1 Yesu na vadahitswa vake vakalowokaje kumwambu gwa lilamba lya Galilaya, vakafikaje ku inyi ya Vajelasi. 2 Iho Yesu ho avaga kwika mu mutumbwi, luvala lulo akitang'anaje na munu yumwe munya lisoka anhuma ku makabuli. 3 Munu uyo ikalaga ku makabuli, na sikwavaga na munu yo avetsaga kumuwopa na yivaje kwa nyololo. 4 Mala tsongofu vanu vamuwopaga magulu na mawoko munu uyo kwa nyololo na pingu. Lechelelo mwene abenangaga pingu itso na kudumulanga nyololo tsila, na kwasawuli iyo kwavaga kuduhu munu yoyuve munya ludali lwa kumwibata. 5 Hamunyi na hachilo ikalaga ku makabuli na ku fidunda, kuno ankola na kitemanga kwa maganga. 6 Hoavaga kumuwona Yesu ang'acha kutali, akamubilimilaje na kumufugamila, 7 na akakolaje, "Heve Yesu mwana va Mulungu va kilanga ndalahela, choun'gana chinu chachi kwa heni? Kwa litawa lya Mulungu ntsingukusuka uleche kung'oda." 8 Lisoka ilyo lyalontsile ihyo kwasawuli Yesu avaga aling'anulye lisoka lila kwa kulilonjela, "Hume kwa munu yuno!" 9 Kaha Yesu akaliwutsaje lisoka lila, "Litawa lyako uli nani?" Nalyo likalongaje, "Litawa lyangu Lijesi, kwasawuli hetwe tuli wolofu!" 10 Misoka jila jikamugongolaje Yesu, aleche kujivinga kivala na inyi yila. 11 Habehi na hono iho havaga na chipinga chikomi cha migubi cho chadimwaga mulubali lwa chidunda. 12 Ihyo misoka ijo jeka jikamugongoletsaje Yesu, "Utuleche tukinjile mumigubi jila." 13 Nayo Yesu akajidikitsaje cho jimulonje. Jila misoka jikamuhumaje na kwinjila mu migubi jila. Chipinga cheka chikikaje luvilo hohamwe ku lweta na kwinjila mu lilamba, jikagabilaje na kufwa, migubi ijo javaga kota elufu tsivili. 14 Vanu yo vajituntsaga migubi jila vakabilimaje, na vakavavikulilaje vanu ndongwa itso ku muji na ku fijiji. Vanu vakatsaje kulava chochihumye. 15 Vanu vala hovavaga kufika kwa Yesu, vakamuwonaje munu yula yo ahumitswe misoka aponile, afwite myenda na kikalisa hasi, vanu vala vakavaje na muloto ndalahela. 16 Vanu veka yo valuwene lulongwa ulo vakavalonjelaje vayawo chila chochamupasile munu yula yoavaga na misoka na chila cho chijipasile migubi jila. 17 Nawo vakamugongolaje Yesu awuche mu inyi yawo. 18 Hala Yesu hoavaga ankwina mu mutumbwi, munu yula yoavaga na misoka iho hamutalo akamusukaje Yesu vabitase. 19 Lechelelo Yesu akamulemetsaje na kumulonjela, "Ubite kukaye kwa vang'olotso, ukavalonjele ndongwa tso akuditye Mutwa Mulungu na hila fyo akuwon'ye lusungu." 20 Ihyo munu yula akawukaje na kwantsa kuvavikulila vanu va hono ho hanchemwa Dekapoli, chinya kutijila miji kumi ndongwa tseka tsila tso amuditye Yesu, na vanu veka vakavaje kuhulika, vakapomokaje.

