga nacho akabitaje kuyigula.

Muhwano gwa nyadikwa ya mubichi gwa muhaladali

31 Yesu akawilaje kulonga nawo kwa mihwano jinji kuta, "Wuntsajila wa Mulungu wihwanite na munu yo ategwe nyadikwa ndodo yoyinchemwa haladali na kubita kuyala mu mugunda gwake. 32 Nyadikwa iyo ya muhaladali nayivaje ndodo kulutila nyadikwa tseka, lechelelo manyi yote na kukalagala yivaga ngomi kulutila mboga tseka, na kuva mubichi mukomi mbaka fideje fya kululanga fitsengaga fifulya mu miputi jake."

Muhwano gwa hamila

33 Kaha Yesu akavalonjelaje muhwano gunji kuta, "Wuntsajila wa Mulungu wihwanite na mudala yumwe yo atweye hamila na kuyihantsa mu madebe gadatu ga wuse wa ngano, na wuse weka wukatunaje."

Muhwano gwa misoli

24 Yesu akavalonjelaje vanu muhwano gunji kuta, "Wuntsajila wa kilanga wihwana na munu yo apandite nyadikwa nofu mu mugunda gwake gwa wuhemba."

25 "Lechelelo hachilo vanu hovavaga vavasise mutelani vake akatsaje na kuyala mihembahemba hagati ha wuhemba na kuwuka. 26 Ihyo lelo hambele wuhemba howavaga kukalagala na kwantsa kwalula, mihembahemba najo jikatselanikaje. 27 Vatantsi va munya mugunda vakabitaje kumuputsa munya mugunda kuta Mutwa, si tukali tumitsitse nyadikwa nofu mu mugunda gwako, ino lelo mihembahemba jihumye kwiya?" 28 Nayo munya mugunda akavalonjelaje, "Mutelani yo ayatsile mihembahemba. Ihyo lelo vatatsi vake vakawilaje kumuputsa kuta un’gana tubite tukajing’ule? 29 Nayo akavajibulaje kuta, mujileche kwasawuli manyi mujing’ule mukung’ula mihembahemba na filyo. 30 Mujileche jikalagale hohamwe mbaka chipindi cha kubeta, iho ho nguvalonjela mujikunje tandi mihembahemba na kujinyanya. Kaha musogole wuhemba na kuwuvika mukano yangu."

Yesu an’dadambula muhwano gwa mihembahemba

36 Hambele Yesu akavalagaje vanu na kwinjila mu nyumba, vadahitswa vake vakamufwataje na kumuputsa, "Utudadambulile gula muhwano gwa mihembahemba ja kumugunda." 37 Yesu akavalonjelaje, "Muyali va tsila nyadikwa nofu yo Mwana va Munu. 38 Gula mugunda yo inyi. Nyadikwa nofu wo vanu vala va Wuntsajila wa Mulungu. Lechelelo mihembahemba wo vanu vala va Lihoka 39 Yula mutelani yoayatsile mihembahemba lyo Lihoka. Chipindi cha kubeta cho chipindi cha wudugo wa inyi, na vala vabetaji wo vatantsi va Kilanga va Mulungu. 40 Kota hila mihembahemba fyo jikungwaga na kunyanywa mumoto, ho hihyo fyo yikuva hachipindi cha wudugo wa inyi. 41 Mwana va Munu akuvalajitsa vatantsi vake va kilanga, nawo vakuvakong’asa kuhuma mu Wuntsajila wake vanu vala wovanguvambutsa vanu vadite ndongwa ntsibi, hamwe na vala veka wovan’dita ndongwa ntsibi. 42 Nawo vakutagwa mumoto mukali gwa siku tseka go sigutsimikaga, uko ko vakuvemba na kugwegwetsula mino. 43 Ihyo, vala wo van’dita kota fyo an’gana Mulungu wakuvala kota litsuva mu Wuntsajila wa Dada vawo." Yesu akasindaje kwa kuvalonjela kuta, munya mapulichilo ga kuhulichila na ahuliche.

