1 Yesu akawukaje ku Kapelinaumu, akalowokaje lulenga lwa Yolidani na kubita ku Yudeya. Vanu wolofu vakatsaje hoali, nayo akantsaje kuvadahitsa kota hila fyo aditaga siku tsinji. 2 Mafwalisayo vamwinga vakabitaje kwa Yesu ili vamujele, vakamupuntsaje kuta, "Mbe, malajitso getu galajitse kuta mulume afuluche amuleche mudala vake?" 3 Yesu akavalonjelaje, "Musa avalajitse chinu chachi?" 4 Nawo vakamulonjelaje, "Musa atulajitse kuta, mulume afuluche amwandichile vake litatasi lya kulekana na kumuleka." 5 Yesu akavalonjelaje, "Musa avandichilye lilajitso ilyo kwasawuli ya wutalamu wenyu wa kuhulikitsa madahitso. 6 Lechelelo kuhuma kuwumbwa kwa inyi, Mulungu awumbite munu mulume na munu mudala. 7 Ihyo mulume akuvaleka yuve na dade na vakwihantsa na vake, 8 na iwo vavili vakuva muvili gumwe na si vavili kaha. 9 Duve, chinu chila cho achihantsitse Mulungu, munu alekaje kuchilekanitsa." 10 Yesu hoavaga kwinjila munyumba, vadahitswa vake vakamuputsaje lulongwa ulo lwa kulekana. 11 Yesu akavalonjelaje, "Mulume yo akulekana na mudala vake na kumutola mudala yunji, akuva an'dita waafu na mudala yula. 12 Hihyo na mudala yo akulekana na mulume vake na kutoleka na mulume yunji, akuva an'dita waafu na yula mulume yunji."

13 Siku yimwe vanu vamwe vanya vana, vakamusindichilaje Yesu vana vawo ili avatambichile na kuvavichila mawoko. Lechelelo vadahitswa vake vakavang'anulilaje. 14 Yesu hoavaga kuluwona lulongwa ulo akavipaje na kuvalonjela vadahitswa vake, "Muvaleche vana vadodo vatse kwa heni, mulekaje kuvalemetsa, kwasawuli Wuntsajila wa Mulungu ni kwasawuli ya vanu yo vanakota vana iva vadodo. 15 Ntsinguvalonjelani wukweli, munu yoyuve yosinambe awanuchile Wuntsajila wa Mulungu kota mwana mudodo fyo anguwanuchila, sialahogola injile!" 16 Yesu akavategulaje vana iwo na kuvakumbanitsa, akavavichilaje mawoko na kuvatambichila.

17 Yesu hoavaga kwantsa lujendo lwa kuwuka ku Yelusalemu, munu yumwe akamubilimilaje na kumufugamila akamuputsaje, "Mudahitsi muwuya, ntsin'ganika ndite chinu chachi ili mate wumi wo wugaya wudugo?" 18 Yesu akamulonjelaje yula munu, "Kwasawuli yachi un'nyema heni muwuya? Kuduhu munu yoyuve yo muwuya lechelelo Mulungu ng'ani." 19 Ugatsele malajitso ga Mulungu kuta, "Uleche kukopola, uleche waafu, uleche kuhitsa, uleche kulonga wusahidi wa wudesi, uleche wudesi, uvahesimilaje dado na yuwo." 20 Yula munu akamulonjelaje Yesu, "Mudahitsi, malagitso geka ntsigatsele luhuma tsing'acha ntsi mukwamitsi." 21 Yesu akamulavaje na kumugana munu yula, akamulonjelaje kuta, "Kuna chinu chimwe cho chisije. Ubite ukagutse finu fyeka fyo unafyo, na magobole go ukugapata, uvapele vagayu, na heve ukuva wivichye hachiba kilanga kwa Mulungu, kahi manyi udite ihyo utse ufwate heni." 22 Munu yula hoavaga kuhulika ihyo, akakalalaje na kuwuka kwa wususutafu, kwasawuli avaga na mali ntsolofu.

23 Yesu akapugasaje, na kuvalonjela vadahitswa vake, "Lukuva lulongwa lutalamu ndalahela kwa vafuchifu kwinjila mu Wuntsajila wa Mulungu!" 24 Vadahitswa vake vakapomokaje kwasawuli ya lulongwa ulo loalontsile Yesu. Lechelelo Mwene akavalonjelaje kahi kuta, "Vadahitswa vangu yo ntsinguvagana, mulave hila fyo kukuva kutalamu ndalahela kwa vanu kwinjila mu Wuntsajila wa Mulungu. 25 Kwasawuli lukuva lulongwa lupefu kwa linyama lyolinchemwa ngamiya kupuluta mu linang'ana lya sing'ano, kuliko munu mufuchifu kwinjila mu Wuntsajila wa Mulungu." 26 Vadahitswa vake vakatinukaje ndalahela na kwiputsa, "Kwa ndongwa itso nani yoafuluche akuluche?" 27 Yesu akavakangatsilaje miho vadahitswa vake na kuvalonjela, "Lulongwa ulo lutalamu kwa vanu, lechelelo kwa Mulungu siluli ihyo ndaya. Kwasawuli chila ndongwa tsivaga mefu kwa Mulungu." 28 Petulo akamulonjelaje Yesu, "Hetwe tulesile chila chinu na kukufwata heve!" 29 Yesu akavalonjelaje vadahitswa vake, "Ntsinguvalonjelani wukweli kuta, chila munu yoakuleka nyumba, awu muhatsave, awu yuve, awu dade, awu vanage, awu migunda kwasawuli ya heni awu kwasawuli ya Ndongwa Nofu, 30 akupelwa hilo finu buluta mu inyi, na kaha akupelwa na nyumba tsolofu, na vamame, na vahatsave, na yuve, na vana, na migunda, na ng'odeko, kahi akupelwa wumi wowugaya wudugo ku inyi yila yoyinkutsa. 31 Lechelelo vanu wolofu yo valongola vakuva va kuwudugo, na vala va kuwudugo vakuva valongola."

