1 Muvina Tiyofilo.

Vanu wolofu vikangitse kwandika ndongwa tsila tso tsikakoliche hagati hetu. 2 Vakandiche kota fyo vakatulonje vala wo vatsiwene ndongwa itso luhuma hamutalo na vatantsi va Mulungu wo vavikulaga ndongwa itso. 3 Kwasawuli mbutsanitse finofu ndongwa itso tseka luhuma hamutalo ihyo mbwene na heni ngwandichile heve muvina Tiyofilo chila chinu. 4 Ndisile ihyo ili na heve utsele wumwene wukweli wa ndongwa tsila tso wadahitswe.

5 Iho Helode hoavaga muntsajila va ku Yudeya, kwavaga na mutawula nambiko yoachemwaga Tsakaliya, va chikundi cha vatawula nambiko va Abiya. Mudala vake litawa lyake achemwaga Elitsabeti, yoavaga ahumye mu lukolo lwa mutawula nambiko yoachemwaga Haluni. 6 Veka vavili vavaga vidichilwe na Mulungu, na vikalaga kwa kufwata amuli na malajitso geka ga Mutwa Mulungu. 7 Nawo sivavaga na vana kwasawuli Elitsabeti avaga mende na veka vavili vavaga vagogolo ndala hela.

8 Siku yimwe Tsakaliya hoavaga na vayage mu tsamu yawo ya wutawula nambiko mu Nyumba ya Mulungu. 9 Vakamuhagulaje Tsakaliya kwa simbi kota hila fyovaditaga ili injile mu Nyumba ya Mulungu afuse wubani. 10 Luvala lulo hoafusaga wubani lila lilugu lya vanu vavaga vakong'ine hivala vansala.

11 Mutantsi va kilanga va Mulungu akamuhumilaje mumo mugati, akimaje lubali lwa kwililo lwa hono hakufusila wubani. 12 Tsakaliya hoavaga kumuwona akakakamaje, akawonaje muloto. 13 Lechelelo mutantsi va kilanga va Mulungu akamulonjelaje, "Tsakaliya! Uleche kuva na muloto, kwasawuli suko yako yihulikitswe, na mudala vako Elitsabeti akukulelela mwana mukwamitsi, nave ukumutambulila litawa Yohana. 14 Nave ukuhechelela na kusangalala ndalahela, na vanu wolofu vakusangalala kwasawuli ya kuleleka kwake! 15 Akuva munu muvina halutalo ha Mutwa, siakujela ang'we difwayi awu chochive chinya kugatsa, nayo akumemetswa Muhe va Mulungu luhuma kuleleka kwake. 16 Nayo akuvadita Vaisilaheli wolofu vamupituchile Mutwa Mulungu vawo. 17 Akulongola halutalo ha Mutwa, akuva na wuvetso na muhe kota Eliya muloli va Mulungu. Akutsigalula numbula tsa vayaya vavahotse vanawo na akuvadita vanu vave chang'ani kumwanuchila Mutwa." 18 Tsakaliya akamuputsaje uyo mutantsi va kilanga va Mulungu, "Chinu chachi chochikumela wuhuvilo kwa lulongwa luno? Heni ntsili mugogolo, hihilaga na mudala vangu nayo agogwe." 19 Yula mutantsi va kilanga va Mulungu akamulonjelaje kuta, "Heni ntsi Gabuliyeli, yontsimaga halutalo ha Mulungu, numilwe ndonje na heve ndongwa tsino nofu. 20 Lelo kwasawuli siuwitumbye ndongwa tsino tso ngulonje, ukuva chibubwi, siukuvetsa kulonga mbaka hala ndongwa tsino ho tsikuhumila."

21 Luvala lulo vanu vala vavaga vangumutsinda Tsakaliya vakiputsaga hila fyo ahafile kuhuma kivala. 22 Tsakaliya hoavaga kuhuma kivala akalemwaje kulonga, akantsaje kulonga kwa kuvalajila kwa mawoko kwasawuli ali chibubwi, ihyo vakatselaje kuta awene nduntsuchilo mu Nyumba ya Mulungu. 23 Siku tsake tsa kukola katsi mu Nyumba ya Mulungu hotsavaga kusila akawuyaje kukaye kwake. 24 Hotsavaga kulutila siku nunga mudala vake akapataje wubofu, akikalaje aliyena mu nyumba yake kwa chipindi cha myetsi jihanu akalongaje kuta, 25 "Hino ho hila fyo anditye Mutwa, andotsile na kunditila wuwuya."

