1 Chipindi icho vanu wolofu vakakong'asikaje kaha. Na kwasawuli vanu vala vavaga valihela filyo, Yesu akavachemaje vadahitswa vake na kuvalonjela, 2 "Ntsinguvawonela lusungu vanu vano, kwasawuli vikalise na heni kwa siku tsidatu na valihela chilyo. 3 Manyi ntsivaleche vabite ku kaye kwawo na ntsala, na vamwe vahumye kutali yifuluche yivatove mbupulu mung'asi." 4 Vadahitswa vake vakamuputsaje, "Hano ha mbuga, tukupata kwiya filyo fyo vafuluche vigute vanu veka vano?" 5 Yesu akavaputsaje, "Munago mabumunda galinga?" Vakamulonjelaje, "Tunago mabumunda saba." 6 Yesu akavalonjelaje vanu vikalise hasi. Akagategulaje gala mabumunda saba, akamulumbaje Mulungu, akagamegasaje na kuvapela vadahitswa vake vavagavasile vanu. Vadahitswa vakavagavasilaje vanu kota fyo alontsile Yesu. 7 Hihila vali na tusomba tudodo. Yesu akafitambichilaje na kuvalajitsa hihila vadahitswa vake vavagavile vanu. 8 Vala vanu vakalyaje na kwiguta. Hambele vadahitswa vakaholangitsaje mabumunda na somba tso tsisije, fikamemaje fitangula saba. 9 Nawo vanu yo valyeye vavaga kota elufu tsitayi. Duve Yesu akavalagaje vanu vabite kukaye kwawo, 10 na luvala lulo akakwinaje mu mutumbwi hamwe na vadahitswa vake akabitaje ku muji gwa Dalumanuta.

11 Mafwalisayo vatunga vakatsaje na kwantsa kumuputsa Yesu. Vakamujelaje kwa kumulonjela avaditile ndajilo tsa kulajila kuta mwene ahumye kilanga kwa Mulungu. 12 Lechelelo Yesu hoavaga kuluhulika lulongwa ulo akakalalaje munumbula na kuvalonjela, "Kwasawuli yachi chilelo chino chin'gana ndajilo? Ntsinguvalonjela nachene, chilelo chino sichikupelwa ndajilo yoyive." 13 Hoavaga kuvalonjela ihyo, Yesu akavalekaje Mafwalisayo na kukwina kaha mutumbwi hamwe na vadahitswa vake, vakalowokaje kumwambu gwa lilamba.

14 Vadahitswa va Yesu vavaga vasemwe kutegula mabumunda molofu, vali vatweye libumunda limwe hela mu mutumbwi gula. 15 Yesu akavafundaje vadahitswa vake kwa kuvalonjela, "Mwiyangalile ndalahela na lisimika lya Mafwalisayo na ya Helodi." 16 Vadahitswa vakantsaje kulongana vene kwa vene kuta, "Anlonga hino kwasawuli situlategula mabumunda." 17 Yesu akatselaje cho valongana, akavalonjelaje, "Kwasawuli yachi munlongana kuta mulihela mabumunda? Mbe, mung'acha kutsela awu kulukagula? Mbe, numbula tsenyu tsing'acha nalamu? 18 Mbe, munago miho lechelelo munlemwa kulava? Munago mapulichilo lechelelo sinambe muhuliche? Mbe, sinambe mwiwuche 19 chipindi chila fyo ntsamegasise gala mabumunda gahanu na kuvapela vanu elufu tsihanu? Vamwe vahumye kutali, mwakong'ise fitangula filinga fyo fyamemile filyo fyo fisije?"

Vakamulonjelaje, "Twakong'ise fitangula kumi na fivili."

20 Yesu akavalonjelaje kaha, "Na hala ho ntsamegasise mabumunda saba na kuvalisa vanu vala elufu tsitayi, mwakong'ise fitangula filinga fyo fyamemile filyo fyo fisije?"