Madahitso ga nyafu tsa kulovela somba

47 Kaha Wuntsajila wa Mulungu wihwana na waafu wo wutotsitswe mu lilamba na wukagwilitsaje somba tsa chila ayina. 48 Wafu howavaga kumema valovi vakawukwejelaje kulubali, vakikalisaje na kuhagula somba nofu vakatsisopaje mu mutumbwi gwawo, na jila mitsumbuli vakajidibulaje.

49 Hohihyo fyo yikuva ha wudugo wa inyi. Vatantsi va Kilanga va Mulungu ho vakutsa kuvabagula vanu wovan’dita ndongwa ntsibi na wovan’dita ndongwa tsa Mulungu. 50 Nawo vanu wovan’dita ndongwa ntsibi vakavatagaje mulitanuli lya mumoto mukali gwa siku tseka go sigutsimikaga, uko kovakuvemba na kugwegwetsula mino.

Wusangalo wa wukweli

3 "Vaditilwe wuwuya na Mulungu vanu vala wo vangumuhuvila Mulungu,

Kwasawuli Wuntsajila wa Mulungu wukuva wawo.

4 Vaditilwe wuwuya na Mulungu vanu vanya wususutalo,

Kwasawuli iwo vakuhongetswa."

5 "Vaditilwe wuwuya na Mulungu vanu vanya wudeche,

Kwasawuli iwo vakupelwa inyi na Mulungu yive yawo.

6 Vaditilwe wuwuya na Mulungu vanu iwo wovan’gana kudita ndongwa tsa Mulungu,

Kwasawuli Mulungu akuvatanga kudita ihyo."

7 "Vaditilwe wuwuya na Mulungu vanu vanya lusungu,

Kwasawuli iwo vakuhulumilwa na Mulungu.

8 Vaditilwe wuwuya na Mulungu vanu vanya numbula tso tsilihela wubi,

Kwasawuli iwo vakumuwona Mulungu."

9 "Vaditilwe wuwuya na Mulungu vanu wo vanleta wusichimafu,

Kwasawuli iwo vakuchemwa vana va Mulungu.

10 Vaditilwe wuwuya na Mulungu vanu wo vankodwa, kwasawuli ya kudita hila fyo an’gana Mulungu,

Kwasawuli Wuntsajila wa Mulungu wukuva wawo."

11 Mutambichilwe henye yo munligwa, na kukodwa, na kulongwa fibi na vanu, kwasawuli ya heni. 12 Musangalalaje na kuhechelela, kwasawuli chifunje chenyu chikuva chikomi kilanga kwa Mulungu. Kwasawuli hohihyo fyo vavaditye valoli va Mulungu va katali.

Nani yo muvina ku Wuntsajila wa Mulungu

1 Luvala lulo vadahitswa vake vakabitaje kwa Yesu vakamuputsaje kuta, "Nani yo muvina ku Wuntsajila wa Mulungu?" 2 Yesu akamuchemaje mwana yumwe na kumuvika hagati hao akalongaje, 3 "Ntsinkuvalonjela wukweli kuta, manyi muleche kugaluka kuhuma mu ndongwa tsenyu ntsibi, na kuva kota vana vadodo, nachene simukwinjila ku Wuntsajila wa Mulungu. 4 Munu yoyuve yo akwika kota mwana yuno, yo akuva muvina kulutila veka ku Wuntsajila wa Mulungu.

14 Yesu akavalonjelaje vadahitswa vake kuta, "Muvaleche vana vadodo vatse kwa heni, mwalahogola kuvalemetsa kwasawuli Wuntsajila wa Mulungu wo wavala vanu wo vanakota vana vano."

23 Ihyo Yesu akavalonjelaje vadahitswa vake, "Ntsinguvalonjela wukweli kuta, kukuva na wutalamu kwa munu mufuchifu kwinjila ku Wuntsajila wa Mulungu. 24 Ntsinguvalonjela kahi, kukuva na wupefu kwa linyama likomi lyolinchemwa ngamiya kupuluta mukanang’ana ka sing’ano kuliko munu mufuchifu kwinjila ku Wuntsajila wa Mulungu."

