1 Luvala ulo kwavaga na vanu wo valivamulonje Yesu ndongwa tsa vanu vatunga va ku Galilaya. Vanu vala yo Pilato ali alajitse vakopolwe na danda yawo yihantswe mu minyama jo jisintsitswe kwasawuli ya nambiko. 2 Yesu akavalonjelaje, "Muhotsa kuta Vagalilaya iwo wo vakopulwe kwa ng'odeko kwasawuli vali vanu vabi kuvalutila Vagalilaya veka? 3 Ntsinguvakanila nachene si ihyo ndaya, hihyo na henye manyi muleche kupituka na kutsileka ndongwa tsenyu ntsibi mukwanangwa kota vawo. 4 Awu vala vanu kumi na nane go gwavagwilye munala kula ku Siloamu vakafwaje, munkuta vavaga vakola ndongwa ntsibi kulutila vanu vanji veka wo vikalaga ku Yelusalemu? 5 Ntsinguvakanila nachene, na henye manyi muleche kumupituchila Mulungu mukwanagwa kota iwo."

6 Kahi Yesu akavalonjelaje muhwano guno, "Munu yumwe avaga na mubichi gwa mutini mu mugunda gwake gwa mitsabibu. Munu uyo akabitaje kubava mibawo, lechelelo akagufikaje gulihela libawo lyolive. 7 Ihyo akamulonjelaje yo atuntsaga mugunda gwake gwa mitsabibu kuta, Lave, myaka jidatu mbaka sambi mbeye ntsinsaka mibawo mu mubichi guno gwa mutini bila kupata chochive. Ugudumule! Kwasawuli yachi gwendelele kwananga inyi?" 8 Yula mutuntsaji va mugunda akamulonjelaje, "Mutwa, tuguleche kanji kwa mwaka gunji na heni nguguboholela malenga na nguguvichila mboleya. 9 Manyi gulele mwaka go gunkutsa yikuva finofu, lechelelo manyi sigukulela duve ufuluche ugudumule."

10 Siku yimwe Yesu avaga an'dahitsa mu nyumba ya kitang'anila Vayawudi, nayo yavaga Siku ya Weselo wa Vayawudi. 11 Mumo mu nyumba iyo mwavaga na mudala yumwe yo avaga jimubite misoka, jo jamudisile abibindale mugongo kwa myaka kumi na nane mbaka alemwaga kugoloka. 12 Yesu ho avaga kumuwona, akamuchemaje na kumulonjela kuta, "Mudala uponile wubibindafu wako!" 13 Akamuvichilaje mawoko mwilanga mwa yula mudala na kumusuchila, na luvala lulo akimaje na akantsaje kumutsumitsa Mulungu. 14 Lechelelo muvina va nyumba ya kwitang'anila Vayawudi akavipaje kwasawuli Yesu avaga amuponitse mudala uyo Siku ya Weselo. Ihyo akavalonjelaje vanu wovakong'ine kuta, "Hotsili siku sita tsotsin'ganika vanu kukola katsi, ihyo mutsaje muponetswe siku itso, lechelelo mulekaje kutsa mu Siku ya Weselo" 15 Iho lelo Mutwa akamulonjelaje, "Henye mu vabunganitsi! Munu vachi hagati henyu yo siayidindulilaga senga yake awu ntsove yake kuhuma mwigagala ayisindiche yikang'we malenga ha Siku ya Kwesela? 16 Nayo yuno mudala va chilelo cha Ibulahimu yo akoditwe na lisoka kwa myaka kumi na nane. Mbe, siaganikije kuwopolwa Siku ya Weselo?" 17 Hoavaga kulonga ihyo, vatelani vake vakawonaje nyoni, lechelelo vanu vanji vakavaje na wusangalo ndalahela kwasawuli ya ndongwa tseka tso adisile Yesu.

18 Yesu akaputsaje, "Wuntsajila wa Mulungu wihwana na chinu chachi? Nguwiganitsa na chichi? 19 Wunakota nyadikwa ya mubichi gwa muhaladali yo atweye munu akayalaje mu mugunda gwake. Yikakalagalaje yikavaje mubichi mukomi, fideje fya kululanga fikatavaje fifulya mu mitambi jake."

20 Kaha Yesu akavaputsaje, "Nguwiganitsa na chichi Wutsajila wa Mulungu? 21 Wunakota hamila yo atweye mudala yumwe yo ahantsitse mu madebe gadatu ga wuse, ihyo wuse weka wukatsatsamukaje."

22 Kahi Yesu ho avaga mulujendo kubita ku Yelusalemu, akalutilaje mu miji na fijiji, kuno an'dahitsa vanu ndongwa tsa Mulungu. 23 Munu yumwe akamuputsaje, "Mutwa, mbe vanu vadodo hela wo vakukuluswa?" 24 Yesu akamulonjelaje, "Mwikangatsaje kwinjila kwa kukolela lwitsi lunyehe, kwasawuli ntsinguvalonjela nachene, vanu wolofu vakujela kwinjila lechelelo sivakuvetsa. 25 Chikutsa chipindi cha munya nyumba ho akulamuka na kudinda lwitsi, nanye mukwima kivala na kuhodetsa na kulonga kuta, Mutwa, Tudindulile lwitsi! Lechelelo mwene akuvalonjela kuta, Sintsivatsele henye komunhuma. 26 Nanye mukumulonjela hino, Twaleye na kung'wa hamwe na heve, kaha wadahitse mu mitava jetu! 27 Lechelelo mwene akuvalonjela, Sintsivatsele henye na kula ko muhumye, muwuche hano henye yo mun'dita ndongwa ntsibi. 28 Hoihyo kukuva na chivembo na kugwegwetsula mino, ho mukuvawona Ibulahimu, na Yisaka, na Yakobo na valoli veka ho vakuva mu Wuntsajila wa Mulungu, lechelelo henye mukuva mudibulwe kivala. 29 Vanu vakutsa kuhuma lubali lwa ko linhumila litsuva na ko linsotela litsuva, na lubali lwa kunena na lubali lwa kusika, nawo vakikala hono hawo ho avahagulye Mulungu kwasawuli ya liwungo, na Mulungu akuvatavala. 30 Enaa! Kovali vanu yovali kuwudugo yo vakuva valongola, na valongola wo vakuva kuwudugo."

31 Luvala ulo Mafwalisayo vatunga vakabitaje kwa Yesu vakamulonjelaje, "Uwuche hano ubite hono hanji, kwasawuli Helode an'gana kukukopola." 32 Yesu akavalonjelaje, "Mubite mukamulonjele uyo licheve, ‘Ntsihumya misoka na kuvaponetsa vatamwa munyiguno na mitondo, na hawucha nguyisinda katsi yangu.’ 33 Nayivaje ihyo heni tsin'ganika kwendelela na lujendo lwangu munyiguno, mitondo na hawucha, si finofu muloli va Mulungu afwile hono hanji na ku Yelusalemu. 34 Heve, Yelusalemu! Heve, Yelusalemu! Yo unguvakopola valoli va Mulungu na kwa kuvatova na maganga vala wo vatumilwe kwako. Mala kalinga nganije kuvakong'asa hamwe vanago, kota hila ng'uku fyoyikong'asaga fitswiya fyake mu mabava gake, lechelelo ulemile. 35 Lelo! Nyumba yenyu yilesilwe wuchiva. Ntsinguvalonjelani, simukumbona kaha mbaka muda gula ho mukulonga hino, ‘Aditilwe wuwuya na Mulungu mwene yo ankutsa kwa Litawa lya Mutwa.’ "