1 Chimunyi chimwe Yesu avaga imile ha lilamba lya Jenetsaleti, na vanu wolofu vavaga vamupilime na kuno vangumukunugitsa ili vahulikitse Ndongwa Nofu tsa Mulungu. 2 Akajiwonaje mitumbwi jivili ja valova somba, jojavaga mulubali mwa lilamba, vatsiwuyapaga nyafu tsawo. 3 Yesu hoavaga kwinjila mu mutumbwi go gwali gwa Simoni, akamulagitsaje Simoni aguhegetse luhuma ha mwejego gwa lilamba gubite mbaka ha lulenga lutali. Akikalisaje na akantsaje kuvadahitsa malugu ga vanu. 4 Avaga kusinda kudahitsa, akamulonjelaje Simoni, "Wendese mutumbwi mbaka hono hanya lulenga lutali, mutotse waafu wenyu mulove somba." 5 Simoni akamujibulaje, " Ena! Mutwa, tukodiche kulova somba chilo cheka situlapata. Lechelelo kwasawuli ulontsile heve tukutotsa nyafu mu malenga." 6 Nawo hovaveye kutotsa nyafu vakapataje somba ntsolofu ndalahela, mbaka nyafu tsawo tsikantsaje kudemuka. 7 Vakavachemaje kwa mawoko vayawo wovavaga mu mutumbwi gunji vatse vavatanje. Vakatsaje vakamemyaje somba mu mitumbwi jeka jivili mbaka mitumbwi jikaganaje kuyajilila mululenga. 8 Simoni Petulo aveye kuwona ihyo, akafugamaje hamagulu ga Yesu na kumulonjela, "Mutwa uheje kwa heni. Heni ntsi munu yo ntsin'dita ndongwa ntsibi!" 9 Kwasawuli mwene na vayage vali vatinuche ndalahela kwa kulova somba ntsolofu tsinya ihyo. 10 Hihila Yakobo, na Yohana, na vana va Tsebedayo wovavaga valova somba hamwe na Simoni nawo vakatinukaje. Yesu akamulonjelaje Simoni kuta, "Uleche kuva na muloto, luhuma sambi siukuva mulova somba, lechelelo ukuva unguvaleta vanu kwa Mulungu." 11 Duve hovavaga kupilula mitumbwi jila halubali lwa lilamba, vakalekaje chila chinu, vakabitasaje na Yesu.

12 Chimunyi chimwe Yesu hoavaga ku Galilaya, munu yumwe munya wutamwa wa wububa muvili gweka akatsaje. Avaga kumuwona Yesu akamufugamilaje na akamugongolaje kuta, "Mutwa, manyi ugane ufuluche umonetse ili ntsidichilwe mu ntsovelo tsa kumufugamila Mulungu." 13 Yesu akagololaje liwoko lyake, akamudometsaje mutamwa yula na kumulonjela, "Ntsin'gana, upone!" Luvala lulo wububa wake wukaponaje. 14 Yesu akamulonjelaje, "Ulekaje kumulonjela munu yoyuve lulongwa ulu, lechelelo ubite ukilajile kwa mutawula nambiko, na ukatawule nambiko kwasawuli ya kudikitswa kumufugamila Mulungu kota fyo avalajitse Musa, na ihyo hovakutsela kuta uponile." 15 Lechelelo ndongwa tsa Yesu tsikalutilaje kutagalila chila hono, na vanu wolofu vakakong'anaje ili vamuhulikitse na kuponetswa namwa tsawo. 16 Nayivaje ihyo Yesu akabitaje hono hohaduhu vanu ili amusuche Mulungu.