Vakamulonjelaje, "Twakong'ise fitangula saba."

21 Kahi akavaputsaje, "Mbe, mung'acha mutsele?"

22 Yesu hamwe na vadahitswa vakafikaje ku muji gwa Betisayida. Vanu vakamuletaje munu chibofu na vakamugongoletsaje Yesu amudometse ili amuponetse. 23 Yesu akamubataje liwoko yula munu na kumulongotsa mbaka kivala na muji. Akamufunyilaje mati mumiho na kumuvichila mawoko, na kumuputsa, "Ndawuli unguchiwona chinu chochive?" 24 Yula chibofu akamulonjelaje Yesu kuta, "Ntsinguvawona vanu, lechelelo, ntsinguvawona kota mibichi fyo van'jenda." 25 Ihyo Yesu akawilaje kumuvichila mawoko kumiho, munu yula akafutulaje miho kulava na miho ga munu yula gakavaje mumi, akavetsaje kulava chila chinu finofu. 26 Yesu akamulonjelaje yula munu, "Leche kwinjila ku muji kumulonjela munu yoyuve, lechelelo ubite kukaye kwako."

27 Yesu hamwe na vadahitswa vake vakabitaje ku fijiji fya Kayisalia Fwilipi. Hovavaga mung'asi Yesu akavaputsaje vadahitswa vake kuta, "Vanu vanlonga kuta heni tsi nani?" 28 Vadahitswa vake vakamulonjelaje Yesu, "Vamwe vanlonga kuta heve uli Yohana Mubatitsi, na vanji vanlonga heve uli Eliya muloli va Mulungu, na vamwe vanlonga kuta heve uli yumwe va valoli va Mulungu." 29 Yesu akavaputsaje, "Lechelelo henye ndawuli, munlonga kuta heni ntsili nani?" Petulo akamulonjelaje, "Heve yo Chilisito." 30 Ihyo Yesu akavafundaje valeche kumulonjela munu yoyuve, kuta heni yo Chilisito.

31 Yesu akantsaje kuvadahitsa vadahitswa vake kuta yin'ganika Heni Mwana va Munu ng'odeche kwa ng'odeko ntsolofu na kulemwa na vavina, na vavina va vatawula nambiko, na vadahitsi va malajitso ga Musa. Kaha ngukopolwa na siku ya kadatu ngutsilipuka. 32 Yesu alontsile ndongwa itso bila kuvafiha, ihyo Petulo akamukwegaje kulubali na kwantsa kumung'anulila. 33 Lechelelo Yesu akapitukaje na kuvalava vadahitswa vake, akamung'anulilaje Petulo kwa kumulonjela, "Wuye kumbele kwa heni, uli Lihoka! Numbula yako sinambe yihotse ndongwa tsa Mulungu, yinhotsa ndongwa tsa vanu." 34 Kahi Yesu akavachemaje vanu wolofu vakihantsaje hamwe na vadahitswa vake, akavalonjelaje, "Manyi munu yoyuve yo an'gana atse kwa heni, an'ganika ikane mwene na idichile kukodeka na yivaje kufwa na fwate heni." 35 Munu yoyuve yo an'gana kuwukulusa wumi wake akuwuyatsa, lechelelo yoyuve yo akuwuyatsa wumi wake kwasawuli ya heni na kwasawuli ya Ndongwa Nofu, akuwukulusa. 36 Mbe, yifuluche yimufwaye chinu chachi munu manyi afipate finu fyeka fya mu inyi na kuwuyatsa wumi wake? 37 Awu munu akutawula chinu chachi cho chikupilula wumi wake? 38 Manyi munu yoyuve ambonele nyoni heni na ndongwa tsangu, mu chilelo chino cha vanu yovan'dita ndongwa ntsibi, na Heni Mwana va Munu ngumukana munu uyo, iho ho nguwuya kuhuma kwa Dadangu kwa wumelemo hamwe na vatantsi vangu vahagulwa va kilanga.