1 Hoyavaga kuva hamilawu, vavina va vatawula nambiko va Chiyawudi, hamwe na vavina veka va Chiyawudi, na vadahitsi va malajitso ga Musa. Vakalaganaje na kumuwopa Yesu, vakamusindikaje kwa Pilato muvina va Chilumi. 2 Pilato akamuwutsaje Yesu, "Mbe, heve yo Muntsajila va Vayawudi?" Yesu akamulonjelaje, "Kota heve fyo unlonga." 3 Nawo vavina va vatawula nambiko vakamuhigaje Yesu kwa ndongwa ntsolofu. 4 Pilato akamuputsaje kaha Yesu, "Mbe, heve ulihela lulongwa loluve lwa kujibula? Lave fyo vangukuhiga kwa ndongwa ntsolofu!" 5 Lechelelo Yesu sialontsile chinu chochive, ihyo Pilato akapomokaje.

6 Chila ha liwungo lya Pasaka, Pilato avaga atsovye kumuwopola muwopwa yumwe yo vakumugana vanu. 7 Chipindi icho kwavaga na munu yumwe muwopwa yo achemwaga Balaba, munu uyo avaga awopitwe mu nyumba ya vawopwa hamwe na vayage kwa nongwa tsinji hamwe na tsa kukopola vanu mu chitika. 8 Vala vanu wolofu vakakong'asikaje kwa Pilato kugana avaditile kota fyo avaditilaga chila mwaka. 9 Pilato akavaputsaje kuta, "Mbe, mun'gana ntsimulechele yuno Muntsajila va Vayawudi?" 10 Pilato alontsile ihyo kwasawuli atselaga kuta vavina va vatawula nambiko vamuletite Yesu kwa mbafya hela. 11 Lechelelo vala vavina va vatawula nambiko vavaga vavakosile vanu vala kuta vagane alechelwe Balaba. 12 Kaha Pilato akavaputsaje vala vanu, "Mun'gana tsimudite ndawuli munu yuno yomungumuchema Muntsajila va Vayawudi?" 13 Vanu veka vakatovaje chiyove kuta, "Muvambe mu musalaba!" 14 Pilato akavaputsaje, "Kwasawuli ya chichi! Mbe, adisile lulongwa lwachi lubi?" Lechelelo vene vakatovaje chiyove, "Muvambe mu musalaba!" 15 Pilato aganaga kuvagan'ya vala vanu, duve akamulechelaje Balaba ahume kuhuma nyumba ya vawopwa. Akavalajitsaje vanu vamutove Yesu mikotya, kahi akamutawulaje Yesu ili vamuvambe mu musalaba.

16 Kahi vimilitsi vakamusindikaje Yesu mbaka mugati mwa nyumba ya chintsajila ya Pilato, nyumba iyo yachemwaga Pulayitoliyo. Mumo vakakong'asaje vimilitsi wolofu. 17 Kaha vakamufwikaje kantsu ya chintsajila, vakabotaje na ng'ata ya mifwa ya chintsajila vakamufwikaje Yesu kumutwi.* 18 Vala vimilitsi vakantsaje kumusamusa, "Kamwene be, muntsajila va Vayawudi!" 19 Vakamutovajetovaje na lugoda kumutwi na kumufunyila mati, vakamufugamilaje na kwipuna halutalo hake. 20 Hovavaga kusinda mbedatsi tsawo, vakamuwopolaje Yesu kantsu ya chintsajila, vakamufwikaje myenda jake. Kahi vakamuhumyaje kivala ili vakamuvambe mu musalaba.

