1 Yesu akantsaje kaha kudahitsa vanu mulubali lwa lilamba lya Galilaya. Vanu wolofu vakamukong'asichilaje, akinjilaje kwikala mu mutumbwi ili vanu valeche kumutifya. Vanu veka vakikalaje mulubali lwa lila lilamba. 2 Avadahitsaga ndongwa ntsolofu kwa mihwano, na mu madahitso gake akavalonjelaje, 3 "Munyulikitse! Mumitsi avaga ahele kumitsa nyadikwa. 4 Iho ho amitsaga, nyadikwa tsinji tsikagwaje mulubali lwa ng'asi, fikatsaje fideje fikatsidobolangaje. 5 Nyadikwa ntsinji tsikagwaje hono ho havaga na lilongo lidodo ho havaga na litalawe, simusika tsikotaje na kwasawuli ya lilongo lila lidodo. 6 Lechelelo litsuva ho lyaveye kuvala, filyo fila fikakalaje kwasawuli ya ndela tsake kuva muchanyamuchanya hela. 7 Ntsinji tsakagwaje mu misati ja mifwa, na jila mifwa jikakalagalaje na kutsipilinga fila filyo na fikalemwaje kulela meche yoyive. 8 Lechelelo nyadikwa tsinji tsikagwaje mu lilongo linofu, ntsikotaje na kukalagala na kulela, yimwe yalelite meche salasini, na yimwe meche sitini, na yinji yikalelaje meche miya moja." 9 Kahi Yesu akavalonjelaje, "Munu munya mapilichilo na ahuliche!"

10 Lechelelo hambele Yesu ho avaga aliyena, vanu vamwiga wo vavaga vamupilime hamwe na vadahitswa vake kumi na vavili, vakatsaje kumuwutsa avalonjele mana tsa jila mihwano. 11 Nayo Yesu akavalonjelaje, "Mulungu avagavye henye nyala tsa kutsela fiho tsa Wuntsajila wake. Lechelelo yo valikivala vanlonjelwa chila chinu kwa mihwano,

12 ili manyi valave,

valeche kudaha.

Kaha vahuliche cho ntsilonga,

valeche kutsela.

Ili valeche kupituka na kuleka ndongwa tsawo ntsibi na Mulungu avahulumile."

13 Kahi Yesu akavaputsaje, "Manyi sinambe mugutsele muhwano guno, mufuluche ndawuli kugutsela muhwano goguve? 14 Mumitsi yo muvikutsi va ndongwa tsa Mulungu. 15 Nyadikwa tso tsigweye halubali lwa ng'asi, tsihwana na vanu vala yo vahuliche ndongwa tsa Mulungu, lechelelo simusika Lihoka likatsitse na kutegula madahitso gala go gamitsitswe mugati mwawo. 16 Nyadikwa tso tsamitsitswe mulitalawe ho hanya lilongo lidodo, tsihwana na vanu vala wovanhulika ndongwa tsa Mulungu, na luvala ulo ho vanhulika vavaga na wusangalo. 17 Lechelelo vitumbilaga kwa chipindi chidodo hela, manyi tsivapate ng'odeko vagotsolaga na kuleka kutsitumbila ndongwa tsa Mulungu, kwasawuli vanakota ndela tso tsili muchanya muchanya hela. Ihyo ndongwa tsa Mulungu sitsingikala mu numbula tsawo. 18 Nyadikwa tso tsamitsitswe mu misati ja mifwa, tsingihwana na vanu vala yo vahuliche ndongwa tsa Mulungu, 19 lechelelo muhwehwe gwa kuhotsa finu fya muinyi, na mbwiniwo tsa mali, na mbwiniwo tsinjitsinji, tsitifitsaga ndongwa tsa Mulungu tso vanuchye vanu vala valeche kudita kota ndongwa tsa Mulungu fyo tsin'gana. 20 Nyadikwa tso tsimitsitswe mu lilongo linofu, tsingihwana na vanu vala yo vahuliche ndongwa tsa Mulungu, na kutsanuchila na kudita kota ndongwa tsa Mulungu fyo tsin'gana, kota hila meche fyo tsilelaga salasini, na tsimwe sitini, na tsinji miya moja."

