1 Yesu hoavaga mu Nyumba ya Mulungu akavawonaje vanu vafuchifu fyo vatawulaga sadaka gawo mu lisandiko lya kutuntsila sadaka. 2 Akamuwonaje mufwile yumwe mugayu antawula sendi tsivili. 3 Yesu akalongaje, "Ntsinguvalonjela nachene kuta, mufwile yuno mugayu atawe sadaka ngomi kulutila tso vatawe vanu veka. 4 Kwasawuli vanu vano veka vatawe sadaka tsawo kuhuma mu fila fyo filutye mu wufuchifu wawo, lechelelo mufwile yuno na avaje mugayu, atawe chila chinu cho ihuvilije."

5 Vadahitswa vake vamwinga vavaga vanlongana hila Nyumba ya Mulungu fyo yatsentsilwe kwa maganga manofu na ga galama ngomi, hamwe na sadaka tso vatawe vanu kwa Mulungu. Lechelelo Yesu akavalonjelaje kuta, 6 "Chikutsa chipindi fino fyeka fyo mungufiwona, kuduhu nambe liganga limwe lyo likusigala mwilanga mwa liganga linji, kwasawuli geka gakubomolwa."

7 Vanu vakamuputsaje Yesu, "Mudahitsi, ndongwa itso tsikuhumila hanili? Ndajilo yachi yo yikulajila kuta ndongwa itso tsilihabehi kuhumila?" 8 Yesu akavalonjelaje, "Mwiyangalile, mulekaje kudeteletswa. Kwasawuli vanu wolofu vakutsa na kulonga kuta, ‘Vene yo heni!’ Manyi muwone ihyo mutsele kuta, ‘Muda gula guli habehi!’ Lechelelo henye mulekaje kuvafwata. 9 Hala homukuhulika ndongwa tsa ligalu na fitika mulekaje kuva na muloto, kwasawuli ndongwa itso tsin'ganika tsihumile tandi, lechelelo wula wudugo wukuva wung'ali."

10 Kaha Yesu akendelelaje kulonga, "Inyi yikwitova na inyi yinji na wuntsajila wukitova na wuntsajila wunji. 11 Kukuva na mikakamo mikomi ja inyi, na ntsala, na namwa tsa kutinusa tsa kiyambutsa. Kaha kukuva na finu finya mutinuso na ndajilo ngomi kuwulanga. 12 Lechelelo hofikuva fing'acha kuhumila ifyo fyeka, vakuvibata henye kwasawuli yangu na kuvakoda na vakuvasindika mu nyumba tsa kwitang'anila na kuvawopa mu nyumba tsa wuwopwa, mukusindikwa kulutalo kwa vantsajila na vavina. 13 Lechelelo icho cho chikuva chipindi cha henye kuvavikulila litumbilo lyenyu. 14 Mulekaje kuhotsa hila fyo mukulonga halutalo ha wuhigo, 15 kwasawuli heni nguvapela nyala na ndongwa hila fyo mukulonga, na kuduhu munu yo afuluche avasume henye. 16 Henye mukupitukwa na valeli venyu, vang'olotsenyu na vanu va habehi na henye, na vamwe mukukopolwa. 17 Vanu veka vakuvavipila henye kwasawuli ya kufwata heni. 18 Lechelelo muhe gwenyu gukuva na wukuva na wukuluso wo wugaya wudugo. 19 Lechelelo yo akikangatsa mbaka kuwudugo, akukuluswa."

20 Iho ho mukuwona muji gwa Yelusalemu gupilimwe na vatova ligalu, mutselaje kuta chipindi cha kwananjika kwa muji ugo chifisile. 21 Iho vanu vala wovali ku Yudeya vabilimile kufidunda, veka wovali ku Yelusalemu vahume, na vala wovali kumigunda valekaje kuwuya ku mujini. 22 Kwasawuli siku itso tsikuva siku tsa kupilulilwa kwa tsibi tso tsadisilwe, ili tsikwile ndongwa tseka tso andiche Mulungu. 23 Vakudutsa vadala wo vanya wubofu na wo vankosa vana, kwasawuli kukuva na ng'odeko ngomi na mbipo ya Mulungu yikuva kwa vanu va inyi ya Yudeya. 24 Vamwe vakukopolwa kwa waladi, na vamwe vakutegulwa na kusindikwa mu nyumba tsa vawopwa na kusindikwa kota vanu valemulwe mwigalu na vakusindikwa kuinyi tsinji, na muji gwa Yelusalemu gututavalwa na vanu wo si Vayawudi mbaka chipindi chawo fyo chikulutila.

25 "Kukuva na ndajilo ku litsuva, na mwetsi na nyenyetsi. Inyi iyi na bahali yikuva na mavimbi makomi ya kutinusa, lulongwa ulo lukudita vanu va inyi tseka vave na ng'odeko na muloto. 26 Vanu vakugotsola kwa muloto mukomi ho vakutsiwona ndongwa tso tsikuhumila mu inyi, na kwasawuli ya kutigaswa kwa finu fya ku lulanga. 27 Chipindi icho ho vakumbona heni Mwana va Munu ntsinkutsa mu mafuluka, kwa ludali na wumelemo wukomi. 28 Hala ndongwa itso ho tsikwantsa kuhumila, mwikangatsaje na kwihuvila kuta wukuluso wenyu wuli habehi."

29 Kahi Yesu akavalonjelaje muhwano guno, "Mugulave mubichi go gunchemwa mutini na mibichi jinji jeka. 30 Ho mukuva kujiwona jantsitse kudedemuka mahamba, mun'tsela kuta chipindi cha mbelega chifisile. 31 Ho hihyo homukuva kuwona ndongwa itso tsinhumila, mutselaje kuta wuntsajila wa Mulungu wuli habehi. 32 Ntsinguvalonjelani wukweli kuta, vanu va chilelo chochi kutsiwona ndongwa itso, sichikulutila mbaka ndongwa itso tseka tsihumile. 33 Kilanga na Inyi fikulutila, lechelelo nayivaje ndawuli Ndongwa tsangu sitsikulutila."

34 Yesu akendelelaje kuvalonjela, "Mwiyangalile numbula tsenyu tsilekaje kwibatika wuhatufu, na wugatsi, na mbwiniwo na katsi tsa wumi wuno, mbaka siku yila yivafiche kwa kuvatinusa kota hila mutego fyo gugwilitsaga. 35 Kwasawuli siku iyo yikutsa kwa vanu veka wo vangikala mu inyi yeka. 36 Muvaje miho siku tseka na kuno munsuka lwahihyo ili muve na wuvetso wa kuvakulusa na fila fyeka fyo fikuhumila, na kwima halutalo ha Mwana va Munu."

37 Siku tseka hamunyi Yesu adahitsaga mu Nyumba ya Mulungu, na chila hamihe abitaga ku chidunda cha Mitseyituni na kuva kuko chilo cheka. 38 Vanu veka vabitaga mu Nyumba ya Mulungu hamilawu kumuhulikitsa Yesu.