26 Myetsi sita luhuma Elitsabeti ave na wubofu, Mulungu akamutumaje Gabuliyeli mutantsi vake va kilanga abite kumuji gwa Galilaya gogunchemwa Natsaleti, 27 kwa muhintsa yosiamutsele mulume, litawa lyake Maliyamu yoali akwelilwe na Yusufu yoavaga va lukolo lwa Dawudi. 28 Mutantsi va kilanga va Mulungu akatsaje kwa mudala uyo akamusamusaje kwa kumulonjela kuta, "Unogaje heve yo uditilwe wuwuya na Mulungu, nayo Mutwa alihamwe na heve." 29 Maliyamu hoavaga kuhulika ndongwa itso akahotsaje ndalahela, akiputsaje mu numbula yake kuta samuso yino yinya ndawuli. 30 Lechelelo mutantsi va kilanga va Mulungu akamulonjelaje, "Maliyamu uleche kuva na muloto, kwasawuli Mulungu akuditye wuwuya. 31 Ukupata wubofu, na ukulela mwana mukwamitsi, na heve ukumutambulila litawa Yesu. 32 Mwana uyo akuva munu muvina, nayo akuchemwa Mwana va Mulungu va Kuchanya Ndalahela. Mutwa Mulungu akumudita ave Muntsajila kota Dawudi dada vake. 33 Nayo akuva muntsajila va lulelo lwa Yakobo siku tseka na wuntsajila wake siwukuva na wudugo." 34 Maliyamu akamulonjelaje yula mutantsi va kilanga va Mulungu, "Lukuva ndawuli lulongwa ulo kuno heni sintsimutsele mulume?" 35 Mutantsi va kilanga va Mulungu akamulonjelaje, "Muhe va Mulungu akutsa na kukugubika kota mujiji, na wuvetso wake Yoali Kilanga Ndalahela na uyo yo ukumulela yoali lubali lwa Mulungu akuchemwa mwana va Mulungu. 36 Kaha utselaje kuta mung'olotso Elitsabeti yoavaga mende ana wubofu kuwugogolo, na guno go mwetsi gwa sita gwa wubofu wake. 37 Kwasawuli kuduhuli lulongwa lutalamu lolumusumaga Mulungu." 38 Maliyamu akalongaje, "Lave heni ntsi mutantsi va Mutwa, na yivaje hihyo kota fyo undonje." Hambele mutantsi va kilanga va Mulungu akawukaje.

39 Siku tsitso Maliyamu akangufitsaje kwantsa lujendo lwa kubita ku muji gumwe goguli mu fidunda fya inyi ya Yudeya. 40 Akinjilaje mu nyumba ya Tsakaliya na kumusamusa Elitsabeti. 41 Hala Elitsabeti hoavaga kuhulika sawu ya Maliyamu, mwana yo avaga mwileme lyake akadibukaje. Elitsabeti akamemetswaje Muhe va Mulungu, 42 nayo Elitsabeti akalongaje fikami kuta, "Heve utambichilwe kulutila vadala veka, nayo mwana youkumulela atambichililwe." 43 Lechelelo kwasawuli yachi lulongwa ulu luhumile kwa heni, mbaka yuve va Mutwa vangu atse anjendele heni? 44 Hala hombije kuhulika samuso yako, mwana yoali mulileme lyangu adibuche kwa wusangalafu. 45 Uditilwe wuwuya na Mulungu heve yo witumbye kuta ndongwa tsoalontsile Mutwa tsikuhumila.

46 Nayo Maliyamu akimbaje kwa kumutsumitsa Mulungu,

"Numbula yangu yingumutsumitsa Mutwa,

47 nayo numbula yangu yingumusangalalila Mulungu,

yo Mukulusi vangu.

48 Kwasawuli andotsile kwa lusungu heni mutantsi vake munyakwika.

Nachene luhuma sambi,

filelo fyeka fikunyema munu yo aditilwe wuwuya,

49 Kwasawuli Mulungu munya wuvetso weka anditye ndongwa ngomi.

Na kwasawuli Mwene ng'ani yo Mukwemufu ndalahela.