17 Siku yimwe Yesu avaga an'dahitsa, Mafwalisayo vatunga na vadahitsi va malajitso ga Musa, wovavaga vahumye chila fijiji fya Galilaya na kuhuma ku Wuyawudi na Yelusalemu vavaga vichite baho. Na wuvetso wa Mulungu wavaga hamwe na Yesu ili kuvaponetsa vanu namwa tsawo. 18 Vakatsaje vanu vanji wovamupisile munu mulusaga yoali na wutamwa wa kupola muvili. Vakajelaje kumwingitsa mugati ili vamuviche halutalo ha Yesu. 19 Lechelelo kwasawuli ya wolofu wa vanu vakalemwaje kwinjila mula mugati, vakakwinaje na kutubula kano, vakamwisaje mutamwa yula kuno ali mulusaga hono hoavaga Yesu. 20 Yesu hoavaga kuliwona litumbilo lyawo, akamulonjelaje mutamwa yula, "Muyangu, nguhulumye mu ndongwa tsako ntsibi." 21 Vadahitsi va malajitso ga Musa na mafwalisayo vakantsaje kwiputsa, "Munu yuno yo nani anlonga ndongwa tsa kumuliga Mulungu? Kuduhuli yoafuluche avahulumile vanu vanya ndongwa tsibi ila Mulungu ng'ani!" 22 Yesu akatselaje chovahotsaga akavawutsaje, "Kwasawuli ya chichi munhotsa ihyo mu numbula tsenyu? 23 Mbe, chichi cho chipefu kumulonjela kuta, Uhulumilwe ndongwa tsako ntsibi, awu kulonga kuta, Winuche ubite? 24 Lelo ntsin'gana mutsele kuta Mwana va Munu ana wuvina va kuhulumila vanu ndongwa tsawo ntsibi mu inyi." Ihyo akamulonjelaje munu yula yoapotsile muvili, "Winuche, utegule lusaga lwako, ubite ku nyumba yako." 25 Luvala lulo munu uyo akimaje halutalo hawo, akategulaje lusaga lwake lo avasilaga na kubita kukaye kuno angumutsumitsa Mulungu. 26 Chila munu akapomokaje na kwantsa kumutsumitsa Mulungu na vakalongaje, "Munyiguno tuwene ndongwa tsinya mutinuso."

27 Hotsavaga kulutila ndongwa itso, Yesu akahumaje kivala na kumuwona mukongotsa kodi ichite hono ha kukongotsela kodi, litawa lyake Lavi. Yesu akamulonjelaje, "Ufwate heni." 28 Lavi akinukaje na kuleka chila chinu akamufwataje Yesu. 29 Lavi akamuditilaje Yesu liwungo mu nyumba yake, na lilugu lya vakongotsa kodi na vanu vanji vakatsaje kulya. 30 Lechelelo Mafwalisayo na vadahitsi va malajitso ga Musa vakavakalalilaje vadahitswa va Yesu na kuvalonjela, "Kwasawuli yachi munkulya na kung'wa hamwe na vakongotsa kodi na vanya ndongwa tsibi?" 31 Yesu akavalonjelaje, "Vanu wosinambe vatamiche sivamusakaga muganga, lechelelo vatamwa yo vamusakaga muganga. 32 Sintsitsitse kuvachema vanu vawuya, lechelelo ntsitsitse kuvachema vanu vanya ndongwa ntsibi vatsileche na kumugaluchila Mulungu."

33 Vanu vanji vakamulonjelaje Yesu, "Vadahitswa va Yohana valekaga kulya na kusala, na vadahitswa va Mafwalisayo nawo vaditaga hihyo, lelo ndawuli vadahitswa vako vankulya na kung'wa!" 34 Yesu akavajibulaje, "Mbe, mufuluche muvadite vajentsi wovali hamwe na munyakukwela mwitsenjele valeche kulya na kung'wa? 35 Lechelelo yikufika siku iho munya kukwela alahetswa kwawo. Iho ho valaleka kulya." 36 Yesu akavapelaje muhwano guno, "Kuduhu munu yoademulaga chilaka mu mwenda mupya na kuchihoneletsa mu mwenda mulovela. Manyi adite ihyo akuva ademwe mwenda gula mupya, na chilaka chila sichifuluche chihwane na mwenda gula mulovela. 37 Kaha kuduhu munu yoavikaga difwayi ntsipya mu mifuko misakafu jo jiwupwe kwa nyingo ng'olo. Manyi adite ihyo mifuko jila jikutwadika na difwayi yila yikubohoka. 38 Lechelelo difwayi ntsipya yivikwaga mu mifuko mipya ja nyingo. 39 Kuduhu munu yoiwiniwaga kung'wa difwayi ntsipya manyi alongole kung'wa difwayi ya katali, ila alongaga, ‘Yila ya katali yo nofu kulutila difwayi ntsipya.’ "