1 Yesu hoavaga anhuma ha Nyumba ya Mulungu, mudahitswa vake yumwe akamulonjelaje, "Mudahitsi, lave nyumba tsino fyo tsilifinofu! Lave na maganga gano gogatsentsile nyumba tsino fyogali manofu!" 2 Yesu akamulonjelaje, "Mbe, umpomochela nyumba tsino ngomi? Chila liganga likubomolwa, kuduhu liganga lyo likusigala lyo likuva mwilanga mwa liyage, geka gano gakubomolwa."

3 Hambele Yesu hoavaga ichite muchidunda cha Mitseyituni chochavaga mwambu na mwambu na Nyumba ya Mulungu. Petulo, na Yakobo, na Yohana, na Andeleya vakatsaje kwa wufiho na kumuputsa, 4 "Utulonjele kuta ndongwa itso tsikuhumila hanili? Kaha chinu chachi cho chikuva ndajilo ya kutulajila kuta ndongwa itso tsilihabehi kuhumila?" 5 Yesu akantsaje kuvalonjela, "Mwiyangalilaje, alahogola munu yoyuve kuvadeteletsa. 6 Vanu wolofu vakutsa, kwa Litawa lyangu na kulonga wudesi kuta, Vene yo Chilisito!" Nawo vakuvadeteletsa vanu wolofu. 7 Nanye mukuhulika ndongwa tsa magalu, na fununu tsa magalu, henye mulekaje kutinuka. Kwasawuli tsin'ganika ndogwa itso tsilongole, lechelelo wula wudugo wung'ali. 8 Vanu va inyi yimwe vakwitova na vanu va inyi yinji na wuntsajila wukwitova na wuntsajila wunji, na hono hanjihanji kukuva na makakamo ga inyi, na kukuva na ntsala ngomi. Ndongwa itso tsinhwana kota hila wusungu fyo wulongolaga hala mwana ang'acha kuleleka. 9 "Lechelelo ndongwa itso hotsikuva tsinhumila, henye mwiyangalile! Kwasawuli vanu vakuvasindika mu nyumba tsa wuhigo, na vakuvatova fiboko hono ha kitang'anila Vayawudi. Mukuhigwa kwa vatavala na vantsajila kwasawuli ya heni, ili muvalonjele ndongwa tsa Mulungu. 10 Ndongwa Nofu tsinganika tsilongole kuvikulwa kwa inyi tseka ho wukuva wung'acha kufika wudugo. 11 Iho hovakuva vavabite na kuvasindika ku nyumba tsa wuhigo, mwalahogola kukakama na kuhotsa kuta mukulonga chinu chachi. Kwasawuli Muhe va Mulungu akuvapelani luvala lulo chochin'ganika kulonga. 12 Chipindi icho munyalukolo akumupituka mung'olotse ili akopolwe, na mwana akupitukwa na dade ili akopolwe. Nawo vana vakuvapituka vadadawo na vayuvawo, vakuvatova na kuvakopola. 13 Vanu veka vakuvavipila kwasawuli munfwata heni. Lechelelo munu yo akikangatsa mbaka ku wudugo uyo yo akukuluka.

14 "Iho ho mukuwona Chinu cha Kumuvipitsa Mulungu chili mu Nyumba yake." Vanu yo vali ku Yudeya vabilimilaje kufidunda. Munu yo ansoma an'ganika atsele lulongwa ulo fyoluli. 15 Munu yoyuve yoali kivala kwa nyumba yake alahogola kwinjila mu nyumba na kutegula chinu chochive. 16 Munu yo ali kumugunda alahogola kuwuya kukaye kutegula myenda jake. 17 Vakudutsa vadala vala yo vabofu na vadala yo vankong'etsa mu chipindi icho. 18 Mun'ganika mumusuche Mulungu ili chipindi icho chilekaje kuva chipindi cha chisisima. 19 Chipindi icho kukuva na ng'odeko ngomi yo siyilava yihumye kuhuma iho Mulungu fyo awumbite inyi mbaka sambi, na kaha siyikujela yihumile. 20 Manyi Mutwa aka aleche kutsipungutsa siku itso, kuduhuli munu yoyuve yo akakukuluka. Lechelelo kwasawuli ya vanu vake yo avahagwe, Mutwa akutsipungutsa siku itso. 21 "Chipindi icho manyi munu avalonjele, Mulave, Chilisito yo yuno, awu kuta, Yo yula hala, mulekaje kumutumba munu uyo. 22 Vakuhumila valoli va wudesi wo vakichema kuta, Heni yo Chilisito! Nawo vakudita ndajilo na mitinuso, ili manyi vavetse vavayatse vanu vala yo avahagwe Mulungu. 23 Ihyo henye mun'ganika mwiyangalile, kwasawuli mwanga ntsivalonje ndongwa tseka chang'ani.

24 "Chipindi icho cha ng'odeko ngomi ho chikuva chilutye, litsuva likuva na jitsa na mwetsi si gukuvala. 25 Nyenyetsi tsikugwa kuhuma kilanga, na finu fya kilanga kwa Mulungu fikutigasika. 26 Iho vanu ho vakumbona heni Mwana va Munu ntsinkutsa mu mafuluka kwa wuvetso na wumelemo. 27 Heni nguvatuma vatantsi vangu va kilanga vavakong'ase kuhuma chila lubali lwa inyi vanu yo avahagwe, kuhuma mwantso gwa inyi mbaka wudugo wa inyi."

28 Mwidahitsaje kwa muhwano guno gwa mubichi gwa mutini. Manyi muguwone miputi jake jinlembula mahamba muntsela kuta chifuku chili habehi. 29 Hohihyo manyi mutsiwone ndongwa tsila tso ntsivalonje hamutalo tsinhumila, mutselaje kuta heni Mwana va Munu ntili habehi kuwuya. 30 Ntsinguvalonjelani wukweli, kuta chilelo chino sichi kulutila mbaka ndongwa itso tseka tsihumile. 31 Kilanga na inyi fikulutila, lechelelo ndongwa tsangu sitsikulutila.

32 "Kuduhu munu yoyuve yo antsela siku awu sala kuta yikuva hanili, na vave vatantsi va kilanga va Mulungu, na ntsive heni Mwana va Mulungu, tweka sinambe tutsele, yo an'tsela ndongwa itso yo Dada ng'ani. 33 Mun'ganika mwiyangalilaje na kuva miho, kwasawuli sinambe mutsele holukutsa luvala ulo. 34 Kuwuya kwa heni Mwana va Munu yikuva kota hila munu yo ayilesile kaye yake kwa vatantsi vake na mwene akabitaje kulujendo, kuno chila munu amupelye wuvetso wa kudita katsi, na kumulajitsa mwamilitsi va nyumba yila iyangalilaje na kuva miho. 35 Ihyo muvaje miho, kwasawuli sinambe mutsele hanili ho akuwuya munya nyumba, afuluche awuye hamihe, awu chilo na gati, awu ho tsinvika ntsogolo, awu habehi na kucha. 36 Muvaje miho, manyi atse kwa kutinukitsa alekaje kuvafika muvasise. 37 Lulongwa ulu lo ntsinguvalonjelani henye, lolulo lo ntsinguvalonjela vanu veka, muvaje miho!"