21 Yesu akendelelaje kuvalonjela, "Mbe, vanu vasaga lusolola na kwinjila nalo mu nyumba na kulugubikitsa mu chiya awu kulufiha mwifungu? Vanu sivaditaga ihyo, lechelelo vavikaga hachanya ha lukantsi. 22 Hohihyo chinu chochive cho chifihilwe chikuwoneka, na chinu chochive cho chigubikwe chikugubulwa na kuva helu. 23 Munu munya mapulichilo na ahuliche!" 24 Yesu akawilaje kulonga, "Muhulikitse finofu chino cho munhulika. Hila fyo ungitawula kuhulikitsa ndongwa tsa Mulungu, hihyo Mulungu akumutanga na kumudita alitsele hilo. 25 Munu yula yo anhulikitsa ndongwa tsa Mulungu na kutsitsela, Mulungu akumutanga na kumudita alitsele hilo. Manyi munu sinambe ahulikitse ndongwa tsa Mulungu, hata tsila ndongwa ndodo tsa Mulungu tso atsitsele akusukulwa."

26 Yesu akendelelaje kulonga, "Wuntsajila wa Mulungu wihwana hino. Munu yumwe amitsitse nyadikwa kumugunda. 27 Hachilo avasaga na mumunyi avaga miho, na kuno nyadikwa tsila tsinkota na kwendelela kukalagala bila mwene kutsela lulongwa ulo fyoluli. 28 Yavaga hihyo kwasawuli lilongo lyene lyotetsaga na kukalagatsa filyo. Fyantsaga na lihamba na hambele fyalulaga maho na hawudugo fivikaga meche. 29 Hambele fikangalaga, na simusika ategulaga sentsa na kuhenga kwasawuli chipindi cha kubeta chifisile."

30 Yesu akavaputsaje, "Mbe, tsiwuhwananitse na chinu chachi Wuntsajila wa Mulungu? Tufuluche tuwulonje chinya ndawuli?" 31 Wuntsajila wa Mulungu wihwana na nyadikwa ya mubichi gwa muhaladali, nyadikwa iyo yo ndodo kulutila nyadikwa tseka tsa mu inyi. 32 Lechelelo manyi yiyalwe, yikalagalaga na kuva libichi likomi kulutila mibichi jeka ja muchinyungu. Mitambi jake jikalagalaga na kuva mikomi mbaka fideje fikatavaje fifulila mu mitambi jake. 33 Yesu akavavikulilaje vanu ndongwa tsake kwa mihwano myolofu kota jino, alongaga nawo chinya ihyo kota hila fyo velewaga ndongwa tsa Mulungu. 34 Yesu si alongaga nawo lulongwa loluve bila mihwano, lechelelo ho avaga hamwe na vadahitswa vake avadadambulilaga chila chinu.

35 Siku yiyila ho yavaga kuva mumihe, Yesu akavalonjelaje vadahitswa vake, "Tulowoche kumwambu gwa lilamba." 36 Duve vakavalekaje vanu vala wolofu, na kubita ku mutumbwi goavaga Yesu, vakawukaje hamwe nayo. Hihila na vanu vanji vavaga hamwe mu mitumbwi jinji mulujendo lula. 37 Hambele yikawugaje ng'ala ngomi na kugakunugitsa mavimbi. Nago gala mavimbi gakagutovaje mutumbwi gula goavaga akwinile Yesu, na mutumbwi gukantsaje kumema malenga. 38 Yesu avaga avasise kumbele mu tumbwi na kuno asegamitse mutwi gwake mu muhagu. Vadahitswa vake vakamulamusaje na kumulonjela, "Mudahitsi mbe, sinambe ulave kuta hetwe tun'yaga mu malenga?" 39 Yesu akalamukaje akaying'anulilaje ng'ala yila ngomi kwa kugalonjela mavimbi gala, "Katuche, mye!" Bahobaho ng'ala yila yikalekaje, kukasichimalaje. 40 Kahi Yesu akavaputsaje vadahitswa vake, "Munkogopa chichi? Mbe, mung'acha mulihela litumbilo?" 41 Vadahitswa va Yesu vakavaje na muloto ndalahela na vakiputsaje, "Mbe, yuno munu vachi, mbaka ng'ala ngomi na mavimbi fingumuhulikitsa?"