1 Siku yimwe ya Kwesela Vayawudi, Yesu avaga anlutila mu migunda ja wuhemba. Vadahitswa vake vakabenaje maho ga wuhemba vakapululaje na kwantsa kulya ndete. 2 Mafwalisayo vatunga vakamuputsaje, "Mbe, kwasawuli yachi mun'dita lulongwa losiluganikaga kuditwa Siku ya Kwesela?" 3 Yesu akavajibulaje, "Mbe, henye simulasoma hila fyoadisile Dawudi hamwe na vayage hovavaga na ntsala? 4 Dawudi inje mu Nyumba ya Mulungu, akatolaje mabumunda gala gogali gavisilwe kwasawuli ya kuliwa na vatawula nambiko ng'ani, akalyaje na kuvapela vayage." 5 Yesu akavalonjelaje kuta, "Mwana va Munu yo Mutavala va Siku ya Kwesela."

6 Siku yinji ya Weselo, Yesu akinjilaje mu nyumba ya kitang'anila Vayawudi na akantsaje kudahitsa. Kuko kwavaga na munu yoapotsile liwoko lililo. 7 Mafwalisayo na vadahitsi va malajitso ga Musa vasakaga hila fyovakumuhiga Yesu, iho vakavaje van'tsindila kuwona manyi akumuponetsa munu Siku ya Kwesela. 8 Lechelelo Yesu akatselaje chovahotsaga, akamulonjelaje munu yula yoapotsile liwoko kuta, "Winuche wime halutalo ha vanu." Ihyo munu yula akimaje. 9 Kahi Yesu akavalonjelaje, "Ntsinguvaputsa, mbe, chinu chachi choching'anika kuditwa Siku ya Kwesela? Kudita ndongwa nofu au ndongwa ntsibi? Kukulusa wumi wa munu au kuwananga?" 10 Yesu akavalolaje vanu wovali chila lubali, kahi akamulonjelaje yula munu yo apotsile liwoko kuta, "Golole liwoko lyako." Nayo akagololaje, na liwoko lyake likaponaje. 11 Lechelelo Mafwalisayo na vadahitsi va malajitso ga Musa vakamuvipilaje ndalahela, vakalonganaje hila fyovakumudita Yesu.

12 Siku yimwe Yesu akabitaje kuchidunda kusuka, kuko akamusukaje Mulungu chilo cheka. 13 Hoyavaga kufika hamilawu akavachemaje vadahitswa vake, akavahagulaje hagati hawo vanu kumi na vavili woavachemile vatumi. 14 Yo avahagwe vavaga; Simoni yoamupelye litawa Petulo, na Andeleya mung'olotse, na Yakobo, na Yohana, na Filipi, na Batulomayo, 15 Matayo, na Tomasi, na Yakobo mwana va Halufwayo, na Simoni yo atovanilaga inyi yake, 16 na Yuda mwana va Yakobo na Yuda Isikaliyote yoamugaluche Yesu.

17 Yesu hoavaga kwika kuhuma kuchidunda hamwe na vatumi vake, akimaje hono hanya mbuga, iho havaga na vadahitswa vake vanji wolofu na lilugu lya vanu wovahumye mbali tseka tsa Yudeya, na Yelusalemu, na Tilo na Sidoni. 18 Vanu iwo vavaga vatsitse kumuhulikitsa na kuponetswa matamwa gawo. Hihilaga na vanu veka yovakodekaga na misoka akavaponetsaje. 19 Vanu veka vaganaga kumudometsa Yesu, kwasawuli wuvetso wake wahumaga na kuvaponetsa vanu.

20 Kahi Yesu akavalolaje vadahitswa vake na kuvalonjela,

"Mulungu avaditye wuwuya henye vatsunwa,

kwasawuli mukwanuchila wuntsajila wa Mulungu.

21 Mulungu avaditye wuwuya henye yo muna ntsala,

kwasawuli hambele mukugutitswa.

Mulungu avaditye wuwuya henye yo munvemba sambi,

kwasawuli hambele mukuheka!"

22 Mulungu avaditye wuwuya henye ho munvipilwa na vanu na kubagulwa, na kuligwa, na kuvananjila litawa lyenu kota vanu vabi kwasawuli ya Mwana va Munu! 23 Hotsikuva kuhumila ndongwa itso musangalalaje na kuhechelela, kwasawuli ngweko yenyu yikuva ngomi kilanga kwa Mulungu, ihyo fyo vakukwenyu fyovavaditye valoli vakatali.

24 Lechelelo mukudutsa henye muvafuchifu,

kwasawuli mwanga mupasile finu finofu.

25 Mukudutsa henye yo mwigwite sambi,

kwasawuli kulutalo mukuwona ntsala.

Mukudutsa henye yo munheka sambi,

kwasawuli kulutalo mukung'ung'uta na kuvemba.