32 Yesu hamwe na vadahitswa vake hovavaga mung'asi vam'bita ku Yelusalemu, akavalongolaje kulutalo. Vadahitswa vake vakapomokaje, nawo vanu yo vavaga hamwe nawo vakavaje na muloto. Yesu akavategulaje vadahitswa vake kumi na vavili na kubita nawo halubali na kuvalonjela chinu cho chikumupata. 33 Akavalonjelaje, "Muhulikitse, tusogwe ku Yelusalemu, uko heni Mwana va Munu ngupitukwa na kusindikwa kwa vavina va vatawula nambiko, na vadahitsi va malajitso ga Musa. Iwo vakunyiga ng'opolwe na vakundeka kwa vanu yosi Vayawudi, 34 vanu iwo vakumbedala na kufunyila mati, kaha vakunova na kung'opola. Lechelelo siku ya kadatu ngutsilipuka."

35 Yakobo na Yohana yovavaga vana va Tsebedayo, vakatsaje kwa Yesu na kumulonjela, "Mudahitsi, tun'gana utuditile lulongwa lo tunsuka." 36 Yesu akavapuntsaje, "Mun'gana tsivaditile chinu chachi?" 37 Nawo vakamulonjelaje, "Hala houkuva wichite muchigoda chako cha Wuntsajila, utudichidile hetwe yumwe ikale kuliwoko lyako lililo na yunji ikale kuliwoko lyako lichiji." 38 Lechelelo Yesu akavalonjelaje kuta, "Henye sinambe muchitsele cho munsuka. Mbe, henye mufuluche mukodeche kota fyo ngukodeka heni, na kukopolwa kota fyo ngukopolwa heni?" 39 Yakobo na Yohana vakamulonjelaje Yesu, "Ena, tufuluche!" Yesu akavalonjelaje, "Mufuluche mukodeche kota fyo ngukodeka heni? Awu mufuluche mukopolwe kota fyo ngukopolwa heni. 40 Lechelelo lulongwa lwenyu ulo lwa kikala lubali lwa liwoko lililo awu lichiji ulo sifuluche manje heni ndaya. Mulungu mwene akuvapela vala yo avahagwe." 41 Vala vadahitswa kumi wovasije ho vavaga kuhulika lulongwa ulo, vakavavipilaje Yakobo na Yohana. 42 Ihyo Yesu akavachemaje vadahitswa vake veka na kuvalonjela, "Muntsela kuta vatavala wo sivayawudi vavatavalaga vanu kwa wudadambafu, vavatavalaga chinya ihyo kuvalajila vanu wuvetso wawo. 43 Lechelelo kwa henye yivaje finji, yula yoan'ghana ave muvina kwa henye, an'ganika ave mutantsi venyu. 44 Munu yoyuve yoan'gana ave mulongola kwenyu, an'ganika ave mutantsi venyu. 45 Nambe heni Mwana va Munu sintsitsitse numichilwe, lechelelo ntsitsitse ntsivatanje vanu na kuwutawula wumi wangu wuve mahombo ga kuvagombola vanu wolofu."

46 Yesu hamwe na vadahitswa vake vakinjilaje ku muji gwa Yeliko. Hovavaga van'wuka ku muji ugo hamwe na vanu wolofu, munu yumwe yoavaga abofwe achemwaga Batimayo mwana va Timayo, avaga ichite halubali ha ng'asi asukaga vanu vamupele chinu chochive. 47 Batimayo avaga kuhulika kuta Yesu va ku Natsaleti anlutila hono iho, akakolaje, "Bee Yesu Mwana va mutsajila Dawudi, umbonele lusungu na kunanga!" 48 Vanu wolofu vakamulemetsaje aleche kukola, lechelelo mwene akakalalilaje kukola kuta, "Bee Mwana va muntsajila Dawudi, umbonele lusungu na kunanga!" 49 Yesu akimaje na kulonga, "Mumucheme atse!" Vanu vakamuchemaje yula chibofu, vakamulonjelaje, "Wikangatse numbula! Wime, Yesu angukuchema!" 50 Batimayo akadibulaje mugolole gwake, akadibukaje mwilanga mwilanga kubita kwa Yesu. 51 Yesu akamuputsaje, "Chinu chachi cho un'gana nguditile?" Yula munu yo abofwe akamulonjelaje, "Mudahitsi tsinsuka mbetse kulola." 52 Yesu akamulonjelaje, "Bite, litumbilo lyako likuponitse." Luvala lulo yula munu chibofu akalavaje na kwantsa kumufwata Yesu mung'asi.