21 Hovavaga mung'asi vakitang'anaje na munu kuhuma Kulene yo achemwaga Simoni, dadawo va Alechitsanda na Lufo, munu uyo avaga anhuma ku mugunda. Nawo vimilitsi vakamulatsimitsaje itwiche musalaba gwa Yesu. 22 Vala vimilitsi vakamusindikaje Yesu mbaka hono ho anchemwa Goligota, chinya kutijila, "Hono ha Chihanga cha munu yo atajiche." 23 Nawo vakamupelaje Yesu difwayi yo yihantsitswe na mugoda go gwachemwaga manemane, lechelelo mwene akalemaje kung'wa. 24 Ihyo vala vimilitsi vakamuvambaje Yesu mu musalaba, na vakagavanaje myenda jake kwa kujitovela simbi ili yilamulwe kuta nani ategule mwenda gwachi. 25 Yavaga kota saa tatu hino hamilawu, iho hovavaga vamuvambite Yesu mu musalaba. 26 Hala ha musalaba vavaga vandiche chila cho vamuhijye kuta, "MUNTSAJILA VA VAYAWUDI." 27 Iho ho vamuvambite Yesu havaga na vawumiyani vavili vavambitwe mu misalaba, yumwe avaga lubali lwake lwa liwoko lililo na yunji lubali lwa liwoko lichiji. 28 Ihyo yikavaje kota fyo yandikwe mu mandiko ga Mulungu kuta, "Vakamuvisile hamwe na vawumiyani!"* 29 Vanu wovavaga vanlutila mung'asi vakamuligaje Yesu, na kutsuntsa mitwi kwa mbedatsi kuno vanlonga, "Bee, heve yo walontsile ukubomola Nyumba ya Mulungu na kuyitsenga kwa siku tsidatu, 30 lelo wikuluse wu mwene, wiche mu musalaba!" 31 Hohihyo nawo vavina va vatawula nambiko hamwe na vadahitsi va malajitso ga Musa vakamubedalaje Yesu kwa kulonga, "Avakuluse vanu vanji, lechelelo sinambe avetse kwikulusa mwene, 32 na kaha alongaga kuta, manyi mwene yo Chilisito, manyi mwene yo Muntsajila va Vaisilaheli! Lelo iche iho ha musalaba na hetwe tukumutumba." Hihila na vanu vala vawumiyani wo vali vavambitwe mu misalaba hamwe na Yesu nawo vakamuligaje.

33 Hoyavaga kufika saa sita mumunyi, jitsa likagubikaje inyi yeka kwa masaa gadatu. 34 Hoyavaga kufika saa tisa mumihe, Yesu akakolaje kwa kulonga kuta, "Eloyi, Eloyi, lama sabachitani?" Chinya kutijila, "Mulungu vangu, Mulungu vangu, mbona undesile?" 35 Vanu vamwe yovavaga vimile vakalongaje, "Mumuhulikitse! Angumuchema Eliya yula yoavaga muloli va Mulungu." 36 Munu yumwe akabilimaje na kutola siponji akayitsabikaje mu difwayi yo yihahile, na kuyivika mu lugoda na kumupela Yesu ang'we, kuno anlongaga kuta, "Lelo tulave manyi Eliya muloli va Mulungu akutsa kumwisa mu musalaba!" 37 Yesu akakolaje kwa wusungu na kutajika. 38 Ihyo lipantsiya lya hono hahagulwa mu Nyumba ya Mulungu, likademukaje fipande fivili luhuma kuchanya mbaka hanyi. 39 Yula muvina va vimilitsi yoavaga imile halutalo ha musalaba gwa Yesu avaga kuhulika lila litsi, na kuwona hila fyo antajika, akalongaje, "Wukweli munu uyu avaga Mwana va Mulungu!" 40 Kaha kwavaga na vadala wo valolaga kwa kutali chila chinu chochahumilaga, na vamwinga vavaga Maliya yo ahumye ku Majidalene, na Salome, na Maliya yuvawo Yakobo mudodo na Jose. 41 Vadala iva wo vala wo vamufwataga Yesu na kumutanga hoavaga ku Galilaya. Kahi kwavaga na vadala vanji wolofu wo vatsitse hamwe na Yesu kuhuma ku Yelusalemu.

42 Yavaga kufika hamihe, na kwasawuli yavaga siku ya kwivika chang'ani kwasawuli ya Siku ya Weselo, 43 akatsaje Yusufu munu va ku Alimataya. Munu uyo avaga jumbe va kuhesimilwa ndalahela, munu va Lidama lya Chiyawudi. Mwene nayo antsindilaga kutsa kwa Wuntsajila wa Mulungu. Akabitaje kwa Pilato bila muloto na kusuka amupele muvili gwa Yesu. 44 Pilato akapomokaje hoavaga kuhulika kuta Yesu mwanga afweye. Akamuchemaje muvina yo avimililaga vimilitsi mya na kumuputsa kuta wukweli Yesu mwanga afweye. 45 Pilato avaga kulonjelwa na yula muvina yo avimililaga vimilitsi mya kuta Yesu afweye, akamulonjelaje Yusufu kuta akatole muvili gula. 46 Ihyo Yusufu akagulaje sanda, akisaje muvili gwa Yesu mu musalaba na kugupilinga mu sanda yila. Akabitaje kuguvika mugati mwa kabuli yoyali yihongulwe mu litalawe. Kahi akabidusaje liganga likomi ha winjililo wa kabuli. 47 Nawo Maliya va ku Majidalene na Maliya yuve va Jose vahawene hono hala ho vavisile muvili gwa Yesu.