25 Vadahitswa vake hovavaga kuhulika ihyo, vakapomokaje ndalahela na kiputsa kuta, "Mbe, kwa lulongwa luno munu vachi yo akuvetsa kukuluka?"

26 Yesu akavakangatsilaje miho na kuvalonjela, "Lulongwa luno lukuva lutalamu kwa vanu, lechelelo ndongwa tseka tsivaga mefu kwa Mulungu."

Kukanwa na Mulungu

21 "Siyo chila munu yo anyema Mutwa, Mutwa, yo akwinjila mu Wuntsajila wa Mulungu. Lechelelo munu yula yo akudita ndongwa tso an’gana Dada vangu yo ali Kilanga."

19 Munu yo yuve yo akulema kwichila kudita nambe lulongwa ludodo lwa malajitso ga Mulungu, na kuvadahitsa vanu vanji valeche kudita ihyo, munu uyo akuchemwa mudodo nachene mu Wuntsajila wa Mulungu. Lechelelo munu yo yuve yo akudita malajitso ga Mulungu na kugadahitsa, akuchemwa muvina ku Wuntsajila wa Mulungu. 20 Kaha ntsinguvalonjela kuta, manyi kudita kwenyu kota fyo an’gana Mulungu, sinambe kulutile kota fyo van’dita vadahitsi va malajitso ga Musa na Vafwalisayo, nachene simu kwinjila ku Wuntsajila wa Mulungu."

9 Henye mun’ganika kusuka hino, Dada vetu va Kilanga, Litawa lyako litsumitswe, 10 Wuntsajila wako wutse, choun’gana chiditwe mu inyi kota uko kilanga.

Ndongwa nofu tso avikwe Yohana Mubatitsi

1 Ihyo ho avaga Yohana mubatitsi kuhumila, avaga anvikula Ndongwa Nofu mu mbuga ya Wuyawudi na kulonga, 2 "Mupituche na kutsileka ndongwa tsenyu ntsibi, kwasawuli wuntsajila wa Mulungu wuli habehi."

17 Kuhuma luvala ulo Yesu antsitse kuvikula kwa kulonga, "Mumupituchile Mulungu na kutsileka ndongwa tsenyu ntsibi, kwasawuli wuntsajila wa Kilanga wuli habehi!"

7 Homukuva muhele muvavikulilaje vanu kuta, Wuntsajila wa Mulungu wulihabehi.

11 Ntsinguvalonjela kuta, "Vanu wolofu vakutsa kuhuma lubali lwa kulihumilo lwa litsuva na kulisotelo lwa litsuva, nawo vakikala hamwe na Ibulahimu, na Yisaka, na Yakobo muliwungo lya kulya na kung’wa ku Wuntsajila wa Mulungu,

11 "Ntsinguvalonjela wukweli kuta, Yohana mubatitsaji yo muvina kulutila vanu veka va chilelo cha mudala, nambe ihyo munu yo akuva mudodo ku Wuntsajila wa Mulungu, uyo yo muvina kulutila Yohana. 12 Luhuma chipindi cha Yohana mubatitsi mbaka sambi, Wuntsajila wa Mulungu vanu vabi vanya wuvetso van’jla kuwusukula ili wuve wawo.

Kivichila wufuchifu wa kilanga kwa Mulungu

32 Mulekaje kuva na muloto henye yomuli chikundi chidodo, kwasawuli Dada venyu awene finofu kuvapela henye wuntsajila wake.

5 Mun’ganika kutsela kuta munu yoyuve yo anvasa na valume na vadala vanji, awu yo an’dita ndongwa tsa kuhonga nyoni, na munya kiwiniwa awu munu yoyuve yo an’dita ndongwa kota itso, siakuhogola kupata chinu chochive mu Wuntsajila wa Chilisito na wa Mulungu. Kwasawuli munu munya kiwiniwa ihwanaga na munu yo angujifugamila milungu jinji.