1 Siku yimwe Mafwalisayo hamwe na vadahitsi vatunga va malajitso ga Musa wo vavaga vahumye ku Yelusalemu vakakong'asikaje hono hoavaga Yesu. 2 Vakavawonaje vadahitswa vamwe va Yesu vankulya chinya mutsilo, kwasawuli valyaga bila kukalava finofu kota ntsovelo tsa vavina fyo tsigana, 3 kwasawuli Mafwalisayo na Vayawudi veka sivalyaga bila kukalava mawoko mbaka mufisukululu kota hila fyo vaditaga vavina vawo. 4 Kaha sivalyaga chinu chochive cho chigutsilwe kusoko bila kwihofuga. Kaha kuna ntsovelo tsinji ntsolofu tso vanfwata, kota hila kuhofuga fikombe, na fiya, na fyombo fyo fitengenitswe kwa madini ga saba. 5 Ho ihyo Mafwalisayo na vadahitsi va malajitso ga Musa vakamuputsaje Yesu, "Mbe, kwasawuli yachi vadahitswa vako sinambe vafwate ntsovelo tsa vavina, na vankulya bila kukalava fyo yin'ganika?" 6 Yesu akavalonjelaje, "Isaya muloli va Mulungu alontsile wukweli kuta henye muvapunganitsi na kota fyo yandikwe kuta, vanu iva vanyesimilaga kwa ndonga hela, lechelelo numbula tsawo tsilikutali na heni." Alontsile kaha,

7 Vafugamilaga heni bule hela, na madahitso gawo go malagitso ga vanu hela.

8 Henye mugalesile malajitso ga Mulungu na kibata tsovelo tsenyu. 9 Yesu akendelelaje kuvalonjela kuta, "Henye mufitsele kuganyelebuka malajitso ga Mulungu chinya wusugu na kufwata ntsovelo tsenyu! 10 Musa avaga alajitse kuta, walahogola kuvabedala yuwo na dado, nayo munu yoyuve yo akumuliga yuve awu dade yikuganika akopolwe. 11 Lechelelo henye mun'dahitsa vanu kuta, manyi munu ana chinu cho an'ganika kumutanga yuve awu dade, lechelelo manyi alonje chinu icho cho kolibani, chinya kutijila kuta, chinu chino chibangwelwe kwa Mulungu, 12 kwakudita ihyo munguvalemetsa vanu kuvatanga valeli vawo. 13 Ihyo henye mungutsibedala ndongwa tsa Mulungu kwasawuli ya kufwata ntsovelo tsenyu tso mwivichye. Kaha muditaga ndongwa ntsolofu tso tsihwana na itso."

14 Yesu akavachemaje kaha vanu vala wolofu na kuvalonjela, "Munyulikitse chila munu atsele lulongwa luno lo ntsinlonga. 15 Kuduhu chinu cho chifuluche chinjile mugati mwa munu aleche kidichilwa na Mulungu, lechelelo chinu cho chihumaga mugati cho chimuditaga munu aleche kidichilwa na Mulungu." 16 Manyi munu yoyuve ana mapulichilo ga kuhulika na ahuliche lulongwa luno!* 17 Yesu avaga kuwuka na kuvaleka vanu vala wolofu na kwinjila mu nyumba, vadahitswa vake vakamuputsaje mana ya sembeletso yila. 18 Yesu akavalonjelaje, "Mbe, hata henye sinambemulutsele? Simuntsela kuta kuduhu chinu chochive chichinkwinjila mugati mwa munu sichifuluche chimudite munu aleche kidichilwa na Mulungu? 19 Manyi munu alye chinu sichinjilaga mu numbula, kwasawuli chinjilaga mu lileme na hambele chibitaga kucholo." Kwa kulonga ihyo, Yesu adisile chila chilyo chiliwe! 20 Kaha akendelelaje kulonga, "Fila fyo finhuma mugati mwa munu fimuditaga aleche kidichilwa na Mulungu. 21 Tsinlonga hino kwasawuli kuhuma mugati mwa numbula ya munu kuhumaga mahotso mabi, na wusalati, na wuhitsi, na wukopolaji, 22 na waafu, na mbwiniwo ntsa mali, na wubi, na wudesi, na wusuda, na maligo, na mbwinwo tsa waafu, na chidada, na wupufi. 23 Finu fibi ifyo fyeka fihumaga mu numbula ya munu na kumudita aleche kidichilwa na Mulungu."

24 Yesu akawukaje hono hala na kubita ku muji gwa Tilo. Akinjililaje mu nyumba yimwe, nayo siaganaga munu yoyuve atsele kuta avaga mula. Lechelelo akalemwaje kwifiha. 25 Kuko kwavaga na mudala yumwe yoavaga na mwana munya misoka, avaga kuhulika Yesu avaga hono iho, akabitaje hala hoavaga Yesu na kumufugamila. 26 Akamusukaje Yesu amuhetse mwanage misoka, lechelelo mudala uyo siavaga Muyawudi, avaga alelichilye ku Silofoiniche mu inyi ya Siliya. 27 Yesu akamulonjelaje yula mudala, "Valeche vana valongole kwiguta, kwasawuli siyikuva finofu kutola filyo fya vana na kujitotsela mibwa."

28 Lechelelo mudala yula akalongaje, "Ena Mutwa chounlonga chili hihyo, lechelelo hata mibwa jojili hanyi ha metsa yo vankulya vana, jilyaga fyo finkugwa hanyi ha metsa yila."

29 Yesu akamulonjelaje mudala yula, "Kwasawuli ulontsile finofu, uwuye kukaye kwako, lila lisoka mwanga limuhumile mwanago!"

30 Mudala yula akawukaje na kubita kukaye kwake, akamufikaje mwanage avasise mu chinanda na lisoka lila mwanga limuhumile.

31 Yesu akawukaje ku muji gwa Tilo akakolelaje ku Sidoni, akafikaje ku lilamba lya Galilaya na kwinjila hono ho hanchemwa Dekapoli, chinya kutijila miji kumi. 32 Vanu vakamuletelaje Yesu munu chibubwi na kaha avaga mudibafu, vakamugongoletsaje amuvichile mawoko ili kumuponetsa. 33 Nayo Yesu akamutegulaje halubali ha vanu vala wolofu, na akamuvichilaje fyala mu mapulichilo ga munu yula, na kufunya mati, na kudometsa lulimi lwa munu yula. 34 Yesu akalavaje kilanga kwa Mulungu na kwigugumya kwa lusungu, na kumulonjela yula munu, "Efwata," chinya kutijila, "Udinduche!" 35 Luvala lulo mapulichilo na lulimi lwa munu yula fikadindukaje, akantsaje kulonga finofu. 36 Yesu akavalemetsaje vanu vala wolofu valekaje kumulonjela munu yoyuve lulongwa ulo. Lechelelo hila fyoavaga ankangala kuvalemetsa, vene nawo vakangalaga ndalahela kuvavikulila vanu lulongwa ulo. 37 Vanu vavaga kuhulika lulongwa ulo vakapomokaje ndalahela na kulonga, "Chila chinu cho adisile Yesu chavaga chinofu, kwasawuli avadisile vanu vadibafu vahuliche na vabubwi valonje!"