1 Hoyavaga kulutila Siku ya Weselo, Maliya va ku Majidala yo Majidalene, na Salome, na Maliyamu yuve va Yakobo vakagulaje mafuta ga kupuchilila vakabitaje kugubaka muvili gwa Yesu. 2 Ihyo hoyavaga kung'acha hamilawu siku ya jumapili, vakabitaje ku kabuli ya Yesu litsuva holyantsaga kuhuma. 3 Hovavaga mung'asi vakiputsaje, "Munu vachi yo akutubidusila liganga lila ha winjililo wa kabuli?" 4 Lechelelo hovavaga habehi na kufika vakalolaje, vakawonaje lila liganga mwanga libiduswe kuhuma hala ha winjililo wa kabuli. 5 Ihyo hovavaga kwinjila mu kabuli, vakamuwonaje mukwamitsi yumwe yoafwite kantsu nali imile lubali lwa liwoko lililo. Nawo vala vadala vakapomokaje ndalahela. 6 Lechelelo yula mukwamitsi akavalonjelaje, "Muleche kupomoka. Mungumusaka Yesu va ku Natsaleti yo akavambitwe mu musalaba. Atsilipuche! Alihaduhu hono hano! Mulave hono ho vaka vamulambaliche. 7 Lelo mubite mukavalonjele Petulo hamwe na vadahitswa vake, kuta Yesu avalongwe kubita ku Galilaya, uko ko mukumuwona kota fyo aka avalajitse."

8 Ihyo vadala vala vakapomokaje na kuhuma luvilo mu kabuli kuno vankakama kwa muloto. Nawo sivamulonje munu yoyuve chinu chochive, kwasawuli vavaga na muloto ndalahela.

9 Yesu hoavaga kutsilipuka kung'acha hamilawu siku ya jumapili, alongwe kwilajila kwa Maliya va ku Majidala yo Maliya Majidalene, yula yoavaga amuhetsitse misoka saba.* 10 Maliya va ku Majidala akabitaje kuvalonjela chila chochivahumye vala wovavaga hamwe na Yesu, na chipindi anguvalonjela vavaga na chiguto kuno vanvemba. 11 Lechelelo hovavaga kuhulika kuta Yesu atsilipuche na mumi, na Maliya va ku Majidala amuwene, vakalemaje kumutumba kwa lulongwa ulo lo alontsile.

12 Hambele Yesu akavahumilaje vadahitswa vavili kwa sula yinji. Vadahitswa iwo vabitaga kumugunda. 13 Nawo vala vadahitswa vavili hovavaga kumutsela Yesu vakawuyaje kuvalonjela vayawo, lechelelo vavaga kuhulika vakalemaje kuvatumba.

14 Hambele Yesu akavahumilaje vadahitswa vake kumi na yumwe wovavaga vankulya. Yesu akavang'anulilaje kwasawuli ya wutalamu wa numbula tsawo, na hila fyo valemile kuvatumba vala vayawo wovamuwene hoavaga kutsilipuka. 15 Ihyo akavalonjelaje, "Mubite ku inyi tseka mukavikule Ndongwa Nofu kwa vanu veka. 16 Munu yoyuve yo akitumba Litawa lyangu na kubatitswa akukuluswa. Na yula yo akulema kuvatumba akuhigwa. 17 Natso ndajilo itsi tsikuva hamwe na iwo wova kitumba. Kwa wuvetso wa Litawa lyangu vakuhetsa misoka, na kulonga kwa ndonga ntsipya. 18 Manyi vibate ntsoka awu vang'we chinu chochive chinya sumu, sivakufwa. Vakuvavichila mawoko vatamwa kwa kuvasuchila nawo vakupona."

19 Mutwa Yesu hoavaga kusinda kulonga na vadahitswa vake, akategulwaje kubita kilanga kwa Mulungu, akikalaje lubali lwa liwoko lililo lya Mulungu. 20 Ihyo vala vadahitswa vakabitaje chila hono kuvavikula vanu Ndongwa Nofu. Nayo Mutwa Yesu akakolaje katsi hamwe nawo na kulajila Ndongwa tsake kwa ndajilo tso tsavaga nawo.