1 Kahi Yesu akavalonjelaje vadahitswa vake, "Finu fyo finkwambutsa munu kudita ndongwa ntsibi kofili siku tseka, lechelelo akudutsa munu yula yo akwambutsa munu kudita ndongwa ntsibi. 2 Yikakuva chiba kwa munu uyo awopelwe lwala lukomi musingo yake na kutotswa mu bahali, kuliko kwambutsa munu yumwe munya litumbilo adite ndongwa ntsibi." 3 Ihyo mwiyangalilaje,

"Manyi mung'olotso yumwe munya litumbilo adisile ndongwa ntsibi, umung'anulile, na manyi asuche kuhulumilwa na kuleka kudita ndongwa ntsibi na kumupituchila Mulungu, un'ganika umuhulumile. 4 Nayivaje akuditye ndongwa ntsibi mala saba kwa siku yimwe, Manyi aleche ndongwa ntsibi na kumupituchila Mulungu, un'ganika umuhulumile."

5 Vatumi vakamulonjelaje Yesu, "Mutwa, utuwile litumbilo." 6 Nayo Mutwa akavalonjelaje, "Manyi muna litumbilo lidodo kota meche ya libichi lyo linchemwa muhaladali, mufuluche mugulonjele mubichi guno gwa mutsombe, ‘Gumbuche ukitotse kubahali,’ nago gukuvahulikitsa."

7 Yesu akalongaje, "Manyi munu yumwe hagati ana mutantsi yo angumulimila kumugunda awu kudima ng'olo, hoakuva an'wuya kuhuma kumugunda. Mbe, afuluche amulonjele mutantsi vake kuta, ‘Wikale hano ulye?’ 8 Mbe, siakumulonjela hino, ‘Nditile chilyo ntsilye. Wiviche finofu unumichile, honguva sintsile kulya na kung'wa, holelo na heve ho ukulya na kung'wa.’ 9 Mbe, akumuhongetsa mutantsi uyo kwasawuli adisile chila cho aganikije kudita? 10 Hoihyo na henye manyi mudite fyeka fyomulagitswe, mulongaje hino, ‘Hetwe tu vatantsi hela, yo tudisile chila chotuganikije kudita.’ "

11 Yesu hoavaga mulujendo kubita ku Yelusalemu, akwete mu mbaka ya Samaliya na Galilaya. 12 Hoavaga ankwinjila mu chijiji chimwe, akitang'anaje na vanu kumi vanya wutamwa wa wububa, nawo vala vanu vavaga vimile kutali. 13 Vakamulonjelaje kwa litsi likomi vakalongaje, "Mutwa Yesu, utuwonele lusungu!" 14 Akavaje kuvawona akavalonjelaje hino, "Mubite mukilajile kwa vatawula nambiko." Duve nawo, hovavaga mung'asi vam'bita, vakaponaje wutamwa wawo na kidichilwa kwa ntsovelo tsa kumufugamila Mulungu. 15 Muyawo yumwe avaga kiwona aponile, akawuyaje kwa Yesu kuno angumutsumitsa Mulungu kwa litsi likomi. 16 Akitotsaje hamagulu ga Yesu na kumulumba. Munu uyo avaga va kabila lya Vasamaliya. 17 Ihyo Yesu akaputsaje, "Mbe, sitsivaponitse vanu kumi nawo vakidichilwaje kwa ntsovelo tsa kumufugamila Mulungu? Vala tisa valikwiya? 18 Kuduhu munu yunji yo awutsile kumupela Mulungu wumelemo, ila yuno mujentsi ng'ani?" 19 Kahi Yesu akamulonjelaje munu yula, "Winuche ubite, litumbilo lyako likukuluse."

20 Siku yimwe Mafwalisayo vakamuputsaje Yesu, "Wuntsajila wa Mulungu wukutsa hanili?" Nayo akavalonjelaje, Wuntsajila wa Mulungu siwutsaga kwa kuwuhima kwa miho. 21 Yesu akalongaje, "Kaha kuduhu munu yoafuluche alonje kuta, Wuli hano! Awu kulonga kuta, Wuli hala! Kwasawuli wuntsajila wa Mulungu wuli mugati mwenyu."

22 Kahi akavalonjelaje vadahitswa vake, "Siku ntsinkutsa ho mukiwiniwa kuyiwona siku yimwe ya siku tsa heni Mwana va Munu, lechelelo simukuyiwona. 23 Vanu vakuvalonjela kuta, ‘Mulole ali kula!’ Awu ‘Mulole ali hano!’ Lechelelo henye mulekaje kuvafwata. 24 Kwasawuli kota hila lwenje fyowung'alikaga kilanga luhuma lubali lumwe mbaka lubali lunji, ho ihyo fyo yikuva siku ya kutsa heni Mwana va Munu. 25 Lechelelo ha wulongolo heni Mwana va Munu nguganika ng'odeche ndalahela na vanu va chilelo chino vakundema.

26 "Kota hila fyoyavaga siku tsa Nuwu, hoihyo fyoyikuva ha siku tsa heni Mwana va Munu. 27 Mu siku tsa Nuwu vanu vavaga vankulya na kung'wa, kutola na kutoleka, mbaka hala Nuwu hoavaga kwinjila mu litumbwi likomi. Ndonya ngomi yikatonyaje na likuka likomi likahumilaje na kukopola chila chinu. 28 Yikuva kota fyo tsavaga mu siku tsa Lutu. Vanu vavaga vankulya na kung'wa, na vagulaga na kugutsa, na vayalaga na kutsenga nyumba. 29 Lechelelo siku yila Lutu hoavaga kuwuka ku Sodoma, moto gwa chibiliti kuhuma kilanga gukabohokaje kota ndonya na kuvanyanya vanu veka. 30 Hohihyo fyo yikuva siku yila heni Mwana va Munu fyo nguhumila. 31 Siku iyo munu yoakuva mwilanga mwa ya nyumba yake, alekaje kwika hasi kubita kutegula finu fyake fyo fili mu nyumba. Hihilaga munu yoali kumugunda alekaje kuwuya kutegula chinu chochive. 32 Mwiwukaje cho chamupasile muchina Lutu. 33 Munu yoyuve yo akujela kuwukulusa wumi wake, akuwuyatsa, na yoyuve yo akuwuyatsa wumi wake, akuwukulusa. 34 Ntsinguvalonjela chilo cha siku iyo vanu vavili vakuva vavasise hamwe mu lusaga lumwe, yumwe akutegulwa na yunji akulekwa. 35 Vadala vavili vakuva hono hamwe vanhalula wuse mu lwala, yumwe akutegulwa na yunji akulekwa." 36 Yesu akalongaje, "Valume vavili vakuva hono hamwe vankola katsi ya kulima mumugunda, yumwe akutegulwa na yunji akulekwa." 37 Vadahitswa vake vakamuwutsaje, "Mutwa, Ifyo fikuhumila kwiya?" Akavalonjelaje, "Iho ho hana livili linyama lyo lifyeye, iho ho tsitang'anaga ngungule."