1 Hotsavaga tsisije siku tsivili lifiche liwungo lya Pasaka na liwungo lya Mabumunda go galihela hamila. Vavina va vatawula nambiko na vadahitsi va malajitso ga Musa, vakantsaje kusaka hila fyovakudita kwa wusugu ili vamubate Yesu na kumukopola. 2 Lechelelo vakalonganaje, "Tuleche kumubata chipindi cha liwungo lya Pasaka, kwasawuli vanu vafuluche valete chitika."

3 Nayo Yesu avaga ku Betsaniya, kukaye kwa Simoni iho hamutalo yoavaga na wutamwa wa wububa. Hovavaga mumetsa vankulya chilyo, akatsaje mudala yumwe yoavaga na kasupa ka alabasita, kanya mafuta manofu go gampuchilila ga nalido ya magobole molofu, akakafungulaje kasupa kala na kumumiminila Yesu mafuta kumutwi. 4 Vanu vamwe yovavaga hono hala vakavipaje na kulongana, "Kwasawuli yachi an'yatsa mafuta gano ga galama ngomi? 5 Iga mafuta gakagafuluche gagutswe kwa magobole molofu ndalahela na magobole igo tukakuvapela vagayu!" Kahi vakamung'anulilaje mudala yula. 6 Lechelelo Yesu akavalonjelaje, "Kwasawuli yachi mungumutifya mudala yuno? Mumuleche! Chinu ichi choan'nditila heni yo chinofu. 7 Vagayu munawo siku tseka, na mufuluche muvatanje chipindi chochive cho mun'gana. Lechelelo simufuluche muve na heni siku tseka. 8 Mudala yuno adisile chila choavetsitse kudita, agumiminilye muvili gwangu mafuta go gan'mpuchilila kwasawuli ya kumbika chang'ani kwa matsiko gangu. 9 Ntsinguvalojelani wukweli, hono hohave mu inyi, vanu ho vakuvikula Ndongwa Nofu tsa Mulungu, na lulongwa ulu loadisile mudala yuno lukutambulwa kwa wiwuko wake."

10 Yuda Isikaliyoti, muyawo va vala vadahitswa kumi na vavili va Yesu, akabitaje kwa vavina va vatawula nambiko na kugana amupituche Yesu. 11 Vavina va vatawula nambiko vaveye kuhulika ndongwa itso vakahechelelaje, vakalaganaje kuta Yuda manyi aludite lulongwa ulo vakumupela magobole. Kuhuma iho Yuda akantsaje kusaka hila fyo akudita lulongwa ulo lwa kumupituka Yesu.

12 Hoyavaga kufika siku ya kwantsa ya liwungo lya mabumunda go galihela hamila, chipindi cho yisintswaga nambiko ya ntsanang'olo ya Pasaka, vadahitswa vake vakamuputsaje Yesu, "Un'gana tubite hono hachi tukuvichile chang'ani hono ho ukulila Pasaka?" 13 Yesu akavatumaje vadahitswa vake vavili na kuvalonjela kuta, "Mubite ku mujini, na uko mukitang'ana na munu yumwe mulume itwisile chitumbe cha malenga. Mumufwate munu uyo, 14 mbaka mu nyumba yo akwinjila, mukamulonjele munya nyumba iyo kuta mudahitsi ampuntsa kuta chilikwiya chumba cha vajentsi ho ngulila chilyo cha Pasaka hamwe na vadahitswa vangu? 15 Munu uyo akuvalajila chumba chikomi cha kugolofwa chochipambitwe chang'ani. Uko ko mutuvichile chang'ani filyo fya Pasaka!" 16 Vala vadahitswa vavili vakawukaje na kubita ku mujini, vakachifikaje chila chinu chili hihilaga kota fyo avalonje Yesu. Vakavikaje chang'ani filyo fya Pasaka. 17 Hoyavaga kufika hamihe, Yesu hamwe na vadahitswa vake kumi na vavili vakatsaje hono iho. 18 Hovavaga vankulya, Yesu akavalonjelaje, "Ntsinguvalonjelani wukweli, muyenyu yumwe yo tunkulya hamwe hano, akumituka." 19 Vadahitswa vake vakasusutalaje, chila munu akamuputsaje Yesu, "Mbe, nguva heni yo ngukupituka?" 20 Yesu akavalonjelaje, "Muyenyu yumwe ha henye kumi na vavili yo akutsangitsa hamwe libumunda mu bakuli, uyo yo akumituka. 21 Heni Mwana va Munu ntsim'bita kufwa kota fyo yandikwe mu Mandiko ga Mulungu kuhuma katali. Lechelelo akudutsa munu yula yo akungaluka heni Mwana va Munu! Yika kuva chiba munu uyo akaave sialeliche!"

