1 Hambele Yesu akantsaje kuvadahitsa vanu kwa mihwano kuta, "Munu yumwe avaga alimile mugunda gwa mitsabibu. Akapilimyaje lwigo mugunda gweka, na hagati akayavaje hono ha kukamila tsabibu, na kaha akatsengaje chuwo chitali cha munala cha kwamilila mugunda gweka. Akagukodisaje mugunda gula kwa valimi vanji na mwene akabitaje ku inyi yinji. 2 Hoyavaga kufika chipindi cha kubeta tsabibu, akamutumaje mupogotsi vake abite kwa vala valimi va mugunda gwa mitsabibu ili vamupele tsabibu kwasawuli ya mahombo gwa mugunda gwake. 3 Lechelelo vala valimi vakamubataje mupogotsi yula na kumutova, na vakamuvingaje bila chinu chochive. 4 Yula munya mugunda akamutumaje mupogotsi yunji kwa vala valimi, lechelelo vala valimi vakamukonaje kumutwi na kumuditila ndongwa tsa kumuhonjela nyoni. 5 Hambele yula munya mugunda akamutumaje mutantsi yunji, uyo valamwe kumukopola. Kaha avatumile na vatantsi vanji wolofu, vala valimi vakavatovaje na vamwe vakavakopolaje. 6 Yula munya mugunda avaga asije na mwanage yumwe yo amuganaga ndalahela. Hawudugo akamutumaje uyo kuno anhontsa kuta, vakumuhulikitsa kwasawuli yuno mwanangu. 7 Lechelelo vala valimi vaveye kumuwona mwana va munya mugunda, vakalonganaje kuta, yuno yo muhali va mugunda guno, ino lelo tumukopole ili mugunda guno guve gwa hetwe. 8 Ihyo vakamubataje na kumukopola na kumutotsa kivala kwa mugunda gwa mitsabibu." 9 Yesu akavaputsaje, "Munhotsa kuta yula munya mugunda ho akuvakutsa akuvadita chinu chachi vala valimi? Akuntsa na kuvakopola vala valimi veka na kuvapela vanu vanji gula mugunda gwa mitsabibu. 10 Mbe, simwasomile mandiko ga Mulungu gogandikwe kuta, liganga lya kutsenjela lyo valilemile vatsentsi, liveye liganga likomi lyolin'ganika kulongola kutsenjela kulutila maganga geka? 11 Mutwa Mulungu yo adisile lulongwa ulu lwa kutinusa mu miho getu." 12 Vatawula nambiko na vavina va Chiyawudi hamwe na vadahitsi va malajitso ga Musa, vakatselaje kuta ugo muhwano Yesu anguvasembeletsela vene. Vakaganaje kumubata vamuwope, lechelelo vakawonaje muloto kwasawuli ya vanu vala wolofu yo vali hono hala. Duve vakamulekaje Yesu hono iho vene vakawukaje.

13 Hambele Mafwalisayo vamwinga hamwe na vafwasi va Helode vali vatumilwe ili kumuhulikitsa Yesu manyi alonje chinu chibi chochive vamubate. 14 Vala yo vatumilwe vakatsaje kwa Yesu na kumuputsa, "Mudahitsi, tuntsela kuta heve uli munu muwuya na unlonga wukweli na kudahitsa hila fyoan'gana Mulungu, na siumwogopaga munu yoyuve. Mbe, tun'ganika kuhomba kodi kwa Muntsajila va Loma tuhombe awu tuleche kuhomba?" 15 Lechelelo Yesu akatselaje wupunganitsi wawo, akavalonjelaje, "Kwasawuli yachi mun'njela? Mundajile ilyo ligobole lyo linchemwa dinali." 16 Vakamulajilaje Yesu lila ligobole, nayo akavaputsaje, "Sula iyi na litawa ili fihwana na nani?" Vakamulonjelaje, "Fihwana na Muntsajila va Loma." 17 Yesu akavalonjelaje, "Fya Muntsajila va Loma mumpele Muntsajila va Loma, na fya Mulungu mumupele Mulungu." Vaveye kuhulika ihyo, vakapomokaje.

