1 Siku ya kwantsa ya wichi kung'acha hamilawu, vala vadala vakatolaje gala mafuta go ganunyililaga go vavisile chang'ani, vakabitaje ku kabuli. 2 Vakalifikaje liganga lila libiduswe kutali na kabuli. 3 Lechelelo hovavaga kwinjila mugati, sivakaguwonaje muvili gwa Mutwa Yesu. 4 Hovavaga vang'acha vapomwiche kwasawuli ya lulongwa ulo, luvala lulo vakimaje habehi nawo valume vavili, wo vavaga vafwite myenda jojavaga jimmelema ndalahela kota lwenje lwa liladu. 5 Vadala iwo vakawonaje muloto, vakahonamaje mbaka hasi. Lechelelo vanu vala vakavalonjelaje, "Mbe, ndawuli mungumusaka munu yo mumi hagati ha wo vafweye? 6 Alihaduhu hano, atsilipuche. Mwiwukaje kota fyo avalonje hoavaga kula ku Galilaya. 7 Hala ho avalonje kuta, ‘Heni Mwana va munu ntsin'ganika ntsibatiche na vanu vanya ndongwa ntsibi, vambambe mu musalaba na siku ya kadatu ngutsilipuka.’" 8 Ihyo ho vadala iwo vakiwukaje ndongwa tsila tso avalonje Yesu. 9 Ho vavaga kuwuya kuhuma ku kabuli, vakavalonjelaje vadahitswa vala kumi na yumwe na vanu vanji ndongwa itso tseka tso tsihumye. 10 Vanu wo valontsile ndongwa itso kwa vatumi va Yesu, vavaga Maliyamu va ku Majidala, na Yoani, na Maliyamu yuve va Yakobo, hamwe na vadala vanji wo vajendasaga hamwe. 11 Lechelelo vatumi vala vakalekaje kutsitumba ndongwa tsila tso vahuliche kuhuma kwa vadala vala, kwasawuli vatsiwonaga kota tsa wupufi. 12 Lechelelo Petulo akawukaje, akabitaje luvilo mbaka ku likabuli, Akahonamaje kuhunjilila mugati, akatsiwonaje sanda tsifulunjiche, siakachiwene chinu chinji. Akawuyaje kuno anhotsa chichi chochihumye.

13 Munyi gugo vadahitswa vavili va Yesu vavaga mung'asi vam'bita ku chijiji cho chinchemwa Emawu, lujendo lwake lwali lwa chilometa kumi na yimwe kuhuma ku Yelusalemu. 14 Vavaga vanlongana ndongwa tsila tseka tso tsihumye. 15 Hovavaga vang'acha vanlongana ndongwa itso, Yesu mwene akahumilaje na kihatsa hamwe nawo mu lujendo. 16 Vakamuwonaje, lechelelo sivamutselaga. 17 Yesu akavaputsaje, "Munlongana chichi kuno mun'jenda?" Nawo vakimaje vakwisimbe kumiho kuno vasusute. 18 Yumwe vawo yo achemwaga Chileopa, akamulonjelaje, "Mbe, heve uliyeka yo ulimujentsi kuno Yelusalemu yo sufitsele fila fyo fihumye kuko?" 19 Nayo akavaputsaje, "Finu fyachi?" Vakamulonjelaje, "Finu fyofimupatite Yesu va ku Natsaleti. Yoavaga muloli va Mulungu munya wuvetso wukomi mu ndongwa tsake na ng'olwa tsake halutalo ha Mulungu na ha vanu veka. 20 Vavina va vatawula nambiko na vavina vetu vamutawe ahigwe kufwa, nawo vakamuvambaje mu musalaba. 21 Lechelelo hetwe twihuvilaga kuta mwene yo akuvakulusa Vaisilaheli. Lechelelo sambi siku ya kadatu kuhuma ndongwa itso tseka tsihumile. 22 Kahi vadala vatunga va kwetu vatupomwise. Vakali vahele ku likabuli munyi guno kung'acha hamilawu. 23 Lechelelo sivaguwene muvili gwake. Vakawuyaje na kutulonjela kuta vatantsi vavili va Mulungu va kilanga vavahumye vavalonje kuta Yesu ang'acha mumi. 24 Vamwinga vetu vakavahele ku likabuli vakalole chila chovalontsile vadala iwo, lechelelo mwene Yesu sivamuwene." 25 Kahi Yesu akavalonjelaje, "Henye muli vanu vapufi chinya ndawuli, na numbula tsenyu nambe tsitumbile ndongwa tsila tseka tso tsalontsilwe na valoli va Mulungu? 26 Valoli va Mulungu vandiche kuta, Chilisito yo ahagulwe na Mulungu siaganikije akodeche isho na hambele injile mu wumelemo wa Wuntsajila wake?" 27 Yesu akatsaje kuvadadambulilaje ndongwa tseka fyo tsinlonga mu mandiko kwasawuli ya mwene, kwantsila mu malajitso ga Musa mbaka kwa vavoli veka. 28 Vavaga kuva habehi na chijiji chila chovabitaga, Yesu akiganitsaje kota an'gana kwendelela na lujendo, 29 lechelelo vene vakamugongoletsaje ikale nawo, vakalongaje, "Wikale hamwe na hetwe, kwasawuli sambi kuveye mihe na chilo chinkwinjila." Duve, akinjilaje mugati akikalaje nawo. 30 Hoavaga kwikala na kulya hamwe nawo, akategulaje libumunda, akalumbaje, akalimegaje na kuvapela. 31 Luvala lulo miho gawo gakagubulwaje, vakamutselaje, lechelelo mwene akayagaje hagati hawo. 32 Vakiputsaje vene kwa vene, "Mbe, numbula tsetu sitsitinuchije kwa wusangalo, hala hoavije angutudahitsa mandiko ga Mulungu kula kung'asi?" 33 Luvala lulo vakawukaje na kuwuya ku Yelusalemu. Kuko vakavafikaje vatumi vala kumi na yumwe hamwe na vala wovavaga hamwe nawo vakong'ine, 34 valongaga, "Mutwa atsilipuche nachene! Amuhumye Simoni!"