22 Hovavaga vankulya, Yesu akategulaje libumunda na kumulumba Mulungu, akalimegasaje na kuvapela vadahitswa vake na kulonga, "Mutegule mulye, ugu go muvili gwangu." 23 Kahi akategulaje chikombe cha difwayi, akamulumbaje Mulungu na kuvapela, nawo veka vakang'welaje chikombe chicho. 24 Yesu akavalonjelaje, "Yino yo danda yangu yoyinlajila lilagano lya Mulungu, yoyim'boholwa kwasawuli ya vanu wolofu. 25 Ntsinguvalonjelani wukweli, sifuluche ntsing'we kaha difwayi ya mutsabibu mbaka siku yila yo ngung'wa difwayi ntsipya ku Wuntsajila wa Mulungu." 26 Yesu hamwe na vadahitswa vake vakimbaje lwimbo lwa kumutsumitsa Mulungu. Vakavaje kusinda kwimba vakawukaje vakabitaje ku Chidunda cha Mitseyituni.

27 Hovavaga mung'asi, Yesu akavalonjelaje vadahitswa vake, "Henye nyeka mukubilima na kundeka ntsiyena, kota fyo yandikwe mu Mandiko ga Mulungu kuta Mulungu alontsile, Ngumutova mudimi natso ng'olo tsikutagalila. 28 Lechelelo honguva kutsilipuka nguvalongola kubita ku Galilaya." 29 Ihyo Petulo akamulonjelaje Yesu, "Nayivaje veka iva vakuleche, heni singuhogola nguleche!" 30 Yesu akamulonjelaje Petulo, "Ntsingukulonjela wukweli, chilo cha munyiguno ntsogolo ying'acha kuvika lwa kavili, heve ukung'ana mala kadatu." 31 Lechelelo Petulo akakangatsaje kulonga, "Nayivaje ntsin'ganika ng'opolwe na heve, singuhogola ngukane. Vala vadahitswa vanji nawo vakalongaje hihyo."

32 Vavaga kufika hono hohanchemwa Getisemane. Yesu akavalonjelaje vadahitswa vake, "Mwikale bahanago, heni sogwe kumusuka Mulungu." 33 Yesu akavategulaje Petulo, na Yakobo, na Yohana akabitaje nawo kutali chidogo. Akantsaje kususutala na kukodeka ndalahela munumbula. 34 Akavalonjelaje, "Wususutafu wo wuli mugati mwa numbula yangu wufuluche wung'opole. Mwikale hono hano na muvaje miho." 35 Yesu akabitaje hatalo chidogo akipunaje hasi, akamusukaje Mulungu, "Mulungu, manyi ugane udite ndeche kukolela chipindi ichi cha ng'odeko." 36 Akalongaje, "Dada vangu, heve unvetsa kudita finu fyeka. Unyetsele chikombe chino cha ng'odeko, lechelelo siyo kota fyontsin'gana heni, yive kota fyoun'gana heve." 37 Yesu akawuyaje kwa vala vadahitswa vake vadatu akavafikaje vavasise. Akamuputsaje Simoni yo achemwaga Petulo, "Simoni uvasise tulo? Mbe, ulemilwe kikala miho nambe kwa lisala limwe?" 38 Yesu akawilaje kuvalonjela vadahitswa vake, "Mwikale miho na kumusuka Mulungu ili muleche kujetswa na ndongwa ntsibi. Henye mun'gana kikangatsa mu majetso, lechelelo mivili jenyu jilihela ludali." 39 Yesu akabitaje kaha kumusuka Mulungu, akawilaje kusuka hihila kota hamutalo. 40 Hoavaga kuwuya lwa kavili akavafikaje vavasise kaha, kwasawuli vavaga na tulo sito ndalahela. Vakalemwaje kumulonjela chinu chochive. 41 Hoavaga kutsa lwa kadatu akavalonjelaje, "Mung'acha munvasa na kwesela? Duve mulamuche! Sala yifisile ya heni Mwana va munu ngubatika na kusindikwa kwa vanu yovan'dita ndongwa ntsibi. 42 Ihyo mwinuche tubite. Mulave munu yula yo akumituka alihabehi."

43 Yesu hoavaga anlonga, akafikaje muyawo wa vala vadahitswa kumi na vavili yo achemwaga Yuda. Kuno ilongwitse na vanu wolofu wovana nyaladi na ndumbi. Vanu iwo vavaga vatumilwe na vavina va vatawula nambiko, na vadahitsi va malajitso ga Musa na vavina veka. 44 Yuda yo angumupituka Yesu, avaga avapelye ndajilo kuta, "Munu yula yo ngumusamusa kwa kumunonela mu ntsetse, uyo yo mumubate na kumusindika kwa Vimilitsi." 45 Yuda avaga kufika hono hala, akabitaje hoavaga Yesu na kumuhejelela, akamuchemaje, "Mudahitsi!" Kaha akamusamusaje kwa kumunonela mu ntsetse. 46 Vanu vala wovatsitse hamwe na Yuda vakamubataje Yesu na kumuvika ha wimilitsi. 47 Lechelelo munu yumwe muyage na vala wovavaga vimite habehi na Yesu, akasomolaje waladi mu yala yake na kumudumula lipulichilo mutantsi va muvina va vatawula nambiko. 48 Yesu akavalonjelaje vanu vala, "Mutsitse na ndumbi na nyaladi ili mumbate heni kota muwumiyani? 49 Siku tseka ntsadahitsaga ha Nyumba ya Mulungu, kwasawuli yachi simwambite hala ho ntsavaga na henye? Lechelelo ndongwa tsino tsinhumila ili Mandiko ga Mulungu gafichile." 50 Ihyo vadahitswa vake veka vakamulekaje na kubilima. 51 Kwavaga na mukwamitsi yumwe yoavaga afwite mugolole ng'ani akamufwataje Yesu. Vala vatelani vakajelaje kumubata, 52 lechelelo mwene akisukulaje na kuvalechela mugolole, akabilimaje kuno alimwatsi.