18 Masadukayo wo valongaga kuta vanu si vatsilipukaga, vakatsaje kwa Yesu na kumuputsa kuta, 19 "Mudahitsi, Musa avaga atulajitse kuta, munu manyi atajiche na kumuleka mufwile bila mwana, mung'olotse an'ganika amutole yula mufwile ili amulelele yula mung'olotse vana. 20 Kwavaga na vanyalukolo saba. Mulongola vawo akatolaje mudala na akatajikaje bila kulela mwana. 21 Akavaje kutajika yula mulongola, mung'olotse va kavili akamutolaje yula mufwile, uyo nayo akatajikaje bila kulela mwana. Kaha na vakadatu yikavaje hihyo kota vayage. 22 Veka saba vakatajikaje bila kulela mwana kwa yula mudala. Hambele mudala yula nayo akatajikaje. 23 Tun'gana utulonjele kuta chipindi icho vanu hova kutsilipuka mudala uyo akuva va nani? Kwasawuli veka saba vavaga vamutolite." 24 Yesu akavalonjelaje kuta, "Henye mun'yaga kwasawuli sinambe mugatsele mandiko ga Mulungu na wuvetso wa Mulungu." 25 Iho vanu ho vakutsilipuka sivakutola awu kutoleka, kwasawuli vakuva kota vatantsi va kilanga. 26 Lechelelo itso ndongwa tsa wutsilipuko, mbe, simwasomile mu chitabu cha Musa, hila Mulungu fyo alontsile na Musa mu chila chisati cho chakaga moto, "Heni tsi Mulungu va Ibulahimu, na Mulungu va Yisaka, na Mulungu va Yakobo?" 27 Henye munkosela nachene, kwasawuli mun'ganika mutsele kuta, "Mulungu siyo va vanu yo vafweye, ila mwene yo Mulungu va vanu yo wumi."

28 Mudahitsi yumwe va malajitso ga Musa avaga halubali anguvahulika Yesu na Masadukayo fyo vanlongana. Hoavaga kuwona hila Yesu fyo avajibwe finofu, nayo akamuputsaje Yesu, "Mu amuli tseka, yilikwiya yo ngomi kulutila tseka?" 29 Yesu akamulonjelaje, "Amuli ngomi kulutila tseka yo iyi, Muhulikitse henye vanu va Isilaheli, Mutwa Mulungu venyu yo Mutwa yumwe hela. 30 Un'ganika umugane Mutwa Mulungu vako kwa numbula yako yeka, na kwa nyala tsako tseka, na kwa ludali lwako lweka. 31 Amuli ya kavili yo iyi, Un'ganika umugane muyago kota fyo ungigana heve. Kuduhu amuli ngomi kulutila itsi tsivili." 32 Yula mudahitsi va malajitso ga Musa akamulonjelaje Yesu, "Mudahitsi ulontsile finofu kuta Mulungu yo yumwe na kuduhu yunji lechelelo mwene ng'ani. 33 Kaha yin'ganika umugane Mulungu kwa numbula yako yeka, na kwa nyala tsako tseka, na kwa ludali lwako lweka, na umugane muyago kota fyo ungigana mwene. Lulongwa ulo lo lunofu kulutila kutawula nambiko na sadaka." 34 Yesu aveye kuwona munu yula fyo ajibwe kwa ntselo, akamulonjelaje kuta, "Heve ulihabehi kwinjila mu Wuntsajila wa Mulungu."

35 Yesu ho avaga anguvadahitsa vanu ha Nyumba ya Mulungu, akavaputsaje, "Kwasawuli yachi vadahitsi va malajitso ga Musa valongaga kuta Chilisito yo Mwana va muntsajila Dawudi? 36 Kwasawuli mwene Dawudi kwa kulongotswa na Muhe va Mulungu alontsile kuta, Mutwa amulonje Mutwa vangu kuta, Wikale halubali lwangu lwa liwoko lililo, mbaka ho nguvasuma vatelani vako. 37 Mwene muntsajila Dawudi amuchemile, Mutwa. Afuluche ndawuli kaha amucheme mwanage?"

Vanu wolofu vakamuhulikitsaje Yesu kwa wuhechelelo. 38 Yesu hoavaga an'dahitsa vanu, akavafundaje kuta, "Mwiyangalile na vadahitsi va malajitso ga Musa, yo van'jenda kuno vafwite myenda mitali na kusamuswa kwa hesima na vanu hovankuva hono ha kugutsila finu." 39 Kaha vaganaga kikalisa figoda fya kulutalo hovankuva mu nyumba tsa kitang'anila Vayawudi, na vapelwaga hesima mu mawungo. 40 Lechelelo vanu iwo vatolaga kwa wusugu finu mu nyumba tsa vafwile, na kusuka suko nali. Mutsele kuta vanu kota iwo vakuhigwa ndalahela.

41 Yesu avaga ichite habehi na sandiko ya kutawulila sadaka yoyavaga hono ha Nyumba ya Mulungu. Akalavaje hila vanu wolofu fyo vantawula magobole mu sandiko ya kutawulila sadaka. Vafuchifu wolofu vakatawulaje magobole molofu. 42 Lechelelo akatsaje mudala yumwe mufwile yoavaga mugayu akatawulaje sendi tsivili. 43 Yesu akavachemaje vadahitswa vake na kuvalonjela, "Ntsinguvalonjelani wukweli, mudala yuno mugayu na mufwile yo atawe fyeka fyoanafyo mu sandiko yino kulutila vanu veka. 44 Iva vanu veka vatawe magobole gogasije. Lechelelo mufwile yuno na yivaje mugayu, atawe fyeka fyo anafyo, atawe magobole geka go anago mbaka gala go gaka kumufwaya kulya."