21 Yesu akalowokaje kaha kumwambu gwa lilamba kwa mutumbwi. Akimaje halubali lwa lilamba, na vanu wolofu vakatsaje hono hoali. 22 Akatsaje munu yumwe chilongotsi va hono ha kwitang'anila Vayawudi yo achemwaga Yayilo, akavaje kumuwona Yesu akamufugamilaje, 23 na kumugongola kwa kumulonjela, "Muhintsa vangu antamika ndalahela na alibehi kutajika. Dedede ntsingukugongola tubite ukamusuchile kwa kumuvichila mawoko gako ili ave mumi." 24 Yesu akidichilaje na vakabitasaje hamwe na Yayilo, na vala vanu wolofu vakavafwataje, na vakamupilimaje Yesu na kumutifya. 25 Kaha hono iho havaga na mudala yumwe yo atamikaga wutamwa wa kuhuma danda tsa siku tsa vamama kwa myaka kumi na jivili. 26 Mudala uyo avaga akodiche ndalahela kwa vaganga wolofu. Hamwe na kuva avaga agutsitse finu fyolofu siapatite chiba chochive, lechelelo wutamwa wake walutilaga nachene. 27 Hoavaga kuhulika ndongwa tsa Yesu, akifyatanitsaje halilugu lya vanu kuhumila kuchigosi kwa Yesu, na kudometsa mwenda go avaga afwite Yesu. 28 Adisile ihyo kwasawuli avaga ilonje mwene mu numbula yake kuta, "Manyi ndometse hela mwenda gwake, ngupona wutamwa wangu!" 29 Hoavaga kugudometsa mwenda gwa Yesu, luvala lulo danda yila yikadugaje. Akitselaje kuta aponile wutamwa wake. 30 Luvala lulo Yesu nayo akatselaje kuta wuvetso wake wumuponitse munu. Akavapituchilaje vala vanu wolofu na kuvaputsa, "Nani yo andomitse mwenda gwangu?" 31 Vadahitswa vake vakamujibulaje, "Ulave vanu wolofu fyo vangukutifya. Lelo chinya ndawuli umputsa kuta nani yo akudomitse?" 32 Lechelelo Yesu akendelelaje kupugasa ili amuwone munu yula yo amudomitse. 33 Iho mudala yula yo atselaga chochi muhumye, akahumilaje kuno ankakama kwa muloto na kipuna halutalo ha Yesu akamulonjelaje chila chinu cho chimuhumye. 34 Yesu akamulonjelaje mudala yula, "Muhintsa, litumbilo lyako likuponitse, bitaje kwa wusichimafu. Ng'odeko yako yidutsile."

35 Yesu hoavaga ankwendelela kulonga, vanu kuhuma kwa kaye ya Yayilo vakafikaje na kumulonjela Yayilo, "Muhintsa vako mwanga atajiche, lelo kwasawuli yachi unkwendelela kumukoda Mudahitsi?" 36 Lechelelo Yesu hoavaga kuhulika ihyo akamulonjelaje yula muvina va nyumba ya kitang'anila Vayawudi, "Witumbile hela, uleche kuva na muloto." 37 Yesu akavalemetsaje vanu vanji kwilongotsa hamwe nayo, lechelelo akavatolaje Petulo, na Yakobo, na Yohana yoavaga mung'olotse Yakobo. 38 Hovavaga kufika ha nyumba ya vina va nyumba ya kitang'anila Vayawudi yula yo achemwaga Yayilo. Vanu vavaga vanvemba na kulomboketsa. 39 Yesu akinjilaje mu nyumba na kuvaputsa, "Kwasawuli yachi munkola na kulomboketsa? Mwana yuno siafweye ila avasise hela." 40 Vanu vala vakamuhekaje kwa mbedatsi. Lechelelo Yesu akavahumyaje kivala vanu veka, akavategulaje yuve na dade va muhintsa yula yo atajiche, hamwe na vala vadahitswa vake akinjilaje nawo mu chumba chila cho gwavaga muvili gwa muhintsa yula. 41 Yesu akalibataje liwoko lya muhitsa yula yo atajiche, na kumulonjela, "Talita kumi!" Chinya kutijila, "Muhintsa ulamuche!" 42 Luvala lulo muhintsa yula akatsilipukaje, akimaje na kwantsa kujenda. Muhintsa yula avaga na myaka kumi na jivili. Ihyo yuve na dade vakavaje kuluwona lulongwa ulo vakapomokaje ndalahela. 43 Yesu akavalemetsaje vanu valeche kumulonjela munu yoyuve lulongwa ulo loluhumye. Kaha akavalonjelaje yuve na dade vamupele chilyo muhintsa yula yo atsilipuche.