53 Vanu vala vakamusindikaje Yesu kwa muvina va vatawula nambiko, na vavina va vatawula nambiko, na vavina va Chiyawudi na vadahitsi va malajitso ga Musa vavaga vali hono iho. 54 Petulo nayo akamufwataje Yesu kwa kutali na akinjilaje mugati mwa lwigo lwa nyumba ya muvina va vatawula nambiko, akikalisaje na kota moto hamwe na vimilitsi. 55 Vala vavina va vatawula nambiko na vavina va Lidama lyeka lya Chiyawudi vakasakaje ndongwa tsa wudesi tso tsikudita vamukopole Yesu, lechelelo sivawupasile. 56 Vanu wolofu valontsile ndongwa tsa wudesi, lechelelo ndongwa tsawo tsa wudesi tsatelanaga. 57 Vanji vakimaje na kulonga ndongwa tsa wudesi, 58 "Hetwe twamuhuliche Yesu anlonga kuta ngwananga Nyumba yino ya Mulungu yo yidisilwe na vanu, na siku ya kadatu ngutsenga yinji yo siyitsentsilwe na vanu." 59 Lechelelo na yivaje valontsile ihyo, ndongwa tsawo tsatelanaga. 60 Muvina va vatawula nambiko akimaje hagati ha vanu veka na kumuputsa Yesu, "Mbe, kwasawuli yachi sinambe ulonje chinu chochive? Mbe, sinambe uhuliche chino cho vangukuhiga vanu vano?" 61 Lechelelo Yesu akakatukaje mye! Sialontsile lulongwa loluve. Muvina va vatawula nambiko akamuputsaje kaha, "Mbe heve yo Chilisito Mwana va Mulungu yo antsumitswa?" 62 Yesu akalongaje, "Ena, yo heni. Na henye mukumbona heni Mwana va Munu ntsichite lubali lwa liwoko lililo lya Muntsajila Munya Wuvetso, ntsinkutsa na mafuluka ga kilanga kwa Mulungu." 63 Iho Muvina va vatawula nambiko akademulaje kantsu yo afwite kulajila kuta avipye chila choalontsile Yesu, na kulonga, "Tun'gana wusayidi wachi kaha? 64 Vheka mumuhuliche fyo angumuliga Mulungu! Henye mun'gana tumudite ndawuli?" Vanu veka vakalongaje an'ganika kuhigwa akopolwe. 65 Kahi vamwe vakantsaje kumufunyila mati, vakamugubikaje chitambala kumiho na kwantsa kumutova na kumulonjela kuta, "Lagule nani yoakutofile!" Vamilitsi nawo vakamutovaje makofwi.

66 Petulo hoavaga ang'acha ku lwigo lwa nyumba ya muvina va vatawula nambiko, akatsaje muhintsa yumwe mutantsi va muvina va vatawula nambiko va Chiyawudi. 67 Muhintsa uyo hoavaga kumuwona Petulo ankota moto, akamukangatsilaje miho na kumulonjela, "Hihila heve nave muka hamwe na Yesu va ku Natsaleti." 68 Lechelelo Petulo akakanaje, "Sintsimutsele, na sinambe ntselewe cho unlonga." Kahi Petulo akawukaje na kubita kivala kulwigo. Ntsogolo yikavikaje. 69 Yula muhintsa mupogotsi avaga kumuwona kaha Petulo, akantsaje kuvalonjela vanu wovavaga vimile hala kuta, "Munu yuno akahamwe na Yesu." 70 Lechelelo Petulo akakanaje kaha. Simusika vanu wovavaga vimile iho vakamulonjelaje Petulo, "Nachene heve mukahamwe na Yesu, kwasawuli heve nave uli munu va ku Galilaya." 71 Petulo akantsaje kilaha kuta, "Sintsimutsele munu uyo yomun'ndonjela ndongwa tsake, manyi ntsive ntsimudesi ng'otoche bahanago."

72 Iho ntsogolo yikavikaje lwa kavili. Petulo akiwukaje hila Yesu fyo aliamulonje kuta, "Ying'acha kuvika ntsogolo lwa kavili, ukung'ana heni mala kadatu." Lulongwa ulo lukahomaje mu numbula ya Petulo na akantsaje kuvemba.