26 Mukudutsa henye vanu hovangu vatsumila henye, kwasawuli ho hihyo vadadawo fyo vavaditye valoli va wudesi.

27 Lechelelo henye munyulikitse, muvaganaje vatelani venyu. Muvaditile finofu yo vanguvavipila. 28 Muvaditile wuwuya vanu vala yo vanguvakotola, na muvasuchile vala yovanguvaditila ndongwa ntsibi. 29 Manyi munu akutove mulutsetse lwa kwililo, umupitulile na lutsetse kwililo. Manyi munu akusukule likoti umulechele na gwanda. 30 Manyi munu yoyuve akusukule chinu chako, ulekaje kumudaya. 31 Muvaditilaje vanu kota hila fyomun'gana henye kuditilwa na vanu vanji.

32 Manyi muvagane vala ng'ani yo vanguvagana henye, mun'dita ndongwa tsachi nofu? Kwasawuli nawo yo van'dita ndongwa ntsibi vavaganaga vala wovanguvagana vene. 33 Kahi manyi muvaditile ndongwa nofu vala ng'ani wovanguvaditila ndongwa nofu henye, mukuva mun'dita ndongwa tsachi nofu? Kwasawuli nawo yo van'dita ndongwa ntsibi vavaganaga vala wovanguvagana vene. 34 Manyi munguvakopetsa vanu finu kwa kihuvila kuta na henye vakuvapilulila chila chinu mukuva mun'dita ndongwa tsachi nofu? Kwasawuli nawo yo van'dita ndongwa ntsibi vavaditilaga hihyo vakola ndongwa ntsibi kwa kihuvila kuhombwa fyeka. 35 Lechelelo henye muvaganaje vatelani venyu kwa kuvaditila finofu, muvakopetsaje bila kwihuvila kupilulilwa, na ngweko yenyu yikuva ngomi, nanye mukuva vana va Mulungu yoali kilanga ndalahela. Kwasawuli mwene yo muwuya kwa vanu vabi na kwa vanu yo valihela ndumbo. 36 Muvaje na lusungu kota Dada venyu Mulungu fyo ana lusungu.

37 "Mulekaje kuvahiga vanu vanji, na Mulungu siakuvahiga henye, mulekaje kuvakalalila vanu vanji ili Mulungu aleche kuvahiga na henye. Muvahulumilaje vanu vanji, ili Mulungu avahulumile na henye. 38 Muvapelaje vanu vanji finu fyenyu, na henye mukupelwa na Mulungu, na kwanuchila hihyo kwa chipimo cha kusindililwa na kutsugwantswa, na kumema mbaka kubohoka. Kwasawuli chipimo chila chomunguvapimila vanu vanji, chochicho chomukupimilwa na Mulungu." 39 Akavalonjelaje muhwano guno, "Mbe, chibofu afuluche amulongotse chibofu muyage? Manyi adite ihyo, veka vavili vakwinjila mu lyowo. 40 Mudahitswa siamulutilaga mudahitsi vake, lechelelo yula yoasintsile kudahitswa afuluche ave kota mudahitsi vake. 41 Kwasawuli yachi unlola kabadu ka lubawo kokali muliho lya mung'olotso, na heve sinambe wilole libadu lya muliho lyako? 42 Unvetsa ndawuli kumulonjela mung'olotso kuta, ‘Mung'olotsangu, hondi nguhetse kabadu kokali mugati mu liho lyako,’ na heve nambe wilole kabadu kokali muliho lyako? Heve ukuva mudesi, uhetse kabadu kokali mugati mu liho lyako tandi, iho houfuluche uhetse kabadu kokali muliho lya mung'olotso."

43 Mubichi munofu sigulelaga mibawo mibi, na mubichi mubi sigulelaga mibawo minofu. 44 Chila mubichi gutselanikaga kwa mibawo jake. Kwasawuli vanu sivabavaga mibawo ja tsambalawe mu mubichi gwa nundwe, awu tsabibu mu mibichi jinya mifwa. 45 Munu muwuya ahumyaga ndongwa nofu tsotsili mu numbula yake, nayo munu munya wubi ahumyaga ndongwa ntsibi tsotsili mu numbula yake, kwasawuli munu alongaga fyo fimemile mu numbula yake.

46 "Mbe, Kwasawuli yachi mun'yema Mutwa, Mutwa, na kuno sinambe mudite fyo ntsinguvalonjela? 47 Nguvalajila fyoali munu yula yoankutsa kwa heni na yoanhulika Ndongwa tsangu na kudita fyontsin'gana. 48 Munu uyo ihwana na munu yoan'gana kutsenga nyumba, ayafile hasi ndalahela, na kuvika musinji hono hanya litalawe. Manyi litse likuka lya malenga na kuyitova nyumba yila, siyifuluche yitigasiche kwasawuli yitsentsilwe finofu. 49 Lechelelo munu yula yanhulika ndongwa tsangu na sinambe adite kota fyo ntsin'gana, anakota munu yo atsentsile nyumba muluganga bila kuyava musinji. Manyi litse likuka likuyitova nyumba iyo mbaka yikugwa."