35 Ihyo vala vadahitswa vavili vakavalonjelaje chila cho chivahumye mung'asi, na hila fyo vamutselye hala hoamegije libumunda.

36 Hovavaga vang'acha vanguvalonjela ihyo, Yesu mwene akimaje hagati hawo, akavalonjelaje, "Wusichimafu wuve na henye." 37 Vakatinukaje na kuva na muloto, vahotsaga kuta valiwene lilayika. 38 Lechelelo mwene akavaputsaje, "Kwasawuli ya chichi munkuva na muloto? Mbona munkuva na muhwehwe mu numbula? 39 Mulave mawoko na magulu gangu, yo heni, na muntsambalagate mulole, kwasawuli lilayika lilihela muvili na fitseje kota heni fyontsili." 40 Hoavaga kulonga ihyo, akavalajilaje mawoko na magulu gake. 41 Vadahitswa vake vakalemwaje kitumba kuta yo mwene, kwasawuli ya kupomoka na wusangalo wo vavaga nawo. Hovavaga vang'acha vapomwiche, Yesu akavaputsaje, "Muna chinu chochive cha kulya?" 42 Vakamupelaje chipande cha somba cho chibanikwe. 43 Akachitolaje na akalyaje kuno veka vangumulola.

44 Kaha akavalonjelaje, "Ifino fyo ntsavalonje hamutalo hontsavaga ntsing'acha hamwe na henye, chila chochandikwe kwasawuli ya heni mu malajitso ga Musa, na fyo vandiche valoli va Mulungu na mu chitabu cha Tsabuli mbaka fihumile."

45 Iho ho akavagubulaje nyala tsawo vagatsele mandiko ga Mulungu, 46 akavalonjelaje, "Ihi fyo yandikwe mu mandiko ga Mulungu kuta, Chilisito akukodwa mbaka kufwa na siku ya kadatu akutsilipuka. 47 Na kwa Litawa lya Yesu wujumbe wa wuleketso wa ndongwa ntsibi, wukuvikulwa kwa vanu va inyi tseka, kwantsila Yelusalemu. 48 Henye yo muli vasayidi va ndongwa tsino. 49 Na heni nguvatumila yula yo ali avalonje Dada vangu kuta akuvapela. Lechelelo henye mwikale mu muji gugu, mbaka hala homukupelwa Muhe va Mulungu kuhuma kilanga."

50 Kahi Yesu akavalongotsaje vadahitswa vake mbaka kivala kwa muji gwa Besaniya, akinulaje mawoko gake kilanga, akavatambichilaje. 51 Ho avaga anguvatambichila vadahitswa vake, Yesu akachipulwaje kubita kilanga kwa Mulungu na kuvaleka. 52 Kahi vakamufugamilaje na kuwuka kupiluka Yelusalemu kuno vavaga na wusangalo wukomi. 53 Chipindi cheka vakikalaje mu Nyumba ya Mulungu na kuno vangumutsumitsa Mulungu.