1 Hotsavaga kulutila siku tsitunga, Yesu akawuyaje ku muji gwa Kapelinawumu, na vanu vakatselaje kuta ali hakaye hoikalaga. 2 Luvala lulo vanu wolofu vakakong'anaje mu nyumba yila yoali Yesu mbaka kukavaje kuduhu nyafwasi yoyive, kwasawuli vanu vavaga vamemile mbaka ha lwitsi. Na Yesu akavavikulilaje ndongwa tsa Mulungu. 3 Vakatsaje vanu vatayi yovali vamupisile munu mu lusaga, yoali apotsile muvili gweka vakamuletaje kwa Yesu. 4 Vakalemwaje kumulutitsa halwitsi, kwasawuli ya vanu yovali vamemile mu nyumba yila. Ihyo vakakwinaje kuchanya na kuhima hono hala ho ali Yesu, vakakutubulaje na kumwisa mu lusaga. 5 Yesu avaga kuwona fyo vangumutumbila, akamulonjelaje mutamwa yula yoapotsile muvili, "Mwanangu nguhulumye ndongwa tsako tseka ntsibi." 6 Lechelelo vadahitsi vatunga va malajitso ga Musa yovavaga vichite hono iho vakahotsaje mu numbula tsawo kuta, 7 "Chinu chachi choanlonga munu yuno? Hino angumuliga Mulungu! Kwasawuli kuduhu munu yoyuve yo afuluche kumuhulumila munu ndongwa tsibi, lechelelo Mulungu ng'ani." 8 Luvala lulo Yesu akatselaje cho vahotsaga, nayo akavalonjelaje, "Mbe, ndawuli munhotsa ihyo mu numbula tsenyu? 9 Mbe, chichi cho chipefu? Kumulonjela munu yo apotsile muvili gweka kuta, nguhulumye ndongwa tsako ntsibi, awu kulonga, winuche utole lusaga lwako ubite? 10 Lechelelo ntsin'gana mutsele kuta, heni Mwana va Munu fuluche ntsimuhulumile munu ndongwa tsake tsibi mu inyi." Kaha Yesu akamulonjelaje yula munu yo avaga apotsile muvili, 11 "Ntsingukulonjela, wime utegule lusaga lwako ubite kukaye kwako!" 12 Luvala lulo yula munu yo apotsile muvili akimaje kuno vanu veka vangumulava, akitwikaje lusaga lwake na kuwuka mu nyumba yila. Vanu veka vakapomokaje na kumutsumitsa Mulungu, vakalongaje, "Kuhuma iho sitwali tuluwene lulongwa kota luno!"

13 Yesu akabitaje kahi mu lubali lwa lilamba lya Galilaya. Vanu wolofu vakabitaje kuko, nayo akantsaje kuvadahitsa. 14 Hoavaga an'jenda mulubali mwa lilamba lila, akamuwonaje mukongotsa kodi yo achemwaga Lavi mwana va Alifayo ichite hono ha kukongotsela kodi. Yesu akamulonjelaje, "Ufwate heni!" Lavi akimaje na kumufwata Yesu. 15 Hambele Lavi akamulibulitsaje Yesu na vadahitswa vake kukaye yake alye chilyo cha mumihe. Vakongotsa kodi wolofu, na vanu yo vatselanikaga kuta vanya ndongwa ntsibi vavaga vichite mu metsa hamwe na Yesu na vadahitswa vake kuno vankulya. 16 Lechelelo vadahitsi vatunga va malajitso ga Musa yo vachemwaga Mafwalisayo hovavaga kumuwona Yesu ankulya hamwe na vakongotsa kodi na vanya ndongwa ntsibi, vakavaputsaje vadahitswa vake kuta, "Kwasawuli yachi Yesu ankulya hamwe na vanu vano?"

17 Yesu hoavaga kuhulika ndongwa itso akavalonjelaje, "Vanu wo sinambe vatamiche sivabitaga kwa muganga, wo vabitaga kwa muganga vavaga vatamwa. Heni sintsitsitse kuvachema vanu vawuya ili vatse kwa Mulungu, lechelelo ntitsitse kuvachema wo vanya ndongwa ntsibi."

18 Chipindi chimwe vadahitswa va Yohana na vadahitswa va Mafwalisayo velekaga kulya kwasawuli ya kumusuka Mulungu. Vanu vatunga vakatsaje kumuputsa Yesu, "Kwasawuli yachi vadahitswa va Yohana na va Mafwalisayo valekagaga kulya kwasawuli ya Mulungu, lechelelo vadahitswa vako sinambe valeche kulya kwasawuli ya kumusuka Mulungu?" 19 Yesu akavalonjelaje, "Mbe, vajentsi yo vachemilwe ku litsenjele vafuluche valeche kulya manyi vave hamwe na munya kukwela? Chipindi cheka chovakuva hamwe na munya kukwela sivafuluche valeche kulya!" 20 Lechelelo chikufika chipindi munya kukwela ho akuva alihaduhu, iho ho vakuganika valeche kulya. 21 Kuduhu munu yo afuluche ahoneletse chilaka chipya mu mwenda mulovela. Lechelelo manyi adite ihyo, chila chilaka chipya chikumamuka kuhuma mu mwenda gula mulovela, na hala ho hatubwiche hakuva hakomi. 22 Kaha kuduhu munu yo avikaga difwayi ntsipya mu mifuko misakafu ja nyingo ya ng'olo. Manyi adite ihyo mifuko jila misakafu jikutwadika na difwayi yila yikubohoka. Ihyo difwayi ntsipya yivikwaga mumifuko mipya.

23 Siku ya Weselo wa Vayawudi, Yesu hamwe na vadahitswa vake vavaga vankola hagatinagati ha migunda. Hovavaga van'jenda, vadahitswa vake vakantsaje kupulula maho kota ga wuhemba na kulya. 24 Mafwalisayo vakamuputsaje Yesu, "Kwasawuli yachi vadahitswa vako vampulula maho kota ga wuhemba Siku ya Weselo?" 25 Yesu akavalonjelaje, "Mbe, simulasoma mu Mandiko Mahagulwa chila choadisile Dawudi hamwe na vayage hala ho vavaga na ntsala? 26 Hila fyo inje mugati mwa Nyumba ya Mulungu hala Abiatsali ho avaga muvina va vatawula nambiko, akalyaje na kuvapela vayage mabumunda gala ga wulajilo? Mabumunda go sigaganikaga galiwe na munu yoyuve ila na vatawula nambiko ng'ani?" 27 Kaha Yesu akavalonjelaje Mafwalisayo, "Siku ya Weselo yadisilwe kwasawuli ya kuvamutanga vanu, na siyo vanu kuva vapogotsi va Siku ya Weselo. 28 Kaha heni Mwana va Munu yo Mutwa va Siku ya Weselo."