50 Lusungu lwake luli kwa vanu veka wo vangumuhesimila,

Mulungu kuhuma chilelo mbaka chilelo,

51 Adisile ndongwa ngomi kwa wuvetso wake.

Na agatalitse mahotso ga vanya chidada go gali mu numbula tsawo.

52 Avahetsitse vantsajila luhuma mu wuntsajila wawo,

nayo avakwinitse vanyakwika.

53 Avagutitse vanya ntsala kwa finu finofu,

na vafuchifu avavintsile mawoko ng'ani.

54 Amutantsile Isilaheli mutantsi vake,

na akiwukaje wilaho wake kwa Ibulahimu,

55 na filelo fyake siku tseka tsotsili hela wudugo!"

56 Maliyamu akikalaje na Elitsabeti myetsi jidatu, hambele akawuyaje kukaye kwake.

57 Chavaga kufika chipindi cha Elitsabeti kulela, akalelaje mwana mukwamitsi. 58 Vanu wovikalasaga habehi nayo na vanu vanji vakahulikaje hila Mutwa fyo amuwon'ye lusungu, nawo vakasangalalaje hamwe nayo. 59 Mwana hoavaga kufika siku ya nane vakamwingitsaje likumbi, vaganaga mwana achemwe litawa Tsakaliya, lyolyavaga litawa lya dade. 60 Lechelelo yuve akalongaje kuta, "Ndaya! Litawa lyake achemwe Yohana!" 61 Lechelelo vanu vakamulonjelaje kuta, "Kuduhu munu yoyuve mulukolo lwake munya litawa kota ilyo!" 62 Vakamuputsaje dade kwa ndajilo tsa mawoko ili atambule litawa lyo an'gana kumupela mwanage. 63 Tsakaliya akasukaje lubawo lwa kwandichila, akandikaje, "Litawa lyake Yohana." Vanu veka vakapomokaje! 64 Luvala lulo Tsakaliya akavetsaje kulonga kanji na akantsaje kumutsumitsa Mulungu. 65 Vanu veka va habehi nawo vakatinukaje na ndongwa itso tsikatagalilaje chila hono mu inyi yeka ya Yudeya. 66 Chila munu yo ahuliche ndongwa itso akatinukaje na kiwutsa, "Mbe, mwana uyu akuva munu vachi?" Kwasawuli wuvetso wa Mutwa wavaga hamwe nayo.

67 Kahi Tsakaliya dade va Yohana akamemetswaje Muhe va Mulungu, akalongaje wuloli wa kuhuma kwa Mulungu na kulonga,

68 "Atsumitswe Mutwa, Mulungu va Isilaheli,

kwasawuli atsitse na kuvagombola vanu vake.

69 Nayo atupelye Mukulusi munya wuvetso,

luhuma mufilelo vya Dawudi mutantsi vake.

70 Kota fyo alontsile kukolela kwa valoli yo avahagwe luhuma katali,

71 Kuta akutukulusa mu mawoko ga vatelani vetu.

Na kuhuma mumawoko ga veka wovangutuvipila.

72 Alontsile kuta akuvaditila ndongwa nofu vagogolo vetu,

na akwiwuka lilagano lyake lyoavisile mwene.

73 Kota hila fyoali amulonje kwa kumulahila dada vetu Ibulahamu,

74 kuta akutukulusa mwene luhuma mumawoko ga valatelani vetu.

Na kutudita tuvetse kumutanga bila muloto,

75 kwa kuva lubali lwake na kudichilwa halutalo hake,

mu siku tseka tsa wumi wetu.

76 Na heve mwanangu ukuchemwa muloli va Mulungu Muvina ndalahela.

Kwasawuli ukumulongola Mutwa ili umuditile ng'asi.

77 Ukuvalonjela vanu vake kuta vakukuluswa,

kwa kuhulumilwa ndongwa tsawo ntsibi.

78 Kwasawuli ya wukatufu na lusungu lwa Mulungu vetu.

Akutung'alichila mwangatsa gwa wukuluso wake kuhuma kilanga.

79 Na kuvang'alichila veka wovangikala mujitsa lya wuhigo wa chifo,

na kutulongotsa mu ng'asi ya wusichimafu."

80 Mwana akakalagalaje na kuva na wuvetso mu numbula. Akikalaje kumbuga mbaka hoavaga kilajila kwa vanu Vaisilaheli.